Yohana 3 - Lagano da Isambi

Nikodemo kapetelwa nyongʼonyo za iloho; Kitala cha Lumuli chabaha vino

¹ Kukala na munhu yumwe wa Mafariseo tagwa jake Nikodemo, mkulu wa Wayuda.

² Hiyo kamgendela Yesu ikilo na kumulongela, “Mwalimu, tuvitanga kamba kwa mulangulizi ulawile kwa Mulungu, kilumbo haduhu munhu yadahile kuzitenda nhuko zino ziutenda gweye, kamba Mulungu hawile hamonga naheyo.”

³ Yesu kedika kamulongela, “Kingongongo nokulongela, munhu kamba haleligwe mwanza wekabili, hadaha kuwona undewa wa Mulungu.”

⁴ Nikodemo kamulongela, “Kodahaze munhu kwelekwa yahawa mvyele? Kodaha kwingila muinda ya mamaake mwanza wekabili yaleligwe?”

⁵ Yesu kamwidika, “Togola Togola nokulongela, munhu kamba helekwe mmazi na mLoho hadaha kwingila mundewa wa Mulungu.

⁶ Chelekwe na lukuli, lulo lukuli, na chelekwe na Loho, iyo iloho.

⁷ Sikuukanganye vinikulongela, Mweye vilumba kuleligwa lwekabili.

⁸ Beho dobwinha kudilonda, na dizwi jake kodihulika, kahi huditanga kudilawa bule kudigenda. Avo vivo viigambile munhu yaleligwe mLoho.”

⁹ Nikodemo katongola yomulongela, “Godahikaze gano?”

¹⁰ Yesu kalonga, “Che, gweye kwa mulangulizi wa Israeli, na mbuli kamba zino kumbe huzitangile?

¹¹ Kingongongo nokulongela, tweye tupetaga gatutangile, tusindilaga gatuwene, amweye usindi wetu hamuubokela.

¹² Nihampetelani mbuli za imbago iino na mweye hamvumila, movumila vilihi nihampetelani za kuulanga?

¹³ Kileka kuduhu munhu yakwelile kuulanga, komu Heyo yahumuluke kulawa kuulanga, iyo Mwanage Munhu.

¹⁴ Na kamba vija Mose viyamwinule yuja inyoka kuluwala, vivo Mwanage Munhu vimwandakana yenuligwe mbiki,

¹⁵ giladi kila munhu yonda yamtogole, yawone upile wa digunge na digunge.

¹⁶ Kwa mzoko vivo Mulungu kainogela imbago, kamgala Mwanage Nyadimwe (Waidiwangala), giladi wose wonda wamtogole sikuwage, komu wawone upile wa digunge.

¹⁷ Chanduso Mulungu kamgala Mwanage muiisi, si kamba yaudumilize ulumwengu, bali ulumwengu uhonele kumwake.

¹⁸ Yonda yamtogole Heyo, havika kukitala (cha Mulungu); yalekile kumtogola kamala kutaguswa, kilumbo haditogole twaga ja Mwana Nyadimwe wa Mulungu.

¹⁹ Kitala icho kino, Lwiza Lumuli luvikila muiisi, na iwanhu wadinogela ziza kubita Lumuli, kilumbo viwotenda viha.

²⁰ Kilumbo kila yotenda gehile, kehila Lumuli, wala heza mulumuli, giladi viyatendile sikuvikomhokelwe.

²¹ Komu yotenda ihoko, kokwiza kuLumuli, giladi viyotenda vyoneke chalinze kamba vija vilumbile na Mulungu.”

Gomba da kusunha na kugela nhende; Yesu msola mhambe

²² Imala baho Yesu na wanahina wake wachola isi ya Uyuda, kasinda hiko hamonga na hewo yosingula wanhu.

²³ Na Yohana nayo kakala yobatiza hiko Ainoni behi na Salimu, kilumbo hiko kukala na mazi bwando, na wanhu wamgendela wabatizwa.

²⁴ Kilumbo Yohana kakala hanafungigwa.

²⁵ Kulawilila bamila, iwanahina wa Yohana na Muyuda imonga kwa kimu cha kungʼazwa.

²⁶ Wamgendela Yohana wamulongela, “Rabi (Mkulufunzi), ayuja yakalile hamwe na gweye umwambu wa Yordani, yuyuja yusindile, lola na heyo kosingula wanhu, na wose wamgendela.”

²⁷ Yohana kedika yolonga, “Munhu hadaha kubokela longa jojose, kamba hagwelelwe na Tata wa Uchana.

²⁸ Mwemwe wenyecho monisindila vinilongile, Niye si nene Kristo komu nhumigwa kuulongozi wake.

²⁹ Heyo yali na mhambe yuyo Msola-mhambe; komu Mbwiga wa Msola-mhambe (iyo nene) ayo yokwima na kumtegeleza yosamhukila hakulu dizwi da Msola-mhambe. Basi ndengha yangu ino ivikizwa.

³⁰ Avo heyo vimwandakana yabanze, na niye mhunguke.

³¹ Heyo yalawile uchana ka uchana kwa gose; heyo yalawile muisi ino, magweka gake ga muisi, kolonga ga isi ii.

³² Yalawile kuulanga ka uchana kubanza gose; gaja gayawene na kugahulika gago goyosindila; kileka haduhu yaubokele ulonzi wake.

³³ Maza heyo yauvumile ulonzi wake, kagela utango kamba Mulungu iyo wa ihoko.

³⁴ Heyo yatumigwe na Mulungu kolonga mbuli za Mulungu, kilumbo kogola iLoho habunzaga.

³⁵ Tata kamnogela Mwana kamwingha gose mmakono gake.

³⁶ Yonda yamtogole Mwana kanawo upile wa digunge; yolema kumtogola Mwana, honda yawone upile, komu lusango lwa Mulungu tomkalila.”