Yohana 20 - Lagano da Isambi

Imitondo ya Pasaka, Yesu kazuka

¹ Viivikile siku ya ichanduso ya ijuma, Maria Magdalena kachola kukabuli imitondotondo, tanhu kuhali na ziza; kajona dija idibwe disegezigwa hana ikabuli.

² Kachola mbwisa, kavika kwa Simoni Petro na yuja imwanahina iyagwe, ayuja Yesu iyamnogele, kawalongela, “Wamsegeza Mndewa mkabuli, wala hatutangile hawamwikile.”

³ Baho Petro kalawa na yuja imwanahina iyagwe, wagoga nzila kuchola kukabuli.

⁴ Wose vuwali wabili wabigima, na yuja imwanahina iyagwe kachola bigime kumbanza Petro, kalongola ukuvika hali ikabuli.

⁵ Kenamila na kusungulila, kazona nhambala za sanda zitambalale, bali hengile.

⁶ Baho keza na Simoni Petro yomkoleleza, kengila mgati mwa ikabuli na kuvilolesa ivitambala vitambalale;

⁷ Na uja mulufia ukalile mutwi mmwake, hautambalale hamonga na ivitambala, komu uizingiliza-zingiliza kutali hanhu hali yeka.

⁸ Baho yengile na yuja imwanahina iyagwe yavikile ichanduso kukabuli, kavona, katogola.

⁹ Kwa mzoko tanhu hawanaditanga jandiko kamba imwandama kuzuka.

¹⁰ Avo waja iwanahina wachola na zao ukaye kumwao.

Yesu kamulawilila Maria Magdalena

¹¹ Komu Maria kakala yemile hanze behi na ikabuli yolila, na viyakalile yolila, kenamila kasungulila mgati mdikabuli.

¹² Kawona malaika wabili, wavalile nguwo nzelu, wakalile yumwe kuli iditwi, yumwe kuli imigulu haja hautambalikwe umtufi wa Yesu.

¹³ Na hewo wamulongela, “Mamo, kolilila choni?” Kawalongela, “Kilumbo wamsegeza mndewa wangu, na niye sitangile kuwamwikile.”

¹⁴ Yomala kahinduka hachugu, kamona Yesu yemile, hamtangile kamba iyo Yesu.

¹⁵ Yesu kamulongela, “Mamo, kolilila choni? Komzahila yalihi?” Na heyo, kuno yogesa kamba yuyo msepa ikihati, kamulongela, “Bwana, uhawa gwegwe umsolile, ndongela haumwikile, na niye ngende hamsole.”

¹⁶ Yesu kamulongela, “Maria!” Na heyo kahinduka, kamulongela kwa kiebrania, “Raboni!” (Ngalukizo yake, “Mwalimu wangu”)

¹⁷ Yesu kamulongela, “Sikuungoge, kwa mzoko sinaweluka kuchola kwa Tata; bali genda kwa ndugu zangu, kawalongele, noweluka kuchola kwa Tata wangu na heyo iyo Tata wenu, kwa Mulungu wangu na heyo iyo Mulungu wenu.”

¹⁸ Maria Magdalena kachola kawapetela iwanahina, Nimona Mndewa, na ago gago gayanongele.

Yesu kawonekela wanahina na Toma

¹⁹ Viivikile ichungulo siku ija ya ichanduso ya Ijuma, haja iwakalile iwanahina, na nyivi zihindigwa kilumbo cha kuwadumba Wayuda, keza Yesu, kema wima hagatigati, kawalongela, “Tindiwalo diwe kumwenu!”

²⁰ Yomala kawalagila mikono yake na lubavu lwake; na waja iwanahina wemozamoza, vuwamonile Mndewa.

²¹ Yesu kawalongela viyagwe, “Tindiwalo diwe kumwenu! Kamba Tata viyanhumile niye, nomgalani na mweye.

²² Yomala kawahuzila na kuwalongela, Bokeleni Loho Ingʼalile!

²³ Wowose wonda muwasegezele matozo, wosegezelwa, na wowose wonda muwafungile matozo wofungilwa.”

²⁴ Komu imonga wa waja longo dimwe na wabili, Tomaso yokemigwa Ubasa, hawile baho hamonga na hewo viyezile Yesu.

²⁵ Wanahina wayage wamulongela, “Tumona Mnde-wa!” Na heyo kawalongela, “Niye kamba siziwene mmikono yake zinghovu za misumali, na kugela kidole changu ihanhu haimisumali, na kugela mkono wangu muna ulubavu lwake, niye sitogole ngʼo.”

²⁶ Siku jekanane, wanahina wake vuwakalile mumo mngʼanda kabili, na Tomaso hamonga na hewo, keza Yesu, na nyivi zihindigwa, kema hagatigati zugaga kalonga, “Tindiwalo diwe kumwenu!”

²⁷ Yomala kamulongela Tomaso, “Gala hano kidole chako uilole mikono yangu; ugale na mkono wako, wingize mulubavu lwangu, kahi sikuuwe na kinghwaso komu uwe mwene kutogola!”

²⁸ Tomaso kedika kamulongela, “Mndewa wangu na Mulungu wangu!”

²⁹ Yesu kamulongela, “Gweye kutogola kilumbo vuumbwene; wamota waja hawalolile watogola.”

³⁰ Avo kukala vinzonza viyagwe bwando, Yesu viyasanghane hakihanga cha iwanahina, vilekigwe kwandikwa mkitabu kino.

³¹ Bali zino zandikigwa giladi mtogole kamba Yesu yuyo Kristo Mwanage Mulungu, na kwa kumtogola muwe na upile ulawile mtwaga jake.