Yohana 2 - Lagano da Isambi

Yesu kaimoteza halusi hiko Kana

¹ Na siku jekadatu kukala na halusi hiko Kana, kiwambo cha Galilea, na mamo wake Yesu kakala baho.

² Yesu na heyo kakala yagonekwe kwihalusi hamonga na wanahina wake.

³ Hata ugimbi vumalile, mamaake Yesu kamulongela, “Wabule ugimbi.”

⁴ Yesu kamulongela, “Mamo, tuna mzengwe gani niye na gweye? Isaa yangu hainavika.”

⁵ Mamo wake kawalongela iwasongolo, “Jojose jonda yamulongeleni ditendeni!”

⁶ Baho hakalaga na minongo sita ya mibwe, ikigwa hiko kwa luto lwa Wayuda kwa kunawa, kila dimonga jopata kamba ngelezo mbili bule ndatu.

⁷ Yesu kawalongela, “Memezeni mazi iminongo!” Womana kwimemeza swadu hakilomo.

⁸ Kawalongela, “Deheni mumgalile imkulu wa ulusona!”

⁹ Wamugalila. Na heyo imkulu wa ulusona viyagalanzile gaja gamazi gagalulwe ugimbi, wala hajuwile kuulawile, bali wasongolo wavimanya waja wadehile gaja gamazi, heyo imkulu wa ulusona kamkema ibwana halusi.

¹⁰ Kamulongela, “Munhu chanduso kalavaga ugimbi unogile, kileka wanhu wahamala kungʼwa nghani, baho vonda uugale uja ugwaduke; gweye kwika ugimbi unogile mpaka vino.”

¹¹ Mwidu hiwo wa nhuko Yesu kautendela hiko Kana ya Galilea, kaibwililisa iyenzi yake, wanahina wake wamtogola.

Yesu kadingʼaza Hekalu; kilaga cha Hekalu da sambi

¹² Imala baho Yesu kahumuluka kikomo Kapernaumu, heyo na mamo wake na wandugu zake na wanahina wake, wakala hiko mazuwa si bwando.

¹³ Na Pasaka, sikunghulu ya Wayuda, ikala behi, na Yesu kachola Yerusalemu.

¹⁴ Kahona haja ha Dihekalu (Dingʼanda ja Ukupulila) wanhu wakalile wokiguliza ngʼombe, nghondolo na nziwa, na wasosokanya zimhiya wakalile.

¹⁵ Kabota kibongho cha luzabi, kawalava wose muna Dihekalu, na iwanghondolo na iwangʼombe, kazikutula mhiya za wasosokanya-mali, kaihindula mibao yawo. Kawalongela waja wakalile wokiguliza iwanziwa, “Wasegezeni wano, sikumwitende Ngʼanda ya Tataangu kamba ngʼanda ya gulilo!”

¹⁷ Wanahina wake wakumbuka malonga gandikigwe, “Migongo ya Ngʼanda yako yondiya.”

¹⁸ Baho Wayuda wamwidika wolonga, “Kilolomboto kilihi chutulagile kileka utenda higo?”

¹⁹ Yesu kedika kawalongela, “Dituleni hekalu dino, na niye kwa muda wa siku ndatu nodi-nula.”

²⁰ Wayuda walonga, “Hekalu dino dizengigwe milongo minne na sita, agweye kodinula kwa muda wa siku ndatu?”

²¹ Kahi heyo kalonga kiloto cha hekalu ja mtufi wake.

²² Ako kuyazukile muna ikifo, wanahina wake wakumbukila kumbe kalonga vino, nawo waditogola dija jandiko na dija dilonga diyalongile Yesu.

²³ Aluja luyakalile Yerusalemu ha isikunghulu ya Pasaka, wanhu bwando waditogola tagwa jake vuwawene nhuko zake ziyatendile.

²⁴ Maza Yesu havumile kwigondanya nawo, chanduso mwenyecho kawatanga wose. Na hasulukile kulagusilwa na munhu yamsindile mbuli za munhu, kilumbo mwenyecho kagatanga gali mgati mmwawo.