Yohana 19 - Lagano da Isambi

Muloleni munhu yuno

¹ Baho Pilato kamsola Yesu, kamulanha vibongho.

² Na asikali wabota mulufia wa miba na kumwingiza mditwi, wamvaza nguwo da nzambalau.

³ Imala wamgendela walonga, “Hongelaga Mndewa wa Wayuda!” na kumtowa makofi.

⁴ Na Pilato viyalawile kunze viyagwe, kawalongela, “Munhu yuno nomgala kunze kumwenu, giladi mvitange kamba niye kumwake sichona kinghwaso chochose.”

⁵ Baho Yesu hayalawile kunze, na heyo kavala uja umulufia wa miba na dija diguwo ja nzambalau, na Pilato kawalongela, “Muloleni munhu yuno!”

⁶ Baho Watambika Wakulu na watumigwa wao vuwamuwene, wadunhula mizangi walonga, “Mkome! Mkome!” Pilato kawalongela, “Msoleni mwemwe mkamkome, kilumbo niye sichona kinghwaso kumwake.”

⁷ Wayuda wamwidika, “Tweye tunayo mbila, na kwa mbila hiyo imwandama yafe, kilumbo kaitenda kamba Mwana wa Mulungu.”

Ukalangama uyenghigwe Pilato

⁸ Pilato viyahulike longa dijo, kabanza ukudumba.

⁹ Kengila kabili mngʼanda ya ikitala, kamulongela Yesu, “Gweye kulawa kulihi?” Bali Yesu hamwidike mbuli yoyose.

¹⁰ Pilato kamulongela, “Hulonga na niye? Huvitangile kamba ninawo ukalangama wa kukudohola, kabili ninawo ukalangama wa kukukoma?”

¹¹ Yesu kamwidika, “Gweye hisambi uwe na ukalangama wowose kumwangu, kamba hiunghigwe kulawa uchana; avo yuja yangelile mmikono yako kana tozo kulu nghani.”

¹² Na ilawile iho Pilato kazahila vya kumfungula; bali Wayuda watula bwato walonga, “Uhamfungula yuno, gweye huli mbwiga wa Mtawala, Kaisari; kilumbo munhu yoyose yokiitenda mndewa, kamfukulila Kaisari.”

Pilato hasakafu ya Gabatha

¹³ Pilato viyahulike mbuli hiyo, kamgala Yesu kunze; na mwenyecho kakala hasi hakigoda cha ikitala, ihanhu hokemigwa Sakafu ya Mabwe, ngalulo yake mkiebrania Gabata.

¹⁴ Na ikati hiyo ikala ibetigwa ipasaka, mkipigiti cha saa sita; kawalongela Wayuda, “Loleni Mndewa wenu!”

¹⁵ Komu wawo walava kibwato, “Msegeze! Msegeze (Mkome)!” Pilato kawalongela, “Che, nimkome mndewa wenu?” Watambika Wakulu wedika, “Tweye twabule mndewa komu Mtawala, Kaisari.”

¹⁶ Baho Pilato kamulava, kawengha yakomigwe.

Golgota; utango wa INRI; nguwo za Yesu

¹⁷ Na hewo wambokela Yesu; kalawa kuno yadisolile biki jake uhadi ihanhu hokemigwa Zege da Pala, ngalulo yake mkiebrania Golgota.

¹⁸ Wamana kumuwamba mdibiki, na hamonga na heyo wayagwe wabili, yumwe kuno na yumwe kuno na Yesu hagatigati.

¹⁹ Na heyo Pilato kandika utango, kawika uchana haumsalaba, wandikigwa, “Yesu Mnazareti Mndewa wa Wayuda.”

²⁰ Mwandiko hiwo usomigwa na Wayuda bwando, kilumbo ihanhu haja hawamkomele Yesu, hakala behi na diwambo, nawo wandikigwa kiebrania, kiroma na kigriki.

²¹ Watambika Wakulu wa Wayuda wamulongela Pilato, “Sikuwandike, mndewa wa Wayuda, komu avino kamba yuja kalonga, niye nene mndewa wa Wayuda.”

²² Pilato kedika, “Ganimalile kwandika, nigandika.”

²³ Na waja asikali vuwamalile kumuwamba Yesu mdibiki, wazisola nguwo zake, wazilundiza mabugulu mane, kila asikali bugulu jake na nghanju nayo; bali inghanju haisonigwe, ikala ilukigwe yose du, kusongela uchana.

²⁴ Wailongela, “Sukutuidege, komu tuitendele kibafuti yonda yapate, iyo mhome yake.” Giladi divikizwe jandiko dija, “Wazigola nguwo zangu, na mfuliya wangu wautenda kibafuti.” Avo watendile waja asikali.

Mamo wa Yesu; nghombolo iziga

²⁵ Haja hana umsalaba wa Yesu wakala wemile mama wake, na lumbu ja mama wake, Maria wa Klopa, na Maria Magdalena.

²⁶ Yesu viyamonile mama wake na yuja imwanahina iyanogele, kema habehibehi, kamulongela mama wake, “Mamo, mulole mwanage!”

²⁷ Imala baho kamulongela yuja imwanahina, “Mulole mama wako!” Na lulawile haja imwanahina yuja kamsola kungʼanda yake.

²⁸ Imala baho Yesu kuno yovitanga kamba gose gamambukizwa, giladi jandiko divikizwe, kalonga, “Nokona nghilu.”

²⁹ Hakala baho kiya kimemile siki; basi waigela sifongo, imemile siki, uchana mulumango lwa hisopo, wamgalila hamulomo.

³⁰ Yesu viyamalile kufonza ija isiki kalonga, “Iziga!” Kenamila iditwi kuihongeza loho yake.

Lubavu lwa Yesu luhomwa

³¹ Avino Wayuda kwa vija vuwesasala siku ja ukuhumula, walema mitufi ikale uchana mmibiki, kilumbo sabato ija ikala nghulu; wampula Pilato, migulu yao ibenigwe, giladi wasegezwe.

³² Asikali wachola wambena imigulu yuja waichanduso na wekabili yawambigwe hamonga na heyo.

³³ Vuwamwizile Yesu, wamona kadanganika kesha, hawambenile imigulu.

³⁴ Komu asikali imonga kamuhoma mulubavu na mtwango, na mhunde ulawa mulopa na mazi.

³⁵ Na heyo yaviwene kavisindila, na usindi wake uwo wa ihoko, na heyo kavimanya kamba kolonga ihoko, giladi mweye mtogole.

³⁶ Na higo gagalamka giladi jandiko dija divikizwe, “Haduhu zege jake jonda dituligwe.”

³⁷ Kabili jandiko diyagwe dilonga, “Womulola yuja iwahomile.”

Yosefu wa Arimatia viyamzikile Yesu

³⁸ Imala baho Yosefu wa Arimatia, na heyo mwanahina wa Yesu, komu kwa ubadagi kwa kuwadumba Wayuda, kampula Pilato lwamu lwa kwinghigwa umtufi wa Yesu; na Pilato viyamulekele, kachola kausegeza mtufi wake.

³⁹ Keza na Nikodemo, yuja yamgendele ikilo haja ichanduso, kagala matibulizo ga manemane na udi, ivika ratili miya.

⁴⁰ Wausola mtufi wa Yesu, wauvaza sanda ya kitani hamonga na gaja gamavuta, kamba viluli luto lwa Wayuda vuwazikaga.

⁴¹ Na behi na ihanhu hawamkomele hakala na kitalu, na muja muna ikitalu mna kabuli ja isambi, hanageligwa munhu yoyose mgati.

⁴² Avo kwa mzoko wa kwisasala kwa Wayuda, na kabuli dija jahabehi, wamwika Yesu hiko.