Yohana 18 - Lagano da Isambi

Yesu kagogigwa habugano ja Getsemane

¹ Yomala Yesu kalawa hamonga na wanahina wake kuchola umwambu wa kizanda cha Kedroni; hakala baho bugano, kengila heyo na wanahina wake.

² Na Yuda yuja yamuhimbile kahatanga ihanhu haja, kilumbo Yesu kakala yochola hiko miyanza bwando hamonga na wanahina wake.

³ Avo Yuda viyamalile kubokela didale ja asikali na iwasongolo walawile kwa iwakulu wa nhambiko na Mafariseo, kachola na heyo hiko na vimuli na mizele.

⁴ Na Yesu kagamanya gose gonda gampate, kalawilila kawalongela, “Momzahila yalihi?”

⁵ Wamwidika, “Yesu Mnazareti.” Yesu kawalongela, “Iyo nene.” Ija Yuda mwene kumulava kema wima hamonga na hewo.

⁶ Yesu viyawalongele, “Iyo nene,” wabwela kuchugu, wagwa hasi.

⁷ Na heyo kawauza viyagwe, “Momzahila yalihi?”

⁸ Walonga, “Yesu Mnazareti.” Yesu kawedika yolonga, “Nimulongelani, iyo nene; ihawa monizahila niye, walekeni wano wachole!”

⁹ Giladi divikizwe dija dilonga diyalongile, “Waja wauninghile simwagize hata imonga wao.”

¹⁰ Bali Simoni Petro kakala na sime, kaisomola na kumsuna mtumigwa wa Mtambika Mkulu, kamkanha digwiti ja ukulume; na yuja imtumwa twaga jake Malko.

¹¹ Yesu kamulongela Petro, “Bweza sime yako mulupata lwake; che, kikonha kiyaninghile Tata, konda nileke kukingʼwela?”

Petro kawadumba wanhu, kambela Yesu

¹² Waja asikali na mkulu wao na watumigwa wa Wayuda wamgoga Yesu, wamdaza nzabi.

¹³ Ilawa baho wamgalila Anasi, kwa mzoko kakala mkwe yake Kayafa, yuja yakalile Mtambika Mkulu mwaka uja.

¹⁴ Na heyo Kayafa iyo yuja yawenghile Wayuda uja msagu, kamba vinoga munhu imonga yafe kwa kilumbo cha lukolo.

¹⁵ Wakala Petro na mwanahina iyagwe womsondelela Yesu; na hiyo imwanahina kakala yamanyike na Mtambika Mkulu, kengila hamonga na Yesu halukumbi lwa Mtambika Mkulu.

¹⁶ Bali Petro kema kunze hamulango; baho imwanahina iyagwe yamanyike na Mtambika Mkulu, kalawa kalonga na msepa mlango, kamgala Petro mgati.

¹⁷ Yuja pinga msepa mlango kamulongela Petro, “Na gweye che, huli mwanahina imonga wa imunhu yuno?” Na heyo kalonga, “Si nene.”

¹⁸ Na waja wasongolo na nyakadala wakala wemile, wabwinha moto wa mingheya, kilumbo kukala na beho; wakala wokota moto, na Petro na heyo kakala baho hamonga na hewo yokota moto.

Yesu hakitala cha mtambika mkulu

¹⁹ Na heyo mtambika mkulu kamuuza Yesu mbuli za wanahina wake na mbuli za malangulizo gake.

²⁰ Yesu kamwidika, “Niye nonga na ulumwengu kimwagaiya; mazuwa gose nilangukiza mzingʼanda za kupulila na mdihekalu haja vuwamemaga Wayuda wose, wala silongile mbuli kwa ubadagi.

²¹ Vilihi vuniuza? wauze waja wahulike viniwalongele; hewo wagamanya gaulongile.”

²² Viyalongile higo, mtumwa imonga yemile habehi yake, kamtowa Yesu kofi yolonga, “Komwidika hivo Mtambika Mkulu?”

²³ Yesu kamwidika, “Kamba nonga vihile, sindila gaja gehile; bali nihalonga vinogile, konhowela choni?”

²⁴ Basi Anasi kamgala yadazigwe nzabi vivo kwa Kayafa, Mtambika Mkulu.

²⁵ Na Simoni Petro kakala yemile yokota moto; baho wamulongela, “Che, agweye nagwe huli imonga wa wanahina wake?” Na heyo kabela yolonga, “Si nene.”

²⁶ Mtumwa imonga wa Mtambika Mkulu, na heyo lukolo lumwe na yuja yakanhigwe digwiti na Petro, kalonga, “Che, niye sikonile gweye kuna dibugano hamonga na heyo?”

²⁷ Petro kabela viyagwe, na mhunde nzogolo keka.

Yesu habehi ya Luwali Pilato

²⁸ Imala baho wamsola Yesu kulawa kwa Kayafa, wamvikiza mngʼanda ya kitala, na avo ikala imitondo; komu wawo wenyego hawengile mngʼanda ya kitala, sikuwambule mwiko, giladi waije sikunghulu ya Pasaka. Pilato kawalawila kunze kalonga, “Nhaguso zilihi zimgambile imunhu yuno?”

³⁰ Wamwidika wolonga, “Kamba yuno hatendile gehile, hisambi tumgale kumwako.”

³¹ Pilato kawalongela, “Msoleni mwemwe, mkamlamule kwa ija Nzuma yenu!” Wayuda wamulongela, “Tweye twabule lwamu lwa kukoma munhu.”

³² Giladi divikizwe dija dilonga diyalongile Yesu, yolagila kamba kifo kilihi chonda yafe.

Yesu kausindila undewa wake

³³ Baho Pilato kengila kabili mdingʼanda ja ikitala, kamkema Yesu kamulongela, “Che, gweye gwegwe Mndewa wa Wayuda?”

³⁴ Yesu kamwidika, “Gano goulonga golawa mgati mmwako, ama wanhu yungwa wakulongele mbuli yangu?”

³⁵ Pilato kedika, “Aka, niye na Muyuda? lukolo lwako na Watambika Wakulu wakugalile kumwangu; kubananga choni gweye?”

³⁶ Yesu kalonga, “Undewa wangu hauli wa ulumwengu uno; kamba undewa wangu uwile wa ulumwengu uno, watumigwa zangu wahangombeleze, isambi ngeligwe mmikono ya Wayuda; bali undewa wangu hauli hano.”

³⁷ Pilato kamulongela, “Hivo gweye kwa mndewa?” Yesu kedika, “Ona, gweye kulonga, niye na mndewa; ndeligwe kilumbo cha gano, kileka nizile mulumwengu, giladi niisindile ihoko, ayo yali wa ihoko kodihulika dizwi jangu.”

³⁸ Pilato kamulongela, “Ihoko iyo ilihi?” Yomala kawalawila Wayuda viyagwe, kawalongela, “Niye sitatile kihile chochose kumwake.

Baraba kadoholigwa

³⁹ Bali kumwenu kuwaga luto, niye kuwadoholela munhu imonga muna ikilingalinga cha Pasaka; ayo molonda niwafungulile mndewa wa Wayuda?”

⁴⁰ Wadunhula bwato kabili walonga, “Si yuyo, bali Baraba!” Na yuja Baraba kakala mbokonyo.