Yohana 17 - Lagano da Isambi

Mhulilo ya Mtambika wetu mkulu

¹ Malonga higo kagalonga Yesu, kenula meso gake yolola kuulanga, kalonga, “Tata, ikipigiti kivika, mtunile Mwanago, giladi Mwanago na heyo yakutunile gweye!

² Kamba vija vumgwelele ukalangama kwa wose wene zinghuli, giladi wose waja waumgwelele, yawenghe ugima wa digunge.

³ Na ugima wa digunge uwo uno, wakutange gweye Mulungu wa hakwe wa ikweli, na Yesu Kristo yutumile.

⁴ Niye nikutunila mulumwengu; niimambukiza kazi ija yungwelele niisanghane.

⁵ Na vino Tata, unhunile niye hamonga na gweye kwa nhunilo zija zinili nazo, ihali tanhu ulumwengu haunagesigwa.

⁶ Twaga jako niwabwililisila wanhu waja waungwelele mulumwengu; wakala wako, kungwelela niye, na mbuli yako waigoga.

⁷ Vino wavitanga kamba gose gaungwelele galawa kumwako.

⁸ Avo malonga gauninghile niye, niwengha wawo; na hewo wagabokela, watanga kisigi kamba ndawa kumwako, wotogola kamba gweye gwegwe unhumile.

Yesu viyotupulila tungʼale mwihoko

⁹ Hiwo nowapulila; siupulila ulumwengu, komu waja wauninghile, kilumbo awo iwo wako,

¹⁰ Na vyose ivyangu ivo vyako, na ivyako ivo vyangu, na niye nhunilwa mgati mmwawo.

¹¹ Avo niye nokwiza kumwako; kabili namduhu mulumwengu, bali wano wabaha haulumwengu; Tata Ungʼalile, wemilize wano kwa tagwa jako diuninghile, giladi wegondanye kamba tweye vituli hamwe.

¹² Vinghalile baho hamonga na hewo, niwemiliza kwa tagwa jako diuninghile, niwateganya; kahi kuduhu imonga wao yagile komu yuyuja imwana wa ikibi, giladi jandiko divikizwe.

¹³ Na vino nokwiza kumwako, na gano nogalonga mulumwengu, giladi wakale na ndenghelelo yangu, na ivikizwe mgati mmwao.

¹⁴ Niye niwengha ndagizi zako, na ulumwengu uwehila, kilumbo hewo si wa ulumwengu, kamba niye vinili si wa ulumwengu.

¹⁵ Niye sipula, uwalave mulumwengu aka, komu uwemilize na yuja Imbananzi.

¹⁶ Hewo si wa ulumwengu, kamba niye vinili si wa ulumwengu.

¹⁷ Uwasunhe kwa ija ihoko; mbuli yako iyo ihoko.

¹⁸ Kamba vija vundagize mulumwengu, na niye vivo nowalagiza mulumwengu.

¹⁹ Avo niye nokilava ningʼale kilumbo chao, giladi na wawo wangʼale mwihoko, wagalamke wako.

Yesu viyotupulila wakristo wawe hamwe

²⁰ Vyemela si hewo wayeka wonipulila, komu na waja wonda wanhogole kwa kilumbo cha mbuli yao.

²¹ Giladi waigoge hamonga kamba gweye Tata vuuli mgati mmwangu, na niye mgati mmwako, na hiwo vivo wawe mgati mmwetu, giladi ulumwengu utogole kamba gweye gwegwe unhumile.

²² Na nhunilo zija ziungwelele niye, niwengha na hewo, giladi wawe hamwe kamba tweye vituli hamwe.

²³ Niye mgati mmwao, na gweye mgati mmwangu, giladi wenele hamonga muna ukungulufu giladi ulumwengu uvimanye kamba gweye unhumile na kuwanogela kamba vunogele niye.

²⁴ Tata, hiwo wauninghile nolonda wawe hamonga na niye hosehose hanili, kwiza wayone nhunizo yangu ija uuninghile, kwa mzoko kuninogela ihali tanhu ulumwengu haunagesigwa.

²⁵ Tata mwene ihoko, ulumwengu haukutangile, bali niye nikutanga, na hiwo wavitanga kamba gwegwe unhumile.

²⁶ Na niye niwalongela twaga jako, kabili nowagongʼondeza dija, giladi unogelwa uja uunogele niye, uwe mgati mmwao na niye nghale mmwao.”