Yohana 16 - Lagano da Isambi

¹ Malonga higo nimulongelani, kwiza sekemwize kwihilwa.

² Mobaguligwa muna zingʼanda za Mulungu; amba vivo saa yokwiza, munhu yomkomani vonda yagese, kamulavila Mulungu nhambiko.

³ Na higo womtendelani kwa mzoko hawamtangile Tata hebu niye.

⁴ Komu niwalongelani higo giladi, kipigiti hicho kihavika, mgamanye kamba niye niwalongela. Ahaja ichanduso gano siwalongeleni, kilumbo nghala namwe hamonga.

⁵ Baye vino nochola kumwake Heyo Yangalile; wala haduhu imonga wenu wa kuniuza, Kochola kwahi?

⁶ Avo kwa kilumbo niwalongela higo, na nyululuko zimema mmoyo mmwenu.

⁷ Bali nomulongelani ya ihoko, vonoga kumwenu, niye nhyole; kilumbo kamba sicholile, na heyo Mataza honda yeze kumwenu; komu nihachola, nomgala kumwenu.

⁸ Ayo yaheza kouhuguza ulumwengu kwa ikivugulo cha zambi na ihoko na ikitala.

⁹ Kwa kivugulo cha zambi, kilumbo hawanhogola niye.

¹⁰ Kwa kivugulo cha ihoko, kilumbo nochola kwa Tata, avo honda mmbone kabili.

¹¹ Kwa kivugulo cha kitala, kilumbo yuja imkulu wa ulumwengu uno kamala kutaguswa.

¹² Vyemela nihali nago bwando ga kuwalongelani, bali nihagalonga vino, muhalemelwe.

¹³ Komu ayo vonda yeze, iyo Loho wa ikweli kowalongoza na kuwengiza mwikweli yose, kwa mzoko honda yalonge kwa msagu wake mwenyecho, bali kowalongela gonda yahulike na kupeta vigweka vonda vize.

¹⁴ Heyo konhunila niye, kilumbo kogasola gali mmwangu na kuwengha kivugulo.

¹⁵ Na gose gayali nago Tata, gangu; kileka nongile kamba, kosola igangu na kuwalavilani kivugulo.

Susuwalo jetu dogaluka ndenghelelo

¹⁶ Kihali kipigiti kidodo na mweye honda mmbone; na kwiza kipigiti kidodo, na mweye mombona.

¹⁷ Aho wayagwe wa iwanahina wake wailongela, “Mbuli gani ino iyolonga, Kihali kipigiti kidodo na mweye honda mmbone, na kwiza kipigiti kidodo na mweye mombona; na vija viyalongile, kamba nochola kwa Tata?

¹⁸ Walonga, Mbuli gani ino iyolonga, isigala kipigiti kidodo; hatutanga diyolonga.”

¹⁹ Yesu kavitanga kamba wolonda kumuuza, kawalongela, “Vija vinongile, Kisigala kipigiti kidodo na mweye honda mmbone, na kwiza kipigiti kidodo na mweye mombona, dijo hijo mkalile mkiuzagiza?

²⁰ Ihoko ihoko nomulongelani, mweye molila na kwiyalala, komu ulumwengu wokimozamoza, na mweye msusuwala; bali susuwalo jenu dogaluka ndenghelelo.

²¹ Mtwanzi hoyolela, kana msusuwalo, kilumbo kipigiti chake kivika; komu yahamala kumulela mwana, haigelegeza kabili ija mgaduko, kilumbo cha ndenghelelo za kuleligwa munhu mulumwengu.

²² Na mweye vino vivo msusuwala; komu niye nomonani kabili, na miyoyo yenu kwiza yodenghelela, na ndenghelelo yenu haduhu wa kuwasegezela.

²³ Vyemela siku hiyo honda mniuze mbuli yoyose; ihoko nomulongelani, muhampula Tata mbuli yoyose komwinghani kwa twaga jangu.

²⁴ Na dilelo hamnampula kinhu kwa twaga jangu; puleni, na mweye mopata, ndenghelelo yenu iwe ndundumba.

Tupule mditagwa ja Yesu yaihumile imbago

²⁵ Higo nigalonga na mweye kwa ngubikilo, komu kidami chokwiza chonda nonge namwe kimwagaiya kivugulo cha Tata, kabili si kwa ngubikilo.

²⁶ Isiku dija mopula kwa twaga jangu, wala siwalongelani kamba niye nowapulilani kwa Tata.

²⁷ Kwa mzoko Tata mwenyecho kawanogelani, kilumbo mweye mnogela niye na kutogola kamba ndawa kwa Tata.

²⁸ Ndawa kwa Tata, niza hano haulumwengu, kabili nouleka ulumwengu, nochola kwa Tata.”

²⁹ Wanahina wake walonga, “Lola vino kolonga utobola, kahi hulonga kwa ngubikilo yoyose.

³⁰ Avino tuvimanya kamba gweye kugatanga magweka gose, wala hulonda munhu, yakuuze; avo tutogola kamba gweye kulawa kwa Mulungu.”

³¹ Yesu kawedika, “Che, motogola vino?

³² Loleni saa yokwiza na vino ivika, vyemela mopwililika imonga imonga na kumwake, monileka nene nili yeka; bali niye sili yeka, kilumbo Tata kahamonga na niye.

³³ Na higo nimulongelani mkale na mbeho zilawile kumwangu; mulumwengu mnawo mgaduko, komu funyeni umoyo; niye niuhuma ulumwengu.”