Yohana 15 - Lagano da Isambi

Mtongoni na matambi gake

¹ Niye nene mtongoni wa ikweli, na Tata wangu iyo mnghulima.

² Tambi dili mmwangu kamba hadilela, kodisegeza; na tambi dilela kodidahulila, giladi diyohe kulela.

³ Mweye mziga kungʼala kwa mzoko wa dija dilonga diniwalongeleni.

⁴ Kaleni mgati mmwangu, na niye mmwemu; kamba vija tambi hadidaha kulela dili yeka, kamba hadikalile mumtongoni, igambile vivo na mweye, kamba hamkalile mmwangu.

⁵ Niye namtongoni, amweye mwamatambi; yonda yakale mgati mmwangu na niye mgati mmwake, hiyo kolela nghani, kilumbo ihawa niye haduhu, mweye hamdaha kutenda mbuli yoyose.

⁶ Munhu kamba hakalile mgati mmwangu, kokwasigwa kunze kamba tambi, kwiza donyala, na wanhu wodizola na kujasa hamoto, dosakala.

⁷ Mweye muhakala mgati mmwangu, na malonga gangu gahakala mgati mmwemu, puleni dimulonda jojose, na mweye motendelwa.

⁸ Tata wangu kotunizwa kwa vija vumumpula, giladi mulele mujo nghani, na mogalamka wanahina wangu.

Ndengha ya kumnogela Yesu; twa mbwiga za Yesu

⁹ Kamba vija Tata viyanogele niye, na niye viniwanogeleni mweye, kaleni muna unogelo wangu!

¹⁰ Muhazigoga ndagizi zangu, mokala muunogelo wangu, kamba vija niye vinizigogile ndagizi za Tata wangu na kukala muunogelo wake.

¹¹ Higo nimulongelani giladi ndenghelelo yangu iwe mgati mmwemu, na ndenghelelo yenu ivikizwe.

¹² Ndagizi yangu iyo ino, Mwinogele mweye viniwanogeleni!

¹³ Haduhu mwene unogelo bwando kubanza uno, munhu kulava ugima wake kwa kilumbo cha mbwiga zake.

¹⁴ Mweye mgalamka mbwiga zangu, muhatenda gonimulagizani.

¹⁵ Siwakemani kabili watumwa, kwa mzoko mtumwa hadimanya diyotenda bwana wake, bali mweye niwakemani mbwiga, kilumbo gose ganihulike kwa Tata wangu, niwapetelani.

¹⁶ Mweye hamnisagule niye, komu niye niwasaguleni na kumwikani mchole, mkalele mujo, na mujo wenu kwiza ukale, giladi jojose jonda mumpule Tata kwa twaga jangu, yamwingheni.

¹⁷ Gano nomulagizani mweye, giladi mwinogele.

Wihilo wa imbago

¹⁸ Vyemela ulumwengu uhawehila, mvimanya kamba uni-hila niye haichanduso kubanza mweye.

¹⁹ Kamba muwile wa ulumwengu, ulumwengu uhawanogele vumuli wake; komu mweye si wa ulumwengu, bali niwasagulani mulumwengu, na kwa kilusu hicho ulumwengu uwehila.

²⁰ Gelegezeni uja ulonzi unimlongeleni, Mtumigwa si mkulu kubanza bwana wake; ihawa wangadusa niye, wowagadusani na mweye, na kamba wadigoga longa jangu, wodigoga na ijenu.

²¹ Komu gano gose womtendelani kilumbo cha twaga jangu, kwa mzoko hawamtangile Heyo Yangalile.

²² Kamba sizile na kulonga nawo, isambi wawe na zambi; bali kwa vino wabule ulekelo wa zambi zao.

²³ Ayo yonihila niye, kamwihila na Tata wangu.

²⁴ Kamba sitendile kazi kumwao hazitendagwa na munhu iyagwe, isambi wawe na zambi; avino sambi wazona, na kutwihila niye na Tata wangu.

²⁵ Bali divikizwe dija dilonga jandikigwe muna Inzuma yao, Wanihila hali bule kilumbo.

Loho Mataza vonda yasanghane

²⁶ Yaheza hiyo Mataza yonda nimgalileni kulawa kwa Tata, yuyo Loho Mulonga Ikweli yalawile kwa Tata, heyo konisindila.

²⁷ Na mweye vivo mosindila, kilumbo kulawa chanduso mkala hamonga na niye.