Yohana 14 - Lagano da Isambi

Ukazi bwando kumwake Tata: tumona Tata tuhawa na Yesu

¹ Sukumdungwedungwe mmoyo mmwenu; momtogola Mulungu, nhogoleni na niye!

² Mngʼanda ya Tata wangu muna ukazi bwando; kamba si vivo, nihamulongeleni, kilumbo nogenda kuwatunduwilila ihanhu mkakale.

³ Na nihachola kutunduwila ihanhu, nobwela kabili nimgomeleni kumwangu, giladi hanili niye, na mweye muwe baho.

⁴ Na niye kunichola, nzila moitanga.”

⁵ Tomaso kamulongela, “Mndewa, tweye hatukutangile kuuchola, avo toitangaze inzila?”

⁶ Yesu kawalongela, “Niye nene nzila na ihoko na upile; munhu heza kwa Tata komu kilumbo changu.

⁷ Kamba mnhangile niye, muhamtangile na Tata; kulawa lelo mumtanga, na avo mumona.”

⁸ Filipo kamulongela, “Mndewa, utulagile Tata, vivo tulonda.”

⁹ Yesu kamulongela, “Niye nghala hamonga na mweye mazuwa gano gose, na gweye Filipo hunhangile? yambonile niye, kamona na Tata; avo gweye kolongaze, Utulagile Tata?

¹⁰ Hutogole kamba niye namgati mwa Tata, na Tata kamgati mmwangu? ganiwalongele sigalonga kwa msagu wangu, komu Tata yokala mgati mmwangu kosanghana kazi zake.

¹¹ Nhogoleni kamba niye namgati mwa Tata, na Tata kamgati mmwangu; au kamba hamnhogole niye, togoleni kwa kilumbo cha zija zikazi zenyego!

Loho Mataza wa ikweli yokala mgati mwetu

¹² Ihoko ihoko nomulongelani, yonhogola niye, na kazi zinitenda niye, na heyo kwiza kozitenda, vyemela kozitenda nghulu kubanza hizo, kilumbo nochola kwa Tata.

¹³ Mweye muhapula jojose kwa twaga jangu, ajo noditenda, giladi Tata yatunizwe mgati mwa Imwana.

¹⁴ Muhamhula mbuli yoyose kwa twaga jangu, noitenda.

¹⁵ Muhanogela, mozigoga mbila zangu.

¹⁶ Na niye nompula Tata, na Heyo kowenghani Wa kuwatazani, yakale namwe hata digunge.

¹⁷ Yuyo Loho wa ikweli; ulumwengu haudaha kumbokela, kilumbo haumona wala haumtangiie, bali mweye momtanga, kwa mzoko kokala kumwenu, kabili kokuwa mgati mmwenu.

¹⁸ Siwalekani mweye na ukiwa; nokwiza kumwenu.

¹⁹ Kisigala kipigiti kidodo, ulumwengu kabili honda umbone; bali mweye mombona, kilumbo niye nampile, na mweye mokuwa wapile.

²⁰ Isiku dijo mweye motambula kamba niye namgati mwa Tata wangu, na mweye mwamgati mmwangu, na niye mgati mmwenu.

²¹ Ayo yabokele mbila zangu na kuzigoga, hiyo yuyo yanogele; na ayo yanogele konogelwa na Tata wangu, na niye nomnogela na kwilaviliza kumwake.”

²² Yuda, bali si yuja Iskariota, kamulongela, “Mndewa, vikuwaze vuulonda kwilaviliza kumwetu bali si kwa ulumwe-ngu?”

²³ Yesu kedika kamulongela, “Munhu yahanogela, kodigoga longa jangu, na Tata wangu komnogela, na tweye tokwiza kumwake na kukala kumwake.

²⁴ Munhu kamba hanogele, hagoga malonga gangu; na hivo imbuli imuhulika si yangu komu ya Tata Yangalile.

Loho ya nogelo yogela tindiwalo ja Yesu

²⁵ Higo gago nimulongeleni vinghalile kumwenu.

²⁶ Bali Hiyo Yonda Yamtazeni iyo Loho Yangʼalile, na heyo Tata komgala kwa twaga jangu, komulangukizani gose na kuwakumbusa gose ganiwalongeleni.

²⁷ Tindiwalo nomulekelani, na tindiwalo jangu nowengha; viniwengha niye, si vivo kamba ulumwengu vuulava; sukumdungwedungwe mmiyoyo mmwenu wala sukumdumbe!

²⁸ Muhulika vinimlongeleni, Nochola, kabili nokwiza kumwenu; kamba muhaninogele, muhadenghelele kilumbo nochola kwa Tata, kwa mzoko Tata yuyo mkulu kubanza niye.

²⁹ Avo niwalongelani hadinalawilila tanhu, giladi vonda dilawilile kwiza mtogole.

³⁰ Niye silonga namwe malonga bwando kabili; kokwiza imkulu wa ulumwengu uno, na heyo kabule kinhu kumwangu.

³¹ Bali giladi ulumwengu utange kumbe nimnogela Tata, na niye notenda kamba vija Tata viyandagize. Segeleni, tucholeni.