Yohana 13 - Lagano da Isambi

Yesu viyawasunhile wanahina imigulu

¹ Viikalile hainavika siku nghulu ya Pasaka, Yesu mwenyecho kavimanya kamba saa yake ivika ya kulawa muna ulumwengu yachole kwa Tata, na heyo vija viyawanogele wanhu wake wali mulumwengu, kawanogela kuvikila ikidugalo.

² Hata kipigiti cha mandiya ga ikilo, shetani kaziga kumgela Yuda mwanage Simoni Iskariota moyo wa kumuhimbila.

³ Avo Yesu kakala yovimanya kamba Tata kamwingha vyose mmikono yake, viyalawile kwa Mulungu na kuchola kwa Mulungu.

⁴ Kenuka hana gamandiya, keka hamngwazo nguwo zake, kasola kitambala, kezinga mkigudi.

⁵ Imala kagela mazi muna umkungu, kandusa kuwasunha iwanahina wake migulu na kuihangusa na kija kitambala kiyezingile.

⁶ Hivo keza kwa Simoni Petro; ayo kamulongela, “Mndewa, gweye kosunha imigulu niye?”

⁷ Yesu kamwidika yolonga, “Gweye dinitenda, vino huditanga, komu kodimanya cha hamwande.”

⁸ Petro kamulongela, “Gweye honda usunhe migulu yangu ngʼo!” Yesu kamulongela, “Kamba sikusunhile, honda upetwe na niye.”

⁹ Simoni Petro kamulongela, “Mndewa, si migulu yangu iyeka, komu na mikono na iditwi jose!”

¹⁰ Yesu kamulongela, “Munhu yamalile koga, hasulukila koga, isigale kugela nhende, kilumbo kangʼala lukuli lose, na mweye mngʼala, bali si mose.”

¹¹ Kilumbo kamtanga yuja yolonda kumuhonza, kileka yolonga, “si mose mngʼalile.”

Luto lwa sambi dijo nogelo

¹² Viyamalile kuwasunha imigulu na kuzisola nguwo zake, kakala viyagwe kawalongela, “Che, avo mgatanga higo ganimtendeleni?

¹³ Mweye munghemaga Mlangulizi na Mndewa; avo mulongaga goya, kwa mzoko hivo nili.

¹⁴ Basi vihawa niye Mndewa na Mlangulizi niwasunhani imigulu, vilumba na mweye vivo mwisunhe imigulu mwemwe kwa mwemwe.

¹⁵ Niwenghani luto; kamba niye viniwatendeleni, na mweye mtende vivo.

¹⁶ Ihoko ihoko nomulongelani, nyakadala hawaga mkulu kubanza bwana wake hebu mtumigwa kubanza yuja yamgalile.

¹⁷ Muhagatanga higo, mwimota kamba muhagasanghana.

¹⁸ Silonga kivugulo cha mweye mose; niwatanga waja wasagule; komu jandiko divikizwe, Yadile chakuja changu, kaninulila kisiginho chake.

¹⁹ Lulawile vino nomulongelani tanhu haganavika, giladi aho honda gavikile, kwiza mtogole kamba niye iyo nene.

²⁰ Ihoko ihoko nomulongelani, Yonda yambokele munhu yoyose yonda nimgale, kambokela niye; na heyo yombokela niye, kambokela Heyo Yangalile.”

Yesu kambwimwindula Yuda Iskariota mna iwanahina

²¹ Yomala Yesu kadudumka mloho yake, kasindila yolonga, “Ihoko ihoko nomulongelani, imonga wenu konihimbila.”

²² Wanahina wasinhuka, welola kwa kwilola, hawatangile komlonga yalihi.

²³ Kakala imonga muna iwanahina wake yoibandama hamhambaga ya Yesu, ija Yesu kamnogela.

²⁴ Simoni Petro kamfunyiza, kamulongela, “Uza iyo yalihi iyomulonga?”

²⁵ Na heyo yakalile behi hamhambaga ya Yesu, kamuuza, “Mndewa, yuyo yalihi?”

²⁶ Na heyo Yesu kamulongela, “Iyo yonda nimzanhikile ditonge na ku-mwingha.” Kazanhika ditonge na kumgwelela Yuda mwanage Simoni Iskariota.

²⁷ Mhunde viyadile, Mwenembago kamwingila; Yesu kamulongela, “Gauli nago gatende mbwisa!”

²⁸ Waja wakalile hana gamandiya, haduhu yaimanyile ija sosombi ya kumulongela higo.

²⁹ Waja wayagwe wagesa kwa uja mkoba uyagalaga, na Yesu vija viyamulongele, Gula vinhu vitulonda kwa isikunghulu! hebu yawenghe kinhu iwakiwa.

³⁰ Na heyo viyabokele dija ditonge, kahalawa iho dimwe kwa dimwe, na kipigiti kija kikala ikilo.

Ndagizo ya isambi yonda iwahuguze walumwengu

³¹ Viyahalawile Yuda, Yesu kalonga, “Avo Mwana wa Munhu katunilwa, na Mulungu katunizwa kumwake.

³² Na Mulungu nayo komtunila Mwanage kumwake, na avo bwisa komtuniza.

³³ Mweye wana wadodo, kisigala kipigiti kidodo nihali hamonga na mweye; monizahila, na vija viniwalongele Wayuda, Kamba niye kunichola, mweye hamdaha kwiza; vyemelaga na mweye nomulongelani.

³⁴ Nomwinghani mbila iyagwe, Mwinogele! kamba vija viniwanogeleni mweye, na mweye mwinogele vivo.

³⁵ Kileka wanhu wose wovimanya kamba mweye mwa wanahina wangu, muhainogela mwemwe kwa mwemwe.”

Petro kaidundula

³⁶ Simoni Petro kamulongela, “Mndewa, kochola kulihi?” Yesu kamwidika, “Kunichola vino, hudaha kuminza; komu aho hamwande kominza.”

³⁷ Petro kamulongela, “Mndewa, habali niye sidaha kukuwinza vino? Hata niye noulava upile wangu kwa kilumbo chako!”

³⁸ Yesu kamwidika, “He! na gweye koulava upile wako kwa kilumbo changu? ihoko ihoko nokulongela, nzogolo hanakwika, na gweye kombela miyanza midatu.”