Yohana 12 - Lagano da Isambi

Yesu kabakazwa mavuta na Maria

¹ Viikalile siku sita hazinabita kuvikila Sikunghulu ya I Pasaka, Yesu keza Betania hayakalile Lazaro yuja, Yesu yamzusile kulawa mkifo.

² Hiko wamtendela chakuja, na Marta kamtumikila, na Lazaro kakala imonga wao waja wakalile hana gamandiya hamonga na Heyo.

³ Baho Maria kasola ratli ya mavuta ga marhamu ga nardo ganogile nghani, gaguligwe na mhiya bwando, kambakaza Yesu mmigulu, kaihulula imigulu na mvili zake; ngʼanda yose yenela mnungho wa marhamu.

⁴ Baho Yuda Iskariota, imonga wa wanahina wake, kwiza yuyo yonda yamuhonze kalonga,

⁵ “Habali mavuta hagagulizwe kwa dinari mizo midatu, wenghigwe iwakiwa?”

⁶ Kalonga higo si kamba kawonela bazi iwakiwa, aka, komu heyo mbavi, na heyo mgoga mkoba, na vigeligwe mgati kasolaga.

⁷ Yesu kalonga, “Muleke yaike siku ya uzisi wangu! Kwa mzoko iwakiwa mnawo mazuwa gose hamonga na mweye,

⁸ bali niye sili namwe mazuwa gose.”

⁹ Na wanhu bwando mwa Wayuda vuwatangile kamba heyo kahiko, weza si giladi wamone Yesu yeka, komu na Lazaro yuja, Yesu yamzusile kulawa mkifo.

¹⁰ Bali Watambika Wakulu watenda msagu wa kumkoma Lazaro vivija;

¹¹ Kwa mzoko Wayuda bwando waihagula, wamtogola Yesu kilumbo cha Lazaro.

Yesu viyengile Yerusalemu yokwagiza Mndewa

¹² Na siku yaikabili yake wanhu bwando wawinzile isikunghulu, wahulika kamba Yesu kokwiza Yerusalemu.

¹³ Wasola matambi ga mitende, walawa kunze, wachola kumuhingila, walava mdongwe, “Hosiana! Yamotelwe yokwiza kwa tagwa ja Bwana, Mndewa wa Israeli!”

¹⁴ Na heyo Yesu kakala yapatile mwana mhunda, kamkwela kamba vija viyandikigwe,

¹⁵ “Sukuudumbe, biti Sayuni; lola Mndewa wako kokwiza, kakwela mwana mhunda!”

¹⁶ Na magweka higo aho ichanduso wanahina wake hawagatangile, bali Yesu viyatunilwe, baho wakumbukile, kumbe kandikilwa gano na vivo wamtendela.

¹⁷ Na wanhu waja wakalile hamonga na heyo, viyamkemile Lazaro kulawa mdikabuli na kumzusa, wamsindila.

¹⁸ Kwa kilumbo hicho gamadale wachola kumuhingila, kwa vija vuwahulike kamba katenda mzonza mkulu.

¹⁹ Komu Mafariseo walongelela wenyego kwa wenyego, “Movona hamdaha mbuli yoyose; loleni ulumwengu wose womkoleleza kuchugu!”

Wagriki wamuwinzile Yesu, Yesu kabeta kutunilwa na Tata

²⁰ Hakala na Wagriki bwelele mmwanza wao wakwelile kuchola kutambika kuisiku nghulu.

²¹ Awo wamgendela Filipo munhu wa Betisaida ya Galilea, wamuwila walonga, “Mndewa, tweye tolonda kumona Yesu.”

²² Na Filipo kachola kamulongela Andrea, imala baho Andrea na Filipo wamulongela Yesu.

²³ Yesu kawedika kalonga, “Kipigiti kivika, Mwana wa Munhu yatunizwe!

²⁴ Ihoko ihoko nomulongelani, Nzele ya ngano kamba hai-gwile hasi ife, yokala vivo iliyeka; komu ihafa, yolava mlelo bwando.

²⁵ Yoinogela mwenyecho kwiza kokigwasika, bali hiyo yokihila mwenyecho mulumwengu uno, koihonya hata kuugima wa digunge.

²⁶ Munhu yahanhumikila na yaminze, na niye hanili baho, na mtumigwa wangu kokuwa baho; na munhu yahanhumikila niye, Tata komtuniza.

²⁷ Vino loho yangu yigugumka, na niye nongeze? Tata unihonye, niinege kipigiti kino? bali vinivikile saa ino, icho kilumbo cha mgazo. Tata, uditunile twaga jako!”

²⁸ Baho diza dizwi dilawa kuulanga, “Nidituniza, na Niye nodituniza chusa.”

²⁹ Madale ga wanhu wemile wima habehibehi, vuwahulike walonga, “Kukala na kihumo.” Wayagwe walonga, “Malaika yalongile nayo.”

³⁰ Yesu kedika kalonga, “Dizwi hijo hadizile kwa kilumbo changu, komu kwa kilumbo chenu.

³¹ Vino ikitala cha ulumwengu uno chabaha; vino imkulu wa ulumwengu uno kokwasigwa kunze.

³² Na niye nihenuligwa uchana kulawa hasi, nowakwega wose kumwangu.”

³³ Kagalonga higo, kuno yolagusila kamba kifo kilihi chonda yafe.

Muhali na Mlangaza

³⁴ Wayagwe wa mtinghanilo wamwidika, “Tweye tuhulika muna Inzuma kamba Kristo kokala hata digunge; na gweye kolongaze, Mwana wa Munhu imwandama kwinuligwa; yuno Mwana wa Munhu yuyo yalihi?”

³⁵ Yesu kawalongela, “Wenge dabaha hamonga na mweye kwa ikipigiti kidodo tu; muhali na mlangaza, gendeni nao, giladi ziza sekediwahume, kilumbo mwene kuchola na ziza hatanga na kuyochola.

³⁶ Muhali na mlangaza, utamanileni mlangaza hiwo, giladi mgalamke wana wa mulangaza!” Ago kagalonga Yesu, kagenda na zake, kwifisa sekewamone.

Munhu kotaguswa na Longa dija diyahulike

³⁷ Vyemela kakala yotenda vilolomboto bwando, hameso gao, na hewo hawamtogole;

³⁸ giladi divikizwe dija dilonga ja Mtulandagu Yesaya diyalongile, “Mndewa, iyo yalihi yautogole ulonzi wetu, na mkono wa Bwana kagubulilwa yalihi?”

³⁹ Icho ikilumbo wao hawavidahile kutogola, kwa mzoko Yesaya kalonga kabili,

⁴⁰ “Kawatula gameso, kaitenda mizito miyoyo yao, sikuwalole na meso gao au kuvitanga na miyoyo yao, sikuwagoloke ilawabaho niwahonye.”

⁴¹ Ulonzi hiwo kaulonga Yesaya, kilumbo kayona iyenzi yake, kazipeta mbuli zake.

⁴² Viyemela hata mwa iwakulu bwando wamtogole, komu kwa kitando cha Mafariseo hawalongile, sukuwabagulwe muna ingʼanda ya Mulungu.

⁴³ Kilumbo wanogelwa na nhunizo za wanhu kubanza nhunizo za Mulungu.

⁴⁴ Na heyo Yesu kawakomhokela kalonga, “Heyo yonhogola niye, hanhogola niye niyeka, bali na Heyo Yangalile.

⁴⁵ Na heyo yondola niye, komulola Heyo Yangalile.

⁴⁶ Niye niza mulangaza wa mulumwengu, giladi munhu yoyose yonhogola, sekeyakale hadiziza.

⁴⁷ Na munhu yogahulika malonga gangu komu hagagoga, niye simtagusa, kilumbo sizile niutaguse ulumwengu, komu niukombole ulumwengu.

⁴⁸ Yondema niye na kugalema malonga gangu, kanayo wa kumtagusa: mbuli hiyo inongile, iyo yonda imtaguse siku ya ikimambukizo.

⁴⁹ Kilumbo niye silongile kwa giladi yangu mbe, bali Tata yangalile heyo mwenyecho kandagiza gonda niidandaye na kugalonga.

⁵⁰ Na niye nivimanya kamba ndagizo zake uwo ugima wa digunge; bali higo gonikidandaya niye, kamba Tata viyanongele, vivo vinilonga.”