Yohana 11 - Lagano da Isambi

Utamu wa Lazaro hiko Betania; Habali Yesu kabeta kifo cha Lazaro

¹ Kukala na munhu mtamu, Lazaro wa Betania, kiwambo cha Maria na Marta mkulu wake.

² Yuyo Maria yuja yambakaze Yesu gamavuta ganogile na kumuhangusa migulu na mvili zake; na Lazaro lumbu jake kakala mtamu.

³ Waja iwalumbu walagiza usenga kumwake walonga, “Mnde-wa, yuja yunogele mtamu.”

⁴ Na heyo Yesu viyahulike kalonga, “Utamu uno si wa kudanganika, komu wa nhunizo za Mulungu, giladi Mwana wa Mulungu yatunilwe.”

⁵ Na heyo Yesu kamnogela Marta na mdodo wake na Lazaro.

⁶ Basi viyahulike Lazaro mtamu, kazaganya tanhu siku mbili bahaja hayakalile.

⁷ Imala baho kawalongela wanahina wake, “Tubwelele Uyuda!”

⁸ Wanahina wake wamulongela, “Rabi, majuzijuzi Wayuda wakala wolonda kukutowa na mabwe, na gweye kochola kuko kabili?”

⁹ Yesu kalonga, “Che, saa za imisi si longo dimwe na mbili? munhu yahachola imisi, hekwala, kilumbo kowona mulangaza wa ulumwengu uno. Komu yahachola ikilo, kokikwala, kilumbo mulangaza wamduhu mgati mmwake.

¹¹ Yomala kawalongela, “Mbwiga wetu Lazaro kawasa, bali nochola hamulamse.”

¹² Waja iwanahina wamulongela, “Bwana, ihawa kawasa, kwiza kohona.”

¹³ Bali Yesu kakala yalongile kifo chake, na hewo wagiza, kalonga kamba kawasa utulo.

¹⁴ Baho Yesu kawalongela bunubunu,” Lazaro kadanganika.

¹⁵ Na niye vinilekile kuchola kuko, nokimozamoza kilumbo chenu, giladi kwiza mtogole; avo tucholeni kumwake!”

¹⁶ Tomaso yokemigwa Ubasa kawalongela wanahina wayage, “Tucholeni na tweye, giladi tukafe hamonga na heyo!”

Yesu yuyo uzusi wa wafile, na ugima wa idigunge

¹⁷ Yesu viyavikile, kamvika yazikigwe mkabuli dopata siku jaikane.

¹⁸ Na Betania ikala behi na Yerusalemu, halinga uchozi wa maili mbili hivo.

¹⁹ Na Wayuda bwando wakala wezile kwa Marta na Maria, giladi wawahani hamonga kwa mzoko wa ndugu yao.

²⁰ Baho Marta viyahulike kamba Yesu kokwiza, kachola kumuhingila, bali Maria kakala hakaye.

²¹ Marta kamulongela Yesu, “Mndewa, kamba ukalile baha, hisambiyafe lumbu jangu!

²² Hata vino nivitanga, jojose jonda umpule Mulungu, na Mulungu kokwingha.”

²³ Yesu kamulongela, “Ndugu yako kozuka.”

²⁴ Marta kamulongela, “Nivitanga kwiza kozuka ako kuna ukuzuka siku ya ikimambukizo.”

²⁵ Yesu kamulongela, “Niye nene uja uzusi na ugima; yonhogola niye, hata nayadanganike, kokuwa mgima.

²⁶ Na yoyose yu mgima yonhamanila, honda yafe fofofo milongo kwa milongo; che, hivo kugatogola gano?”

²⁷ Kamulongela, “Ona go Bwana, niye nigatogola, kumbe gweye Kristo, Mwanage Mulungu, yuja yokwiza muisi.”

Yesu kadudumka miyanza mibili mloho yake

²⁸ Yomala kachola kamkema mdodo wake Maria hakifiso, kamulongela, “Mlangulizi kabaha, kokukema.”

²⁹ Na heyo viyahulike, kalawa mbwisa, kamgendela.

³⁰ Na Yesu kakala hanavika mgati mkiwambo, komu kakala yahali bahaja hayamuhingile Marta.

³¹ Basi waja Wayuda wakalile baho na Maria mngʼanda, na kumnyamaza, vuwamonile vija viyasegele mbwisa na kuchola, wamkoleleza; womgamba kwali kochola kuna ikabuli yalilile kuko.

³² Maria viyavikile haja hayakalile Yesu na kumona, kagwa hamagulu gake, kamulongela, “Mndewa, kamba ukalile baha, hisambiyafe lumbu jangu!”

³³ Yesu viyamonile yolila, na waja Wayuda welongoze nayo wolila, kadudumka mmoyo, kengilwa chuhila mloho yake.

³⁴ Kalonga, “Mmwika kulihi?” Wamulongela, “Mndewa, izo ulole!”

³⁵ Yesu kalila mahozi.

³⁶ Baho Wayuda walonga, “Loleni amba viyamnogele!”

³⁷ Bali wayagwe walonga, “Che, yuno yakalile yamnanazule gameso yuja mbugumbugu, vimpota kumtenda na yuno yaleke kufa?”

Yesu viyampulile Tata hamagwiti ga iwanhu; Lazaro viyabwelile mgima

³⁸ Yesu kagugumka viyagwe mmoyo, kavika kuna dikabuli, najo dikala hango, na mlango ugubikwa na dibwe.

³⁹ Yesu kalonga, “Disegezeni didibwe!” Marta, lumbu jake yuja yafile, kamulongela, “Mndewa, konungha vino, kilumbo vikimpatile kifo, lelo siku jekane.”

⁴⁰ Yesu kamulongela, “Niye sikulongele, kamba uhatogola, koyona iyenzi ya Mulungu?”

⁴¹ Baho wadisegeza dija dibwe; Yesu kenula meso gake uchana kalonga, “Tata hongelaga, kilumbo kumhulika.

⁴² Na niye nivimanya kamba gweye kumhulikaga mazuwa gose; bali kilumbo cha umtinghano uno wizile, leka nongile higo, giladi watogole Gweye Gwegwe Unhumile.”

⁴³ Yomala kalila na dizwi kulu, “Lazaro izo kuno kunze!”

⁴⁴ Kalawa hanze yuja yafile, kafungigwa sanda mmigulu na mmikono, na kihanga chake kifungigwa kitambala. Yesu kawalongela, “Mdoholeni, mmuleke yachole na zake!”

Zundo da watambika wamkome Yesu

⁴⁵ Imala baho Wayuda bwando muna iwaja wezile kwa Maria na kulola gaja gayatendile, wamtogola Yesu.

⁴⁶ Bali wayagwe wachola kwa Mafariseo, wawapetela gayatendile.

⁴⁷ Mabaho Watambika Wakulu na Mafariseo welundiza, weka zundo walonga, “Totenda choni vino; munhu yuno kotenda vya nhunguka bwando.

⁴⁸ Tuhamuleka vivo, na wanhu wose womtogola, na Waroma wokwiza, wobananga dihekalu jetu na lukolo lwetu.”

⁴⁹ Munhu imonga mmwanza wao, Kayafa yakalile mtambika mkulu mwaka uja, kawalongela, “Mweye hamtanga mbuli;

⁵⁰ Wala hamgelegeza kamba vilumba munhu imonga yafe kwa kilumbo cha wanhu, lukolo lugima sukulwangamile!”

⁵¹ Na longa dino hadilongile kwa fiyuko zake, komu vija viyali mtambika mkulu umwaka uja, kalagula kamba Yesu kofa kilumbo cha ulukolo.

⁵² Wala si lukolo hilo luyeka mbe, bali na yawalundize iwana wa Mulungu wapwililike, wawe hamwe.

⁵³ Lulawile siku hiyo watenda msagu wa kumkoma.

⁵⁴ Na Yesu hatembele chusa muisi ya Uyuda; kakulawa hiko, kachola behi na luwala hakiwambo kikemigwa Efraimu; kakala hiko hamonga na wanahina zake.

⁵⁵ Na Pasaka ya Wayuda ikala behi, na wanhu bwando wanenuka kugenda Yerusalemu kulawa mviwambo vyao, kwa luto lwa kwingʼaza, hainavika sikunghulu.

⁵⁶ Baho wamzahila Yesu, wema mdihekalu, kuno welongela, “Mokonaze, avo mmanye heza isikunghulu ino?”

⁵⁷ Na Watambika Wakulu na Mafariseo wakala walavile lwamu, munhu yahamtanga hayali, na yagale kivugulo, giladi wamgoge.