Yakobo 3 - Lagano da Isambi

Matozo ga ulonzi gadahika kufugwa

¹ Mowandugu zangu, segemuwe walangukizi bwando, amba mvimanye kwiza nhaguso yondatutaguswe, iyo nghulu kubanza wayagwe.

² Kwa mzoko tweye chose tokikwala muna gamagweka bwando; bali munhu kamba hahasanye muli uulonzi, ayo kakunguluka, kodaha kuluzuwila lulimi lwake.

³ Loleni nyumbu vutuwagelaga nzabi mmilomo giladi watuwinze, na tweye tozilongoza nghuli zawo kutulonda.

⁴ Loleni mimeli, viyemela iyo ibanzile ukulu, kabili yohembeluswa na beho, na hezo zohinduswa na usukani mdododo hanhu hose, hoyolonda yuja yodilongoza.

⁵ Avo vivo na lulimi nalo lugamba ludododo, komu baye vuluitopaga muna imibuli mikulu! kabili lola moto, kisele kidododo, chosoma hulo kulu.

⁶ Avo lulimi lugamba kamba moto, uwo ulumwengu wene ubananzi; viyemela muna ivilungo vyetu vyose, lulimi lulo lubananga, logela lukuli lose ubweto, lobwinha vilumbigwe vija viizingilisa moto uja uli kuzimu.

⁷ Kwa mzoko kamba vija mingʼonyo yose ya mmuhulo, ndege, mizoka na mingʼonyo ikalaga mbahali wafugagwa, nawo wofugika kwa mhiko za wanhu.

⁸ Komu lulimi, kuduhu yondayaludahe kulufuga; lubananzi halwituzaga; lumema duha digalaga kifo.

⁹ Viyemela lulo lutambikilaga Mulungu Tata wetu, kabili lulo ludumilizaga wanhu waumbigwe wafa-nile Mulungu.

¹⁰ Mmulomo mumo mulawaga nhunizo na midumilizo; mowandugu zangu, mbuli hizo ziha, kamba zihawa hivo,

¹¹ Che, nzokwe ya nghulumo imwe ilavaga mazi gaholile na gali usungu?

¹² Mowandugu zangu, he! biki da mkuyu dodaha kulela chikichi, hebu mtongoni wodaha kulela nghuyu? na haja hali umkele, hahalawa mazi gaholile.

Ukalagavu wa imbagu, na uja ulawaga uchana

¹³ Kumwenu yalihi imkalagavu wa magweka yatangile ihoko? Nayalavilize kamba heyo kanawo uchozi unogile, na sanghano zake zoneke na uholo ulawile muja muna uukalagavu wa ihoko.

¹⁴ Komu muhawa na migongo na usungu hamonga na ndwagi mmiyoyo yenu, sukumwitope! hebu kuihindula ihoko igalamka utungulu.

¹⁵ Ukalagavu ugambile hivo, haulawile uchana, bali bahano hasi, uwo wa kimunhu na wa kiwenembago.

¹⁶ Kwa mzoko migongo na ndwagi hazili, baho uli na mkwekwe na magweka gose gehile.

¹⁷ Bali ukalagavu wa ihoko olawa uchana, usongaga kungʼala, imala wolava na mulengemo na uholo na udekedeke, onelaga bazi wose, uwenghaga mujo unogile, kuduhu udesi hebu udelenyi.

¹⁸ Na mujo wa ihoko uhandagwa muna ditindimalo na waja wasanghane uja umulengemo.