Yakobo 2 - Lagano da Isambi

Sikumbagule wakiwa. Nzuma ya ulungwana

¹ Mowandugu zangu, nhamanilo ya Mndewa wetu Yesu Kristo, Mndewa mwene iyenzi, sukumwigoge kwa kuwanogeza wanhu.

² Kwa mzoko muhengila mdikanisa jenu munhu, yavalile mbete ya zahabu mkidole na nguwo zinogile; imalabaho yahengila mkiwa mwene nguwo zidegeke;

³ na mweye kamba muhamdumba yuja yavalile vinogile, na kumgomela mkigoda: Gweye kala hano hanogile; kwiza umulongele yuja imkiwa: Gweye ima hano, hebu kala behi ha magulu gangu;

⁴ Che, avo mmiyoyo yenu hamwinangile wenyecho kamba, muhawabagula hivo, muwinza ngelegeza zihile?

⁵ Tegelezeni mowandugu zangu wanogelwa, Mulungu kawasagula wakiwa wa imbagi ino, wagalamke wene mhiya kwa kumtamanila, wausole uhazi wawo uja undewa wa ikilaga, uwekilwe waja wene kumnogela.

⁶ Komu mweye mumwima mkiwa nhogolwa. Che, wene mali si wawo wamwizilagani mweye kibwamsose? Kabili siwo wawo wamkwekwesagani muna zinhaguso?

⁷ Si wawo wadiligaga dija ditagwa dinogile dumkemaga?

⁸ Komu muhadivikiza lagizo da Undewa kamba viyandikigwe, Umnogele miyago kamba vuukinogela mwenyecho, motenda goya.

⁹ Bali muhawanogeza wanhu, motenda matozo, motaguswa na Inzuma kamba mbanange.

¹⁰ Kwa mzoko munhu viyemela koigoga inzuma yose, kamba kaikwala na mbuli imwe, avo kabananga zose.

¹¹ Kilumbo Heyo yalongile, Sukuutende ugoniliyo yuyo yalongile, Sukuukome; avo kamba hutendile ugoni bali kukoma, kugalamka mbananzi wa gose.

¹² Longeni, kabili gatendeni vivo kamba wanhu wosanghana kwiza weze kutaguswa kwa ija Inzuma itugolele ulungwana!

¹³ Kilumbo munhu yalibule bazi, kogolelwa nhaguso ilibule bazi; na bazi dijo jonda dihume mkitala.

Nhamanilo ili bule sanghano imala ifa

¹⁴ Mowandugu zangu, munhu yahalonga, nomtamanila Mulungu; komu kabule sanghana inogile, vokuwaze; nhamanilo ija yodaha kumuhonya?

¹⁵ Kumwetu kamba kuhoneka ndugu wa kimbigalo hebu wa kitwanzi wali ukulunge, wabule chakuja cha siku imwe;

¹⁶ ilawabaho munhu wa kumwenu yawalongele, Gendeni na tindiwalo jenu, mkote moto kwiza mokwiguta; yaleke kuzingha zinghuli zawo vija vigendaga na sona; vokuwaze?

¹⁷ Avo vivo nhamanilo ilibule sanghana, imala kudanganika yenyecho.

¹⁸ Kwali kuko munhu yolonga, Gweye kuna nhamanilo, aniye nosanghana; aija nomwidika vino, Ndagusila vuumtogola Mulungu halibule sanghano, na niye nokulagila sanghano zangu viziduganye na kumtogola Mulungu.

¹⁹ Gweye kutogola kamba Mulungu yuyo yumwe? avo vinoga; che, mhangalugome nawo wotogola gago komu wagwayaga!

²⁰ Gweye kwa mbozi, konda ulagilwe kamba kumtamanila Mulungu kulibule na sanghano, haduhu lutondo?

²¹ Tata wetu Abrahamu kapetigwa vilihi mwihoko; si aho kwa sanghana, hayamgalile mwanage Isaka yagambe ngʼombe wa nhambiko?

²² Kovyona kamba nhamanilo iitazaga na sanghana zake; avo nhamanilo ivikilizwa kwa kusanghana.

²³ Na jandiko dija divikilizwa, Abrahamu katogola Mulungu, avo kapetigwa kamba mwene ihoko; kileka yakemigwe mbwiga wa Mulungu.

²⁴ Movyona, munhu kopetigwa mwihoko kwa kusanghana, si kwa nhamanilo iiyeka.

²⁵ Kabili yuja mtwanzi mgoni Rahabu kapetigwa ihoko kwa sanghano zake haja, hayawagomele waja wasenga na kuwalava muna diwambo kwa nzila iyagwe.

²⁶ Kilumbo kamba vija lukuli lulibule loho, ludanganika, avo vivo na nhamanilo ilibule sanghano idanganika.