Yakobo 1 - Lagano da Isambi

Msamhuke mkugezwa, mkale udekedeke

¹ Niye Yakobo vinili mtumwa wa Mulungu na wa Mndewa Yesu Kristo, nomulamusani mweye muli masina mulongo umwe na mabili gapwililike.

² Mwandugu zangu, muhadidimila muna ukugezwa bwando, geseni kamba uwo msamhuko uyeka kumwenu!

³ Gatangeni, nhamanilo yenu ihagezwa itangika kamba ya ihoko, yomgelani kufunya umoyo.

⁴ Nako kufunya umoyo kugamba mvikilizo wa sanghana zake, giladi mweye muupate mduganyo, mgalamke wakristo wagima, hawalekigwe kuchugu muli gamagweka gose.

⁵ Kamba kumwenu yahawa kuko munhu yalibule ukalagavu wa ihoko, nayampule Mulungu yanogelaga kuwengha wanhu wose, kabule ugila hebu mhindulo, baho komgolela.

⁶ Komu imgamba kupula kwa nhamanilo, sukuyawe na magweka mabili mmoyo! kilumbo mwene magweka mabili kagalamka kamba wimbi da bahali, dokenhezwa-kenhezwa na dibeho na mzuba-mzuba.

⁷ Munhu yahawa hivo, sukuyagese kamba chabaho chondayagolelwe kumwake Mndewa!

⁸ Munhu mwene miyoyo mibili komagamaga muna zinzila zake zose.

⁹ Ndugu mdekedeke nayaitope muukulu wake!

¹⁰ Na heyo mwene mhiya nayaitopele udekedeke wake, kilumbo kwiza konyala kamba maluwa ga milolo.

¹¹ Kwa mzoko zuwa dihaswa na kwalika, dotatalika donyaza ija imilolo; vivo na heyo mwene mhiya konyala muna uuchozi wake.

Matozo galeligwa vilihi. Golelo diiduganye

¹² Kamota yuyo munhu yokwazaganya mmoyo kamba yahagezwa, kilumbo yahaziga kuhuma, kogolelwa mulufia wene upile, Mulungu uyawalagane waja wamnogele.

¹³ Munhu kamba yahagezwa sukuyalonge, Nogezigwa na Mulungu; kwa mzoko Mulungu hagezagwa na gehile, na Heyo mwenyecho hagezaga munhu.

¹⁴ Komu munhu yoyose kagezagwa, yokwegezwa kuno yoswagizwa na dongho zake mwenyecho.

¹⁵ Imalabaho ija idongho ihagendelela, ilelaga matozo, na matozo nago yahahela, gagelaga kifo.

¹⁶ Mwandugu wanogelwa, sukumkongigwe!

¹⁷ Vinhu vinogile vyose na golelo diiduganye jose dolawa uchana kwa Tata yali Mwene imilangaza; heyo hahinduka-hinduka, hebu kumwake hakuibokezaga mulangaza na ziza.

¹⁸ Ago gago yolonda, katulela tweye kwa mhiko za Longa da ihoko, tugalamke kamba mwidu wa ivyake viumbigwe.

Kusanghana Dilonga hebu kuhulika yamba

¹⁹ Higo mgatanga, mwandugu wanogelwa; avo munhu nayawe kabuha kutegeleza, komu yahole mmoyo segeyawe na kilabilabi; kabili yahole sukuyagwe lusango mbwisa.

²⁰ Kilumbo ukali wa munhu wabule mzoko, haugolokaga hakihanga cha Mulungu.

²¹ Avo uvuleni ubweto wose na uja ubananzi bwando umgogileni; dibokeleni goya dija Dilonga dihandigwe mmwenu, jondadidahe kukombola loho zenu!

²² Muwe wasanghani wa Longa, sukumuwe wategelezi waiyeka, kilumbo avo mokiikonga wenyecho!

²³ Kwa mzoko munhu yahawa mtegelezi wa Longa, yaleke kuwa msanghana, ayo kagamba na munhu yailolile mkiwowo, kihanga chake vikili;

²⁴ yahaziga kuilola, kogenda nazake, kaisemwa bahaja viyali.

²⁵ Komu munhu yogelegeza yalole, Inzuma aho viiduganye vitukomboligwe, yokigogeleza navyo, hadaha kuwa mtegelezi kwiza yaisemwe chambwisa gayahulike, bali kogalamka msanghani wa kazi yake, na heyo komota kwa uja msanghano wake.

²⁶ Munhu yahawalanga kamba komtamanila Mulungu, komu haluhuma lulimi lwake, kaukonga moyo wake mwenyecho, avo nhambiko yake yabule lutondo.

²⁷ Nhambiko inogile ilibule kinghwaso hameso ga Mulungu Tata igo gano, kukagula wana walekelelwe na wavyele wawo, kukagula watwanzi wagane kamba wahalumwa, na kuteganya wenyego sukutuigele muubweto wa imbago ino.