Wakolosai 1 - Lagano da Isambi

Nhogi za Epafra nilangulizi wa Kolosai

¹ Niye Paulo vinili mtumigwa wa Kristo Yesu kilumbo cha manogelwa ga Mulungu, hamonga na ndugu Timoteo,

² towaandikila mweye wanahina wa Kolosai mngʼazulwe kwa kumtogola Kristo, Uholo ukale kumwenu na tindiwalo dilawile kwa Mulungu Tata wetu.

³ Mazuwa gose tomtunila Mulungu yali Tata wa Mndewa wetu Yesu Kristo, kuno tomtambikilani mweye,

⁴ avija vituhulike kamba mweye mumgoga Kristo Yesu, kabili mowanogela wanahina wose,

⁵ kwa mzoko mokibeta kija kilaga kimwikilwe kuulanga; kimulongelwe ichanduso, vuumpetelwe Usenga Unogile wa Longa da ihoko.

⁶ Uwo uvika kumwenu, kamba vuuvikile hosehose muisi, ulela mujo nghani, kabili ukula na kumwenu lulawile siku dija vumuhulike na kuutanga kamba mbuli za unozi wa Mulungu zene ihoko.

⁷ Vivo mlangukizwe na miyetu Epafra mnogelwa, yali msanghani mtamanilwa wa Kristo, kaisanghana kumwenu.

⁸ Heyo yuyo yatupetele vumwinogele mloho.

⁹ Avo na tweye lulawile siku dija dituhulike kivugulo chenu, hatulekile kutambika kuno tompula Mulungu, yawakunguluse nghungwe na nghangaza za kiloho, giladi mtambule gaja goyolonda.

¹⁰ Mchole kamba vigendaga na sona vimnogeze Mndewa nghani, mlele mujo kwa sanghano zinogile na kubanza muna zifiyuko za Mulungu.

¹¹ Kileka mongezelwe mhiko zose zigambile iyenzi yake yene ugalu, mdahe kwazaganya gose na kufunya umoyo hamonga na ndengha.

¹² Kileka mumtunile Tata yamwikileni goya mweye kuubokela uhazi uja, wonda wagolelwe wangʼalile wake muna umlangaza.

¹³ Heyo yuyo yatuhonyile kulawa mhiko za ziza, katwingha kukala mundewa wa Mwanage iyamnogele.

¹⁴ Kumwake heyo kuko tuwona ugombozi, segezelo ja matozo.

Togola iyenzi ya Kristo, ugalu wenu wenele

¹⁵ Na heyo kagamba Mulungu honekaga na meso, komu heyo kihanga chake, kalongola kuleligwa na Mulungu aho, viumbigwe vyose vivikalile havinagesigwa.

¹⁶ Kwa mzoko vinhu vyose vili kuulanga, vili hasi muisi, vyose vija vyonekaga hebu havyonekaga, vihawa vigoda vya undewa, mbuli za ukulu, za utawala hebu mhiko, vyose viumbigwa kulawa mzoko wake, kabili vyomdumba.

¹⁷ Kilumbo Heyo kakala yalongole kubanza vinhu vyose; kileka vikigwa viiduganye na Heyo.

¹⁸ Heyo mwenyecho ijo iditwi da ulukuli, dijo didale ja wanahina; heyo yuyo wa ichanduso, Kilanja wa kuzuswa kulawa kwa wafile, giladi yabanze muna zimbuli zose.

¹⁹ Kwa mzoko Mulungu kanogelwa, yeke mgati mmwake ukungulufu wose wa Kilungu.

²⁰ Avo yawaduganye wanhu wose na viumbigwe vyose, vibwezigwe kumwake haja, uja umulopa wake vuwitike mdibiki; kagagolela mselelo gaja gose gali hasi na gaja gali kuulanga.

²¹ Vivija kawabweza na mweye hano, mkalile walilingwa muna zingelegeza zenu, na wandumu muna imisanghano ihile;

²² baho hayadanganike na kulava lukuli lwake lwa kimunhu, yawahindule na mweye hameso gake, mngʼale muwe bule tozo hebu kinghwaso.

²³ Bali kimonga, mbasilize kumtogola, kilumbo mzengigwe muna ulukwambaza lwene mhiko, sikumdahike kusegezwa hana dibetelo ja Usenga Unogile uja umuhulike, uwo upwililisilwe viumbigwe vyose vili hasi ya ulanga; na niye Paulo uwo unisanghanila.

Kristo yapetelwe iwanhu kamba ungʼazi obetigwa

²⁴ Avo vino nodenghelela na mgazo uno umhatile kilumbo chenu, kwa mzoko mulukuli lwangu nomemeza migaduko ya Kristo iija ilumbile wanahina wake wokemigwa lukuli lwake; aho hawaswelelwe kugaduka, ningila hanhu hawo.

²⁵ Kileka ngalamka msanghana kazi kumwao giladi ya kuteganya vikomo vya Mulungu, ingolelwe niye kuduganya Longa jake kumwenu.

²⁶ Iyo nyongʼonyo ija ikalile ifisigwa aho umwaka, haigubulwe milongo yose kulawile ngholo zose, bali lelo igubuka hameso ga wanhu wake wangʼalile.

²⁷ Kwa mzoko waja wasagulwe na Mulungu, kawalagusila siga ya umbili yene iyenzi ya nyongʼonyo ino iwetilwe wamhazi; hiyo yuyo Kristo mgati mmwenu, uwo ungʼazi wobetigwa.

²⁸ Heyo yuyo kivugulo kija kitubwililisa tweye, kuno tomzuma munhu wowose na kumlangukiza nghungwe zose, giladi tumuhindule kila munhu yawe mkungulufu kwa mhiko za Kristo.

²⁹ Mbuli hiyo na niye noigaiya na kuigombela kwa vija viyoningha ugalu Yuja yosanghana mmwangu kwa mhiko zake.