Wafilipi 3 - Lagano da Isambi

Wene kwigoda mulukuli woibananga nhamanilo; Yagogigwe na Yesu kasemagwa gali kuchugu

¹ Gasigale mwa ndugu, Mndewa yawenghe ndengho! Kwandika gagaja niye hagandonheza, na mweye mogangamazwa.

² Teganyeni mbwa, teganyeni wasanghana wali bule mzoko, teganyeni waja wengile dikumbi waidumule!

³ Kilumbo tweye twingila kumbi da ihoko, tomsanghanila Mulungu mloho, tokitopa kamba twa wa Kristo Yesu, hatutamanila mbuli za lukuli.

⁴ Vilema na niye kamba nondile, nihadahile kutamanila mbuli za lukuli; munhu iyagwe yahagesa kutamanila lukuli, niye nomuhuma.

⁵ Ningila kumbi siku jainane, mvumbukila mulukolo lwa Israeli, kabili sina jangu Benyamini, mwenyecho Mwebrania mlelwa Waebrania, Langulizo da Inzuma nghala Fariseo.

⁶ Kwa ugaga wangu nghala niwagaza wanahina; avo vivo kulawa ndagizo za inzuma nghala bule tozo.

⁷ Komu gaja gakalile pato kumwangu, nogapeta gago gomhonza kilumbo gomkimila Kristo.

⁸ Vivo nogagesa gose kamba kimhonza, kilumbo kumtanga Mndewa wangu Yesu Kristo iyo mbuli nghulu kubanza zose; kwa kilumbo chake nigaleka gose kamba gonihonza, nigagesa kamba unyolodo, nimgoge Kristo yaiyeka.

⁹ Nyoneke kamba nammwake heyo, avo vivo mgoloko wangu ulawile muna Inzuma, vino nabule, komu mgoloko unili nawo uwo uja ulawile kwa kumgoga Kristo, uwo uja munhu yogolelwa, yahamtogola Mulungu.

¹⁰ Ako kuko kumtanga Heyo hamonga na mhiko za mzuko wake na za mgaduko wake, ganyandame na niye kamba Heyo, viyemela kifo chake kigalamke kifo changu.

¹¹ Giladi mvike kuna ukuzuka kulawa kwa wafile.

¹² Silonga kamba mambukiza kubokela, hebu mambukiza kukunguluka, komu nokiyoha uchozi giladi nimgoge, kamba na niye vinigogigwe na Kristo Yesu mwenyecho.

¹³ Mwandugu, sigesa mmoyo kamba nimala kugoga, komu nosanghana dimwe, nigasemwa gaja gali kuchugu, nogasusumila gali kuulongozi.

¹⁴ Nokiyoha uuchozi, mvike mbwisa kuli ikidugalo cha ikihumo, kuna ikitumetume kili uchana kumwake Kristo Yesu, kinghemelwe na Mulungu.

¹⁵ Avo tweye tukunguluke tuigoge ngelegeza hiyo; na kamba muhagelegeza gayagwe, ago nago Mulungu kowagubulila.

¹⁶ Komu aho hatuvikile, tugendegende naho!

Waja wehilaga msalaba, wabule betelo ja kugalulwa lukuli

¹⁷ Ngholelezeni niye, mwandugu, waloleni waja wochola kuno wokwiga gaja gatumwinghileni mweye!

¹⁸ Kwa mzoko bwando wene uchozi, kamba vinimpeteleni miyanza bwando, komu vino nomulongelani kwa kuwalilila, awo iwo wawihile msalaba wa Kristo.

¹⁹ Kikomelezo chawo iwo ubananzi; mulungu wawo izo nhumbo zawo; nhunizo zawo icho kinyala chawo, wagesaga mbuli za imbago ino.

²⁰ Komu tweye wenekaye wetu wakuulanga; kulawa hiko tomlolela Mgombozi, Mndewa Yesu Kristo;

²¹ Yondayatuhindule nghuli zetu zidodile, kwiza zigalamke kamba lukuli lwake lwene ungʼazi, kwa mhiko zija zogamba mumo kodaha kuvihuma vinhu vyose vimdumbe.