Wafilipi 1 - Lagano da Isambi

Kuhongela na kwitambikila

¹ Paulo na Timoteo watumwa wa Kristo Yesu tomwandikilani mweye mngʼazuligwe na Yesu Kristo, mkalile Filipi hamwe na wemilizi na wasanghani wa kanisa.

² Uholo na tindiwalo zenele kumwenu zilawa kwa Mulungu Tata wetu na Mndewa Yesu Kristo!

³ Hose honimgelegezani nomtogola Mulungu;

⁴ Kuno nomtambikilani mweye mose, nihampula kwa kudenghelela mazuwa gose.

⁵ Kilumbo mweye mwiduganya na tweye kwibwililisa Mbuli Inogile, kusongela isiku ya ichanduso kuvikila dilelo.

⁶ Avo nomtamanila yuja Yanduse kusanghana ganogile mmiyoyo yenu, kamba kogamambukiza vivo kuvikila siku ya umbwelo wa Kristo Yesu.

⁷ Kileka vinyandakana kuwalanga kwa vija vumkalile mmoyo mmwangu mweye mose, kilumbo mkala mnhaza mmagweka gano vinifungigwe, kuno nisindila Usenga Unogile na kuupeta kwa ugalu.

⁸ Kileka Mulungu kaumanya moyo wangu vuusaganhike kwa bazi ja Kristo, vinilonda kwibona na mweye mose.

⁹ Avo kinimpulilani icho kino, unogelo wenu ukunguluke, na mweye mgendelele kuutanga mzoko wose.

¹⁰ Kuno modaha kusagula ganogile, moneke wene miyoyo nhula, muwe bule kinghwaso siku ija ya umbwelo wa Kristo,

¹¹ komu mmemezwa mujo wa ihoko na Yesu Kristo, giladi Mulungu yatogolwe na kutunizwa.

Umujo ulawile mkufungigwa kwa Paulo

¹² Mwandugu, nolonda mvitange mbuli zangu zimhatile, zilawilila zigaluka Usenga Unogile utapakala.

¹³ Avo wose wali mumo muna imhongono, na wali kunze wose wahulika vinifungigwe kilumbo cha Kristo.

¹⁴ Na wanahina bwando wa Mndewa wagangamala nghani kilumbo cha minyololo yangu, wadabula kudipeta Longa da Mulungu wabule kidumbo.

¹⁵ Wayagwe leka wompeta Kristo kwa migongo na udesi, bali wayagwe kwa kunogelwa nghani.

¹⁶ Wano wogesa unozi, vuwotanga kamba fungigwa niusindile Usenga Unogile.

¹⁷ Komu waja wompeta Kristo kwa udesi, kwa miyoyo ifitile, wogesa kunyongezela usungu, ninghali mkifungo.

¹⁸ Komu si mbuli kumwangu, bali Kristo nayapetwe kwa nzila zose, ama kwa ubala hebu mwihoko, mumuja nodengha, na mazuwa gonda geze nodenghelela.

¹⁹ Kwa mzoko nivitanga kamba gano gogalamka gawe uhonelo kumwangu, kilumbo monhambikila, kuno motazigwa na Loho wa Yesu Kristo.

²⁰ Na niye vinibeta kuno notamanila kamba honda ngeligwe kinyala chochose, komu Kristo yatunizwe nghani hakulu mulukuli lwangu mazuwa gose tobwa tobwa, hata dilelo ninghali mpile hebu nihadanganika.

²¹ Kilumbo upile icho choni kumwangu? iyo Kristo, kabili nihadanganika, nopata kija kibanzile.

²² Komu nihawa mpile mulukuli lwangu, nowona mujo ulawile msanghana zangu, avo sivitanga kija chonda nikisagule.

²³ Ago magweka mabili nohila nago, nogesa kuilaga imbago ino, ngende hakale hamonga na Kristo, ajo dijo dibanzile kunoga.

²⁴ Bali kuwa mpile wa ulukuli kunoga nghani kwa kilumbo chenu.

²⁵ Kileka moyo wituza, nivitanga kamba nokala muisi na kukala na mweye mose, mgangamale kumtogola Mulungu kwa kudengha.

²⁶ Kabili nihawa kumwenu, niwabwelela chusa, mokimozamoza nakwitopa nghani kamba muhulikwa na Yesu Kristo.

Ngendelo yetu igambe usenga unogile

²⁷ Komu mbuli ibanzile, ngendelo yenu ilumbe na mbuli za Kristo, giladi nihavika kumwenu niwone vumuli, hebu nihawa kuno kutali, igambe niwahulike kamba mwima goya kwa mhiko na sanghano za loho imonga na moyo umwe wa kwingila nghondo ya kugombela ngogelo ya Usenga Unogile.

²⁸ Wala sikumdumbe wandumu wenu vonda wadahe kuwagudemeza; avo wovimanya kamba wokwangamila, komu kumwenu uwo utangu wa kuhona, ulawa kwa Mulungu.

²⁹ Kwa mzoko si kumtogola Kristo kuyeka mgolelwa, komu na kugazwa kwa kilumbo chake.

³⁰ Mwipata nghondo iija yumwene kumwangu mwaka, kabili mwihulika nihali nayo na dilelo.