Waefeso 6 - Lagano da Isambi

Lagizo ja iwana na wavyele, ja watumwa na mabwana

¹ Mweye wana, wategelezeni wavyele wenu kwa giladi ja Mndewa, kilumbo vivo vinogile.

² Umtegeleze tataako na mamo wako, ajo ijo lagizo ja ichanduso dili na ikilaga kilongile,

³ Kwiza ukale goya, na mazuwa gako gawe bwando muisi!

⁴ Na mweye kina tata, sukumuwasonze iwana, komu muwalele na kuwazuma, wamtegeleze Mndewa! –

⁵ Mweye watumigwa, kamba vumumtegeleza Kristo, wategelezeni na hewo mabwana zenu wali muisi, muwahulike na kuwagudemela, muwe na moyo ugoloke!

⁶ Sukumsanghane ganogile hameso gawo gaiyeka, kamba wene kulonda nhogolwa hawanhu; bali kamba watumwa wa Kristo, msanghane kwa miyoyo, Mulungu goyolonda!

⁷ Kuno mvumila utumigwa si kamba mowatumikila wanhu, bali kamba momtumikila Mndewa.

⁸ Kabili mvimanya, kila munhu yahasanghana vinogile vyovyose, kolihigwa na Mndewa, yahawa mtumwa hebu mgolo.

⁹ Na mweye mabwana, muwatendele gagaja; lekeni kuwadumbiza, mvitange kamba kuulanga kakuko Mndewa yumwe, iwawo na iwenu, viyemela kumwake kuduhu ufunamilo.

Wene silaha za kiloho wagangamale; Kupoza

¹⁰ Gasigale mwandugu zangu, mgangamale kwa kilumbo cha Mndewa, wene migoha ya mhiko zake!

¹¹ Zigogeni mhinde zose za Kimulungu, mdahe kwima nzugayuga na kuuzuwila ufyalala wa yuja Chaumbeya!

¹² Kilumbo nghondo yetu itulasa, si kamba ya wene mulopa na lukuli, bali iyo ija ya kwilasa nawo wandewa na wene mhiko na wene kutawala muisi mdiziza, na madale ga imizuka ihile ili kumwehela.

¹³ Avo mina gogeni mhinde za Kimulungu zose, mdahe kwiisimikiza hana inghondo, vondaivike siku ija ihile, giladi mgahume gehile gose, kuno mwimile vivo!

¹⁴ Gangamaleni kuno mkikwesa mkwizi wa ihoko mvigudi; valeni mgoloko iwege nghanju yenu ya vyuma!

¹⁵ Na mmagulu valeni vilatu, muwe nghinde kuubwililisa Usenga Unogile wa tindiwalo!

¹⁶ Kubanza higo gose, igangeni kumtamanila Mulungu, diwe zuwilo jenu da kuhoza misale yose yene moto ya yuja imndumu!

¹⁷ Na mditwi valeni dija dihonelo diwe mulufiya wenu mdala; imala gogeni sime ya kiloho, dijo Longa da Mulungu!

¹⁸ Viyemela kwa kimu cha magweka gose, tambikeni kuno mkibemenda mazuwa gose kwa mhiko za Loho; kabili kaleni mangweda kwa mbuli hiyo, mgangamale na kuwapulila wangʼalile wose kwa Mulungu!

¹⁹ Na niye mhulileni mhate kufungulwa mlomo wangu, nonge na kubasula kimwagaiya lufambo lwa Usenga Unogile,

²⁰ vilema nousanghanila na muno mkifungo, ndahe kuubwililisa halibule kidumbo, kamba viinyandame!

²¹ Giladi na mweye mgatange magweka gangu vigali na niye mwenyecho vinili, gose kowasimulila Tikiko ndugu yetu mnogelwa yali mtumikila mtamanilwa wa Mndewa.

²² Yuno nomulagiza yeze kumwenu kwa kilumbo kiki, mgamanye magweka getu vigali, na heyo yawahozeni imiyoyo.

²³ Tindiwalo diwakalile ndugu wose, unogelo na nhamanilo zilawile kwa Mulungu Tata na kwa Mndewa Yesu Kristo!

²⁴ Uholo uwakalile wose waja wamnogele Mndewa wetu Yesu Kristo, haduhu kubanangika!