Waefeso 5 - Lagano da IsambiMkalile ziza, mgalamka mulangaza 1 Mwigeni Mlulungu kamba viiwagambile wana wanogelwe! 2 Mwigondanye muna ukwinogela, kamba Kristo viyawanogele mweye; heyo kailava muhanga kwa sosombi yetu, kagamba nhambiko, Mulungu yahulike mnungho unogile. 3 Bali mbuli za ugoni, za ubweto wowose na gahigahi, kumwenu sikugatambulwe ngʼo, kamba vilumbile wangʼalile; 4 hebu maligo, hebu mbuli za ubozi hebu ufyosi wihile, kwa mzoko higo haganogile, komu ganogile kuko ukuhongeza, kulava nhogo. 5 Kilumbo mvimanye goya, kabili mvitambule kamba haduhu mgoni, mbweto hebu mwene gahigahi, na yahawa mtambikila vinyago, yonda yagwelelwe uhazi muna undewa wa Kristo na Mulungu. 6 Munhu segeyawakonge na mbuli zilibule mzoko; kilumbo cha higo lusango lwa Mulungu lowezila waja walemile. 7 Avo sukumwihanganye nawo! 8 Kilumbo umwaka mkala mziza, komu sambi mgalamka mulangaza, kwa mzoko muhamonga na Mndewa; mgendelele kamba viwagambile wana wa Mlangaza! 9 Kilumbo mujo uleligwa mmlangaza, uwo unovu wowose na uholo na ihoko. 10 Gasaguleni magweka galihi ga kumnogeza Mndewa! 11 Sukumgalamke wayawo wene kusanghana ga ziza galibule lutondo, komu gangamaleni kuwahuguza! 12 Kwa mzoko gaja gowasanghana ga mbadambada, gahatambulwa kwiyeka, kogela kinyala. 13 Komu gose gogubulwa, gahahuguzwa na Mlangaza, kilumbo kila kinhu kihagubuligwa, chongʼalangʼazika. 14 Avo ilongwa, Lamka gweye uwasile, uzuke ulawe kwa wafile, na heyo Kristo kokungʼazila! 15 Avo teganyeni nghani vonda mgendelele; segemuwe wabozi, bali mgalamke wakalagavu wa ihoko! 16 Mzigombole goya siku za dilelo, kilumbo siku zino zizo zihile! 17 Avo mina sukumwehuke bali mgamanye, Mndewa goyolonda! 18 Wala sukumkoligwe ugimbi, kilumbo uzahulaga mditwi, komu mmemezwe Loho! 19 Mulongelelege kuno mkipetela ndengha na nyila; mdude mloho na kumwimbila Mndewa, mdengheleleni mmiyoyo yenu! 20 Mumuhongeze Mulungu Tata mazuwa gose na mzimbuli zose, muna ditwaga jake Mndewa wetu Yesu Kristo! Mwehe na mkasano waukoleleze utango wa Kristo 21 Imala mwitendele udekedeke munhu na miyage, kamba vija vumumdumba Kristo! 22 Mweye watwanzi, wategelezeni wakasano zenu, kamba vumumtegeleza Mndewa! 23 Kilumbo mbigalo yuyo ditwi ja sano jake, kamba Kristo viyali ditwi ja didale ja wanahina, kwa mzoko Heyo yuyo yakombole ulukuli. 24 Kamba vija dale da wanahina vuwomtegeleza Kristo, vivo na wehe igamba wawategeleze wakasano zawo muna gamagweka gose. 25 Mweye nghambaku, wanogeleni pinga zenu, kamba Kristo na Heyo viyanogele dale da wanahina, kailava mwenyecho kwa kilumbo chawo, 26 giladi yawangʼaze na kuwamulikila, yowogeza mazi kwa Longa jake. 27 Vivo viyagesile kuisanghanila mwenyecho dale da wanahina, wagambe na nhunizo, dili bule bangu hebu hohoto hebu jojose digalamke kamba hijo, bali wangʼale walibule kinghwaso. 28 Avo iwandama nawo wambigalo wawanogele wehe zawo kamba nghufi zawo, kwa mzoko mwene kumnogela pinga wake koinogela mwenyecho. 29 Lulawile uhenga kuduhu munhu yalwihile lukuli lwake, komu kolwingha mandiya na kuluteganya, kamba Kristo viyoditendela dale da wanahina. 30 Kilumbo tweye twa vilungo vya lukuli lwake. 31 Kwa mzoko hiwo munhu komuleka tataake na mamo wake, yananahile sano jake, na hiwo wabili wogalamka lukuli lumwe. 32 Lufambo luno lugaga, komu niye nolonga Kristo na didale ja wanahina. 33 Avo vigamba na mweye kila imonga wenu, nayamnogele sano jake kamba viyokinogela mwenyecho; na sano nayamtegeleze mkasano wake! |
New Testament in Zaramo © United Bible Societies, 1975.
Bible Society of Tanzania