Waefeso 4 - Lagano da Isambi

Umwe wa kiloho nawigondanye na kwinogela na ihoko

¹ Nowapembela mweye, gogeni ngendelo igambile lukemo luja lumkemelwe!

² Kwa kwikonakona na udekedeke, mfunye umoyo, mwitaze kuno mkinogela!

³ Kabili mwiyohe kuiteganya mgambe yumwe wa kiloho, mwigondanye na tindiwalo!

⁴ Lukuli lulo lumwe, Loho iyo imwe, na ichalizilo cha lukemo lwenu kimkemelwe, icho kimwe.

⁵ Mndewa yuyo yumwe, nhamanilo iyo imwe, nawo ubatizo uwo umwe.

⁶ Na heyo Mulungu yuyo yumwe, yuyo Tata wa wanhu wose yatawale wose, yasanghane kumwawo wose, yawakalile wose.

⁷ Komu kila miyetu yumwe kagolelwa uholo wa ningo ija, Kristo iyalingile.

⁸ Kwa mzoko galongigwa, Kawela uchana, kakulula mateka, kawengha wanhu wake magolelo.

⁹ Avo longa dino, kuwela, mzoko wake uwo ulihi? kamba digesa, Yahulumukile tanhu hasi kuzimu?

¹⁰ Iyo Yuyo yawelile uchana nghani kubita ulanga wose, giladi yaduganye vyose.

¹¹ Na Heyo kaweka wayagwe wagalamke watumigwa, wayagwe wawe walaguzi, wayagwe wainjilisti, wayagwe wachunga na walangukizi.

¹² Giladi wangʼalile wose wagongomanywe, wasanghanike goya kutunduwila dale da wanahina, lukuli lwa Kristo luzengwe.

¹³ Na tweye chose tuvikile uja umwe wa nhamanilo na kumtanga nghani Mwanage Mulungu, avo tugambe munhu mkungulufu yovikila ukulu wa ningo ya mduganyo wa Kristo.

¹⁴ Kabili sukutugalamke vinghele, twasigwe kuno na kuno na beho hebu kukwegigwa na malangukizo ga wanhu waja wakongaga wayawo kwa ubala na uvwizi.

¹⁵ Komu tulonge ga ihoko, kuno tulongozwa na unogelo; avo tukule muna zimbuli zose kumvikila Kristo ijo Ditwi jetu.

¹⁶ Heyo yahatawala, vilungo vyose vya ulukuli vokilumba hamwe, vogangamala, avo lukuli logalamka lumwe, lokitaza hamonga na ngozongo imwe imwe, isanghana goya, lokula lokizenga nghani kwa kwinogela.

Munhu wa umwaka mvuleni, mvaleni munhu wa isambi

¹⁷ Nowazuma kuno nisindila mditwaga da Mndewa, sukumkole kabili kamba walilingwa vuwokola, wowinza mbuli zilibule mzoko!

¹⁸ Wawalanga mbuli za ziza ziyeka; ugima wa Mulungu ugamba kinhu kigeni kumwawo, kwa kilumbo cha ubozi uwali nawo, na kwa udala wa miyoyo yawo.

¹⁹ Kwa vija vuwafile tenene mmiyoyo, waigela muna ugoni, wasanghana ga usisa gose na dongho za mhiya.

²⁰ Komu mweye hamulangukizwe mbuli za Kristo zigambe hivo.

²¹ Kilumbo muhulika, mlangukizwa Longa jake kamba kumwake Yesu kuko kuli ihoko.

²² Avo mvuleni munhu wa umwaka yaihonzile kwa kuwinza dongho za ubalaganyi!

²³ Imala meso ga miyoyo yenu gabwezigwe ga sambi ga kiloho!

²⁴ Mvaleni munhu wa sambi yaumbigwe Kimulungu, yagoloke, yangʼazulwe muli ihoko!

²⁵ Avo uvuleni utungulu, mwilongele ihoko, kila munhu na miyage; kilumbo twa vilungo, kila imonga kilungo cha miyage!

²⁶ Muhagwa lusango, sukumkale zuwa diswe, muhali na lusango lwenu!

²⁷ Sukummwinghe Mwenembago ulegeho!

²⁸ Munhu yebile sekeyebe kabili; bali yaiyohe kusanghana na makono gake, yapate cha kumwenela mwenyecho, yawataze waja wolemelwa!

²⁹ Ulonzi wose wihile sukuulawe mmilomo yenu; bali kamba dihawa longa dinogile, didahile kuzenga; dilongeni dijo, diwanogeze wene kudihulika!

³⁰ Sukumumsuwaze Loho Yangʼalile wa Mulungu, kilumbo yuyo mgwelelwe kamba utango wenu wa siku ya nghomboka!

³¹ Usungu wowose na mafundogolo mmoyo, makomhoko, udesi na maligo gasegele kumwenu hamonga na ubananzi wose!

³² Mwisanghanile kimunhu na kwa uholo; mwilekesele kamba Mulungu viyawalekesele na mweye kumwake Kristo!