Waefeso 3 - Lagano da Isambi

Nyongʼonyo ya nhamanilo imwe viili kiyeka kiyeka

¹ Higo gangala niye Paulo mkifungo kwa kilumbo cha Kristo na giladi jenu mweye walilingwa.

² Kwali muhulika, Mulungu viyaninghile niteganye magolelo gake, giladi niwenghe na mweye.

³ Ngubulilwa nigatange magweka gaja gafisigwe; kamba viniwandikileni hadodo ichanduso.

⁴ Muhagasoma, na mweye moutanga uja mzungu wangu wa kufambula nghungwe ya Kristo.

⁵ Mazuwa gabitile gose, Wana wa wanhu wakala hawanalongelwa nghungwe hiyo; komu sambi Mulungu kawagubulila watumigwa na walaguzi wake wangʼalile muna iloho.

⁶ Igambe walilingwa na hewo wawo wene uhazi hamonga na tweye; wamumo hamonga na tweye mulukuli lumwe, wene kilagano kija kitugolelwe na Kristo Yesu haja, hatulongelwe Usenga Unogile.

⁷ Uwo uno unisanghana, Mulungu viyangolele golelo jangu haja hayaninghile mhumigwa na mhiko zake.

⁸ Niye nili mdodo kubanza wangʼalile wose, ngolelwa golelo dino, niwapetele walilingwa Usenga Unogile wene uholo bwando wa Kristo hauhungukaga.

⁹ Viyemela nikupete goya kuja kuseseza ija inghungwe ikalile ifisigwe milongo yose kwa Mulungu Mwene kuvilumba vyose.

¹⁰ Giladi mazuwa gano wakulu na wene mhiko wose wali kuulanga wasimulilwe muna gamakanisa uholo wa Mulungu vuuli kiyeka kiyeka nghani,

¹¹ Avo manogelwa gake gayagesile kulawa digunge, gaiduganya mumo mwa Kristo Yesu, mndewa wetu. Na Heyo katufungulila nzila ya kumkwenhukila Mulungu hali bule bwembwe, tumvikile kumwake, kuno tugangamale kwa kumtamanila.

¹³ Avo nowapula, sukulemelwe na migaduko yangu, imhatile kwa kilumbo chenu, igambile iyo iyenzi yenu!

Paulo viyowapulila wanahina kumwake Tata

¹⁴ Kwa mzoko uno nomfugamila Tata mavindi.

¹⁵ Kumwake kulawile tagwa ja utata wowose kuulanga na muisi okemagwa.

¹⁶ Heyo Tata yawamotele ubwando wa iyenzi yake, mgangamale unhu wenu wa mgati, kwa sanghano za Loho yake.

¹⁷ Avo Kristo yakale mmiyoyo mmwenu kwa vija vumumtamanila, giladi mote mizizi muna ukwinogela, mtekele mumo.

¹⁸ Kabili mvimanye hamonga na wangʼalile wose, manogelwa vigali ugazi wake, utali wake, kwingila hasi na kugidigila kwake.

¹⁹ Vivo vonda mtange nogelo da Kristo vidili, dibanza nzewele zose, na mweye momemezwa muna zimbuli zose, kamba Mulungu viyamemile.

²⁰ Komu Heyo yadahile kusanghana mbuli za mnzonza kubanza zija zitupula hebu zituwalanga; zizo zilinganya mhiko zisanghana kumwetu;

²¹ Heyo yatunizwe mdikanisa da wasagulwe wali hamonga na Kristo Yesu, ngholo zose zondazize digunge na idigunge. Amina.