Waefeso 2 - Lagano da Isambi

Tukomboligwa tuulawe undewa wa mwenembago

¹ Na mweye mkala mfile kwa mzoko wa ubananzi na matozo genu, mkala mgakoleleza umwaka,

² kwa luto lwa wanhu wa ulumwengu uno, mumtegeleza mtawala wa mhiko zihile za uchana viyolonda, yuyo yuja Mwenembago mwene kutenda vya mhiko na dilelo kumwawo waja wolema kutogola.

³ Na tweye chose umwaka tukala wayawo haja hatukoleleze dongho za nghuli zetu, tugatenda, nghuli na miyoyo yetu viigesile; avo kwa vija vitukalile kimunhu, lusango lwa Mulungu lukala lutwandame kamba waja wayagwe.

⁴ Bali Mulungu kakala mwene bazi nghulu, kabanza kutunogela mmoyo nghani.

⁵ Avo katubweza muugima hamonga na Kristo tweye tukalile tufile muna gamatozo; vivo na mweye muhona kwa mzoko wa uholo wake.

⁶ Imala katuzusa hamonga na Heyo, tutawale kuulanga kumwake Kristo Yesu.

⁷ Kwa mzoko kalonda kulagila mazuwa gose gondageze, ubwando wa uholo wake uli bule uzigililo, woneke kumwetu tweye, yatunogele kwa Kristo Yesu.

⁸ Kilumbo nghombolwa yenu mgolelwa yamba haja hamumvumile, vilema hailawile kumwenu, komu ijo golelo na bazi da Mulungu;

⁹ avo munhu sekeyaitope, kilumbo haisanghanile.

¹⁰ Kwa mzoko tweye tuumbigwa na Heyo, na mmwake Kristo Yesu mumo tuumbilwe, tusanghane ganogile gaja, Mulungu gayatwikile umwaka tugasanghane.

Vitukalile twabule Mulungu; sambi tindiwalo, ukaye wabaha

¹¹ Na mweye walilingwa, gelegezeni umwaka vumkalile wamhazi, wayenu vuwomtendelani uponela kamba hamwingile kumbi, waja woitopa wengila kumbi, vilema nghuli zawo zingizwa kumbi na mikono ya wanhu.

¹² Gelegezeni mazuwa gaja mkala mulibule Kristo, kabili mkala mgomeswe kuwa wenekaye kumwawo Waisraeli, mkala walilingwa, hamgatangile malagano gawalongelwe kugolelwa; mkala bule kibetelo hebu Mulungu muno mulumwengu.

¹³ Bali vino sambi vumuli wanhu wa Kristo Yesu, mweye mkalile kutali umwaka, mgaligwa habehi kwa mulopa wa Kristo.

¹⁴ Kilumbo Heyo ijo tindiwalo jetu, kwa mzoko gaja gamadale mabili kagahindula, dibwela dimwe, kaditula dikonhi dikalile ditubagule, digalile undumu.

¹⁵ Kalusegeza lwamu lwa Inzuma izile na mbila, haja hayakalile na lukuli, giladi yawagalule hiwo wabili, wagalamke munhu yumwe wa sambi yolawa mmwake, kagala tindiwalo.

¹⁶ Kawagondanya wose wabili na Mulungu mulukuli lumwe haja hayawambigwe mdibiki; ako kuko kuyaukomile uja undumu.

¹⁷ Imala keza, kabwililisa tindiwalo kumwenu mweye mkalile kutali, na kumwawo wakalile behi.

¹⁸ Kwa mzoko kumwake Heyo chose wabili twinghigwa nzila ya kumvikila Tata muna iloho imonga.

¹⁹ Avino sambi mweye hamuli wanhu yungwa, aka! hebu wabita nzila kabili, komu mweye mwa wenekaye hamonga na dale ja wangʼalile, mweye mwa wanhu wa ngʼanda ya Mulungu.

²⁰ Mzengigwa uchana mulukwambaza lwa watumigwa na watulandagu, vilema Kristo Yesu yuyo Dibwe ja Kiheleto.

²¹ Kwa mhiko zake Heyo, zengo jose jokilunga hamonga, jokula, kwiza dogalamka Hekalu dingʼalile ja Mndewa.

²² Himo na mweye mozengigwa hamonga na wayagwe muukazi wa Mulungu uli wa kiloho.