Waefeso 1 - Lagano da Isambi

Magolelo gatubokele bwando ga uholo

¹ Nene Paulo mtumigwa wa Kristo Yesu kwa gaja Mulungu goyolonda, nowandikilani mweye wanahina wa Efeso, mngʼazulwe muna inhamanilo ya Kristo Yesu.

² Uholo uwakalile na tindiwalo kulawa kwa Mulungu Tata wetu, na kwa Mndewa wetu Yesu Kristo!

³ Yatunilwe Mulungu, Tata wa Mndewa wetu Yesu Kristo, yatumoteze magweka gose ga kiloho gali kuulanga kumwake Kristo.

⁴ Kilumbo ulumwengu vuukalile haunaumbigwa tanhu, katusagula tweye tugambe wanhu wake, wangʼalile hameso gake, tuwe bule kinghwaso.

⁵ Kamba vija viyatunogele, katugelegeza umwaka, tubokelwe tugambe wanage Mwenyecho kwa mzoko wa Yesu Kristo, giladi manogelwa gake gavikizwe.

⁶ Na tweye twitogole iyenzi ya ugozi wake, iyatugolele aho hayamlavile Mwanage Mnogelwa.

⁷ Na Heyo muna umulopa wake mumo twinghilwe nghombolwa, kwa mzoko tusegezelwa matozo, ajo dijo golelo jake bwando.

⁸ Dibwagala kumwetu kwa vija vitukalagale mwihoko na kuvimanya vyose.

⁹ Imala katufambulila goyolonda, gakalile gafisigwe, kakala yogagesa mmoyo kulawa umwaka, giladi gaiduganye kwa mzoko wa Kristo.

¹⁰ Ago gosanghanwa mazuwa gaja gayekile vondagavike, Kristo yagalamke Ditwi ja vyose vili kuulanga na vili muisi.

¹¹ Kumwake Heyo tugolelwa hamonga uhalali wetu, utukanhilwe mwaka na kwikilwa; kwa mzoko Heyo yuyo yasanghane vyose viwe baho kamba viyolonda Mwenyecho.

¹² Avo tweye, tulongole kumbeta Kristo, natubanze kulava nhunizo za iyenzi yake!

¹³ Na mweye mdihulika Longa da Ihoko, uwo Usenga Unogile wa uhonelo wenu; mgeligwa utango wake haja hamvumile, iyo Loho Yangʼalile imulongelwe kilaga chake.

¹⁴ Nayo iyo babulamana ya uhalali wetu, tuvitange kamba tukombolwa, kabili sambi twa wanhu wake, iyenzi yake itunilwe.

Kwipulila kumwake Yesu yali Ditwi ja Didale

¹⁵ Na niye vimhulike vumumtamanila Mndewa Yesu na kuwanogela wanahina wose;

¹⁶ sileka kulava nhogo kwa kilumbo chenu, kuno nowagesa nihampula Mulungu.

¹⁷ Nowapulila, Mulungu wa Mndewa wetu Yesu Kristo yuyo Tata Mwene Iyenzi, yawenghe loho ya ukalagavu na ugubulilo, mumtambule Heyo viyali.

¹⁸ Kabili yangʼaze meso ga mi-yoyo yenu, mkitange chalizilo kimkemelwe na Heyo, mwitange na iyenzi ya uhalali wake, iyawekile wangʼalile, viili bwando.

¹⁹ Muutange na ugalu wake vuuli kubanza viyagwe vyose kumwetu tweye, tumtamanila, kuno yolaviliza mhiko zake nghulu.

²⁰ Zizo zimzusile Kristo kulawa kwa wafile, ilawabaho zimwika ukulume kumwake Tata kuulanga.

²¹ Avo yatawale ukulu wose, mhiko, ugalu na undewa wose, yabanze matagwa gose gonda gatambulwe mazuwa gano hebu gaja gondageze.

²² Kageka gose hasi hamagulu gake, na Heyo Mwenyecho kamtenda yawe mkulu wa hayeka, yawe Ditwi ja Kanisa jake, Lukuli lwake

²³ ajo dijo Vikilizo jake Heyo yonda yagaduganye gose gagambile hohose haduhu msigazo.