Waebrania 9 - Lagano da Isambi

Magweka ga ihema kuja kuluwala; Mhiko za nhambiko ya Yesu, itukombolaga

¹ Najo Lagano da ichanduso dikala na nghungwe za kumtambikila Mulungu, kabili dikala na Hangʼalile hazengigwe na wanhu.

² Hakala hemikizwa ihema ya kwingilila; mumo mkalile taa (haizimagwa) na meza, na migate yekilwe Magana.

³ Baho hakalile hakemigwe Hangʼalile Senhambo, kuulongozi wa idiguwo dili hagatigati.

⁴ Himo mkala na kivukizilo cha uvumba cha zahabu, na shanduku da Lagano digubikizwe hosehose na zahabu; amo mgati mkala kitumbe cha zahabu chene Mana, na fimbo yake Aaroni izukile, na vibanhi vya Lagano.

⁵ Uchana hashanduku hasimikwa vinyago vibili vya malaika Makerubi gene yenzi, vikilola; gagela mbeho hali ishanduku, aho matozo vigosegezwa; ago gose hatudaha kugalonga sambi dimwe dimwe.

⁶ Vino vivimalile kugongomanywa avo, watambika wokwingila mazuwa gose muna dihema da ichanduso, kuno wovikiza nhambiko. Komu muna digati da ihema kengilaga mtambika mkulu yaliyeka, mwaka mwanza umwe, na heyo yahaswela mulopa wa kugala, hengila bule, igambe nhosa yake heyo na ya matozo ga wanhu wokitozela.

⁸ Avo Loho Yangʼalile kapeta kamba, Nzila ya kuhengilila Hangʼalile Henyecho hainafunguka tanhu, hema ja ichanduso dihali dimile wima tanhu.

⁹ Najo dikala iutango lwa kulagusila siku za sambi vizili, kilumbo havidahika, zija ndavilo za nhosa na nhambiko zimwinghe mwene kuzilava moyo ugangamale.

¹⁰ Kwa mzoko ukuja na kungʼwa na kwisunha kuyagwe kuyagwe gago mazowela gagamba lukuli, gekigwa kuvikila kikomo chonda gagolosigwe magweka gose ga Mulungu.

¹¹ Komu Kristo keza kagamba mtambika wa gaja ganogile gonda galawilile, kabita muli dihema dikulu diiduganye kubanza dija digongomanywe na makono ga wanhu, kwa mzoko hadilawile mwimbago ino.

¹² Na heyo hengile na mulopa wa mhene hebu wa ngwada ya ngʼombe, komu kagala mulopa wake mwenyecho, kahengila na heyo mwanza umwe haja Hangʼalile Henyecho, katusanghanila nghombola ya digunge na digunge.

¹³ Uhenga mulopa wa mhene na wa nghambaku, na imitozi ya ngʼombe isomigwe, gahanyunyizilwa wene uchapalisi, gawangʼazula, uchapalisi wa lukuli uwasegele.

¹⁴ Komu sambi vino Kristo viyailavile kwa mhiko za Loho wa milongo na milongo, yagambe ngʼombe ya nhambiko kwa Mulungu ilibule ulemavu; mulopa wake wobanza nghani kusunha miyoyo yetu, tugaleke magweka gene kutukoma, tumtumikile Mulungu Mwene Upile.

¹⁵ Kwa kilumbo hicho kagalamka Msenga wa Lagano da Isambi, giladi waja wakemigwe wausole uhazi wawo wa idigunge uwalongelwe; kwa mzoko kifo choneka kuwakombola muli gamatozo gasanghanwe siku za Lagano da umwaka.

¹⁶ Kilumbo aho hadili dilagano, giladi tanhu mwene kudika yadanganike.

¹⁷ Kwa mzoko lagano dovikilizwa na kifo; dabule na mzoko, mwene kudika yahali mpile.

¹⁸ Avo hata dija da ichanduso hadiswelile mulopa.

¹⁹ Kilumbo Mose viyamalile kuwalongela wanhu wose kila lagizo da Inzuma, kasola mulopa wa ngwada za ngʼombe na za mhene, ilawabaho kasola mazi na pamba dunghu na kivumbasi, kakinyunyizila ikitabu chenyecho, imala na iwanhu wose, kalonga,

²⁰ Uno uwo mulopa wa Lagano, Mulungu kadilagiza.

²¹ Na dija dihema hamonga na viya vyose va nhambiko kavinyunyizila mulopa vivija.

²² Na muli Inzuma vinhu vyose vilagizwa visunhigwe na mulopa; kwa mzoko kamba mulopa hawitike, haduhu msegezelo wa matozo.

Mulopa wa Yesu utendile nghombola mwanza umwe

²³ Avo milingano ino ya vija vili kuulanga, vigamba vingʼazulwe vivo; bali vija vya kuulanga vyenyecho vigamba na indavilo ya nhambiko yene mhiko kubanza vija.

²⁴ Avo Kristo hengile hangʼalile hasanghanwe na makono hali umulingano uyeka wa Hangʼalile ha ihoko; bali kengila kuulanga wenyego, yalawilile sambi hakihanga cha Mulungu kwa giladi jetu tweye.

²⁵ Kabili si kamba yailave miyanza bwando, kamba vija mtambika mkulu viyengilaga hangʼalile kila mwaka na kugala mulopa yungwa, si wake.

²⁶ Ihali vivo, vihamgambile na kugaduswa miyanza bwando kusongela haja, imbago viiumbigwe; komu sambi koneka mwanza umwe, siku vizivikile, yazitenyule mhiko za ubananzi kwa kuilava kamba nhambiko, yene kuiduganya milongo yose.

²⁷ Vivo iwagamba wanhu wadanganike mwanza umwe, imala wataguswe.

²⁸ Na heyo Kristo Kalavigwa mwanza umwe, yagambe nhosa ya nhambiko ya kusegeza matozo ga bwando; komu mwanza wa ikabili kowalawila waja wombetaga, yawahonye, hali bule kugesa matozo kabili.