Waebrania 8 - Lagano da Isambi

Lagano da Sambi dilagilwe kwa nzila ya kilaga

¹ Mbuli nghulu kubanza gose gatulongile, iyo ino, Tugolelwa mtambika mkulu yakalile ukulume mkigoda cha undewa kili na ukulu, kuulanga.

² Na heyo baho yoteganya hanhu haja hangʼalile ha Mulungu, hali na ihema senhambo, isimikwe na Magana, si wanhu mbee waisimikize.

³ Kilumbo kila mtambika kekagwa yagalege malavilo ga nhosa na nhambiko; avo na Yesu imwandama yawe na kinhu cha kudigalila Mulungu.

⁴ Kamba yalawile mwimbago ino, hisambi yagambe mtambika mbee, kilumbo wabaho wamgalilaga Mulungu nhambiko, kamba vuwalagizwe na Inzuma.

⁵ Na hewo wovisanghanila vija, vilingane na sisila ja vija vili kuulanga; vivo Mose aheyo, viyalondile kuisanghana ija ihema, kalongelwa, Teganya usanghane gose kwa kulingana na gaja gaulagusilwe kudigongo!

⁶ Komu Yesu sambi kenghigwa utambika ubanzile, kilumbo Lagano diyatugalile heyo, ijo dinogile kubanza dija; kabili diduganyizwa na vilagilizo vinogile kubanza vija.

⁷ Kilumbo dija dilongole kamba hadinyekile bule, isambi hazahilwe hanhu ha kwikila diyagwe.

⁸ Bali Mulungu kawakomhokela kawalongela, “Mokona mazuwa gokwiza, vivo yolonga Bwana, baho vonda niwaduganyile hewo wa mulango wa Israeli, na hewo wa umulango wa Yuda Lagano da isambi.

⁹ Hondadigalamke kamba lagano dija vidikalile, dinhendile na tata zawo siku zija, viniwagogile makono, giladi niwalave kuli iisi ya Misri; kilumbo hewo wenyego hawadigogile Lagano jangu, na niye niwalema, vivo yolonga Bwana.

¹⁰ Komu dijo Lagano jonda nilagane nawo wa mulango wa Israeli, kolonga Bwana, Nowengha malangukizo gangu gakale muli zingelegeza zawo, viyemela nogandika muli imiyoyo yawo, na niye nokuwa Mulungu wawo, na hewo wokuwa wanhu wangu.

¹¹ Honda wailangukize kabili munhu na miyage, hebu munhu na ndugu yake kamba, Mtange Bwana! kilumbo wose wonitanga, kusongela udodo wawo na kuvikila kuukulu.

¹² Kilumbo nowasegezela gehile gawo, na matozo gawo honda nigagelegeze kabili.”

¹³ Kwa kuja ukulonga Lagano da Isambi, kaditenda dija da ichanduso kamba dihela; komu kinhu kihasonga kuhela na kulala, chammabehi kuhalawa.