Waebrania 7 - Lagano da Isambi

Yesu viyalingane na Melkisedeki

¹ Ayo Melkisedeki kakala mtawala wa Salemu na mtambika wa Mulungu yali uchana kuulanga; haja Abrahamu hayabwelile kulawa kuli inghondo ya Watawala, kamgendela, kammoteza.

² Na heyo Abrahamu yomana kumgolela galo da mulongo umwe wa gamali gose; na tagwa jake, digamba vivo mtawala wa ihoko; kabili yuyo mtawala wa Salemu, ngomelo yake Mtawala wa Tindiwalo.

³ Tataake na mamo wake na kilagwa chake hakitangike, hebu milongo yake iyakalile, haitangike viisongile hebu viimalile, kwa mzoko kagalamshwa kamba Mwana Mulungu; na kokala mtambika kuvika digunge.

⁴ Teganyeni yuno viyakalile mkulu, kileka Abrahamu tatawetu mkulu kamwingha galo da mulongo umwe, dilawile mnghondo!

⁵ Kumbe lukolo lwa Lawi nawo, waja wagolelwe kutambika, walagizwa na Inzuma wawilege galo da mulongo umwe kulawa kwa wayawo, ngholo zose za ndugu zawo, viyemela na hewo walawa hamonga mkigudi cha Abrahamu.

⁶ Komu ino yagambile si wa lukolo lwawo, kamuwila Abrahamu yamlavile galo da mulongo umwe, kammoteza yuja yabokele ivilaga.

⁷ Avo hadibamilagwa kamba mdodo komotezwa na mkulu.

⁸ Awaja Walawi wawila galo da mulongo umwe, wahali wanhu wadanganikaga; komu Melkisedeki kadiwila, kuno yosindilwa kamba yahali mgima.

⁹ Kabili vihadahika kulonga, kulawa Abrahamu kuvikila Lawi, heyo mwene kuwila digalo da mulongo umwe, kawilwa na heyo galo da mulongo umwe, hamonga na babu yake.

¹⁰ Kilumbo kakala tanhu hakigudi cha babu, Melkisedeki vuwaitinghane.

Utambika wa Lawi vunyekile

¹¹ Maza kamba nhambiko ya Walawi iduganye gose, avo vilihi yalondigwe mtambika iyagwe yagambe kamba Melkisedeki, sekeyagambe kamba Aaroni viyakalile? (Viyemela Waisraeli wenghigwa inzuma hamonga na utambika.)

¹² Bali nhambiko ihahindulwa, vivo na Inzuma nayo ihindulwe.

¹³ Kilumbo Yesu yofambuligwa na magweka gaja, kakala wa lukolo luyagwe, vilema mulukolo lwake kuduhu munhu wowose yasanghanile nhambiko.

¹⁴ Kwa mzoko vitangika kamba Mndewa wetu kalawa msina da Yuda, na sina hijo Mose halongile mbuli ya nhambiko.

¹⁵ Ago gotulonga galawilila chalinze nghani, kilumbo kekigwa mtambika yungwa yagambile kamba Melkisedeki.

¹⁶ Heyo utambika wake haulawile kuli Inzuma ilagile magweka ga lukuli, komu ulawa kuli zimhiko za ugima haudohokaga.

¹⁷ Kwa mzoko usindilwa kamba, Gweye kwa mtambika wa idigunge, kamba Melkisedeki viyakalile.

¹⁸ Avo dija lagizo dilongole dilekigwa, kilumbo dikala bule mhiko, hadigangamale.

¹⁹ Kilumbo kuduhu diiduganye na inzuma, komu haja ihanhu hake halihilizwa kibetelo kili kikulu kubita inzuma, kwa mzoko chotuvikiza kwa Mulungu.

²⁰ Kabili chabaho kiduwilo cha Mulungu, vilema waja watambika wa Lawi wekigwa wali bule na duwilo.

²¹ Bali Yesu viyekigwe, Mulungu kaiduwila na kuidandaya, kalonga, Magana kaiduwila, na heyo hondayagimbule, Gwegwe Mtambika wa idigunge.

²² Avo Yesu yuyo mduganya wa Lagano dikulu kubanza dija diyagwe.

²³ Na hewo iwo bwando wakalile watambika, kwa mzoko kifo kiwagomesa segewabasilize kukala.

²⁴ Komu heyo kanawo utambika, hausosokanyagwa, kilumbo heyo kabaha digunge kwa digunge.

²⁵ Avo kwa kilumbo hicho kodaha kukombola waja womwizila Mulungu kwa kumkola heyo, kilumbo kana upile mazuwa gose, kuno yowapulila.

Yesu yuyo Mtambika wa idigunge yaiyeka

²⁶ Avo mtambika mkulu yuno katugamba nghani, kangʼala kabule wiho hebu mibangu, kasegezwa muna wanhu watozile, kawela uchana kubanza ulanga.

²⁷ Heyo hasulukila kulava nhosa za matozo gake, kamba waja watambika vuwasongaga kuilavila nhosa wenyego, kileka watambikile matozo ga wayagwe; bali yuno kaitenda vivo mwanza umwe, haja hayailavile muhanga mwenyecho.

²⁸ Kilumbo Inzuma iweka wanhu mkunyeka, wagambe watambika wakulu; bali longa da mduwilo dihamule ija inzuma kuchugu, jomwika Mwana, yagambe mtambika yagangamale milongo kwa milongo.