Waebrania 6 - Lagano da Isambi

Kwikonhola chusa kamba mgunda udumilizwe

¹ Avo tuhagaleka malangulizo ga ichanduso ga Kristo, tugendelele kuwalangukiza galumbile mduganye; kabili sukutwike nghwambaza, kuno tuwalanguliza kamba mzileke sanghana zikomaga, mtamanileni Mulungu!

² Tuleke malangukizo ga ubatizo na ga kwikilwa mikono, ga kuzuka kwa wafile na kija ikitala cha ngunge kwa ngunge.

³ Avo togendelele hamwande, Mulungu yahatulekesa.

⁴ Kwa mzoko waja wamalile kwinghigwa mulangaza mmoyo, na kukilanza kigolelo kilawile kuulanga, na kugolelwa Loho Yangʼalile,

⁵ na kudilanza Longa dinogile da Mulungu, na kuzilanza mhiko za undewa wonda wize,

⁶ avo wagambile hivo wahagaleka, hondaidahike kabili kuwabweza chusa, kwiza waikonhole; kwa mzoko awo wamuwamba mumsalaba Mwana wa Mulungu mwanza wekabili, hamonga na kumnanga kimwagaiya.

⁷ Kilumbo mgunda kamba mvula ihatowa miyanza bwando, ulelaga mboga uwo umwiguto kwa waja walimilwe, kuno umotezwa na Mulungu.

⁸ Bali uhalela mizomola na minyovu, wolemigwa, imala baho wodumilizwa, kwiza wobwinhigwa umoto.

⁹ Komu mweye wanogelwa, na iwe tuhalonga hivo, kwa kivugulo chenu tutogola mmoyo, kamba gaja ganogile gatugolelwe ga inghombola, mgagoga.

¹⁰ Kilumbo Mulungu kabule uponela, hondayazisemwe sanghano za nogelwa jenu, gaja gamsanghane, mtuniza twaga jake na kuwasanghanila wangʼalile kulawa uhenga na lelo dino.

¹¹ Komu togesa nghani, kila imonga wenu yaisimbilike vivo, yakigoge kija kibetelo chetu chose vikimile, kuvikila kimambukizo!

¹² Giladi sukumugwe ukoka, bali muwakoleleze waja wahalile vilagilo kwa nzila ya nhamanilo na kwazaganya.

Duwilo ja Mulungu ditwingha mhiko za kumtogola

¹³ Aho Mulungu hayamwikile Abrahamu kilaga, kaiduwila na kuitapa mwenyego, kwa mzoko kuduhu yagambile mkulu kubanza Heyo.

¹⁴ Kalonga, Ihoko nokutuniza, nikwinghe ulelwa bwando nghani.

¹⁵ Na heyo viyafunyile umoyo, kakivika ikilaga kija.

¹⁶ Wanhu wahaiduwila, wotambula ija yali mkulu kubita hewo; avo ikiduwilo kimalaga bamila jose kumwawo, na kuigela mhiko ija imbuli.

¹⁷ Na heyo Mulungu viyagesile nghani kuwalagila waja wene ikilaga, kamba goyolonda hagagimbukaga ngʼo, kagela kiduwilo hamonga na ikilaga, kileka waituze.

¹⁸ Magweka gano mabili gabule ugimbulilo, kwa mzoko havidahika Mulungu yalonge utungulu; avo katwingha mbuhilo yene mhiko tweye tumkimbilile, tudahe kukigoga kibetelo chetu kija kitwikilwe.

¹⁹ Acho tokigoga kigambe kizimbizi chene mhiko kwa miyoyo yetu, hakikanhikagwa, kingila mumo mgati mdingʼanda da Mulungu (dili hiko kuulanga) kubita dija guwo dizuwile iwanhu.

²⁰ Amo mumo yengile Yesu, katuvugulila inzila, yagambile Mtambika Mkulu wa milongo kwa milongo, kamba Melkisedeki viyakalile.