Waebrania 4 - Lagano da Isambi

¹ Avo na tweye natudumbe, sikuyoneke imonga wenu yaswelile, kilumbo kija ikilaga cha kwingila kuli imhumulo yake tanhu kihali.

² Kwa mzoko na tweye tupetelwa uja usenga unogile kamba waja; bali dija dilonga diwapetelwe, hadiwakolele vuwadihulike, kilumbo hawaigondanye na nhamanilo.

³ Atweye tumtamanilaga Mulungu kwiza tokwingila kuli imhumulo ija, kamba viyalongile, Kileka kwa kuwonela lusango niiduwila, kamba Hondawengile ngʼono kuli imhumulo yangu! na zija sanghana zake zikala zizigile kusanghanwa haja hayazigile kuumba imbago.

⁴ Kilumbo kuna hanhu kailonga mwenyecho, Siku ja fungate Mulungu kahumula muli zisanghana zake zose.

⁵ Naho haja kalonga, Hondawengile ngʼono kuli imhumulo yangu!

⁶ Higo gatangika, Tanhu wabaho wondawengile; bali waja wasongile kupetelwa, hawengile kilumbo walema kumtogola.

⁷ Milongo bwando viibitile, kaitindimika siku viyagwe iyo ino ya dilelo, viyamulongele Daudi, dilonga dinongile mhunde, Lelo vonda mdihulike dizwi jangu, sukumsikipale miyoyo yenu!

⁸ Kilumbo kamba maza Yoshuwa yawagalile kuli imhumulo, kahi hisambiyalonge siku iyagwe ili kuchugu tanhu.

⁹ Avo baho tulongela, Yakuko mhumulo, wanhu wa Mulungu tanhu wekilwe.

¹⁰ Kwa mzoko yuja yengile kuli mhumulo yake, kozihumulila sanghano zake, kamba Mulungu viyazihumulile sanghano zake mwenyechwa.

¹¹ Avo sambi natwiswagize kwingila kuli imhumulo ija, sikuhoneke munhu yondayagwiswe, yahakola malangulizo gawo waja walemile kutogola.

Longa da Mulungu dokutwa

¹² Kilumbo Longa da Mulungu dijo dina upile na mhiko, kabili dokutwa nghani kubita zele dikutwa kuno, najo difosa dovikila kubagula umoyo na loho, navyo vilungo na uloto wa mizege, najo jonanga manogelwa na ngelegeza zikalile mmoyo.

¹³ Haduhu kiumbigwe chondakidahe kuifisa hakihanga chake, komu vose vamwazi hameso gake; na heyo yuyo yagambile senhambo todibwililisa longa jake.

Yesu Mtambika wetu kagezigwa kamba twetwe

¹⁴ Avo na tugoge gaja gatuvumile, kilumbo tunayo Mtambika Mkulu yacholile uchana nghani kubita ulanga wose, yuyo Yesu Mwanage Mulungu.

¹⁵ Kwa mzoko mtambika mkulu ituli nayo iyo yuyo yagaduke hamonga na tweye, yadahe kutuseseza kwa kitanda cha udodwa wetu; kilumbo heyo kagezigwa muna gamagweka gose kamba twetwe, komu hatozile mbuli.

¹⁶ Avo kicholeni tukikwenhukile kigoda chake cha undewa halibule kidumbo, vondatugolelwe dibazi na uholo, twibone na Heyo vondatusulukile kutazwa.