Waebrania 3 - Lagano da Isambi

Yesu viyombanza Mose na kutwingha imhuniulo isigale kumwake Mulungu

¹ Avo mowandugu mngʼalile, mkemigwe hamonga na tweye na nghemo ilawile kuulanga, Bunhulileni meso kwa Yesu, heyo tumvumile yuyo Mtumigwa na Mtambika mkulu.

² Heyo kakala mtamanilwa muli zisanghano zija ziyenghigwe, kamba Mose viyakalile mtamanilwa muli ingʼanda yose ya magweka ga Mulungu.

³ Ayuja yaizengile ingʼanda, kotunilwa kubanza ija ingʼanda senhambo; vivija Kristo vimgamba yatunilwe kubanza Mose.

⁴ Kwa mzoko kila ngʼanda izengagwa na munhu, bali yovisanghana vyose iyo Mulungu.

⁵ Na heyo Mose kakala mtamanilwa muli ingʼanda yose ya Mulungu kamba mtumigwa yoteganya gose, kagasindila gondagalongwe.

⁶ Komu Kristo kasanghana kamba Mwana yali mwene ngʼanda yake; viyemelaga ngʼanda yake iyo tweye, tuhaigangamaza miyoyo yetu isamhuke, kuno tubasiliza kuidundula mkibetelo chetu, tuvike ikimambukizo.

⁷ Avo mina kamba Loho Yangʼalile viyolonga, Lelo vonda mdihulike dizwi jake,

⁸ Sukumwiwambilile miyoyo yenu kamba haja, vuwamgelile lusango Mulungu, siku ija vuwamgezile kuja kuluwala.

⁹ Baho tata zenu wangeza na kundinga, viyemela wakala wagawene magweka gangu miyaka milongo mine.

¹⁰ Ulelwa hiwo womana kunhibula umoyo, kileka nongile, Mazuwa gose wokwaga nzila mmiyoyo mmwawo, hawazitangile nzila zangu.

¹¹ Kileka niiduwile kwa kuwonela lusango, Hondawengile ngʼwene kuli imhumulo yangu.

¹² Teganyeni mowandugu, kumwenu segeyawe imonga yana moyo wihile, ulema kumtamanila Mulungu, ukinega kumwake Heyo yali na upile!

¹³ Komu mwizume wenyego mazuwa gose, ihali hokemigwa lelo, giladi kumwenu sikukoneke mwene moyo mdala, ubalaganywe na matozo!

¹⁴ Kilumbo tuziga kugalamka wayage Kristo, tuhakigoga kibetelo chetu cha ichanduso, sikukituzuhuluke kuvikila kimambukizo.

¹⁵ Baho ilongigwa, Lelo vonda mdihulike dizwi jake, sukumwidumaze miyoyo yenu kamba haja umwaka, hamkalile wene usungu!

¹⁶ Avo vuwahulike walemile kutegeleza iwo walihi? Iwo wawaja wose walawile Misri, walongozwa na Mose.

¹⁷ Kabili iwo walihi waudinghule umoyo wake miyaka milongo mine? Iwo wawo watozile, wadanganike kuluwala, na mitufi yawo ilekigwe kukuja.

¹⁸ Kabili iwo walihi wayaiduwilile kamba hondawengile ngʼwene kuli imhumulo yake? Iwo wawaja walemile kutogola.

¹⁹ Na tweye tuvyona kamba hawadahile kwingila, kilumbo hawamtamanile.