Waebrania 2 - Lagano da Isambi

Nghombolwa itugambile kwa Yesu yangʼazulwe; Yesu yuyo kilanja chetu na Mtambika mkulu

¹ Avo itwandama kugateganya nghani malangulizo gaja gatuhulike, segetugabanange!

² Kilumbo ihawa Longa dija dipetigwe na malaika, dikala digangamale, na tozo jojose hebu bamila digolelwa lihilo da ihoko,

³ chevule, tweye tohonaze kamba tuhaizela nghombola nghulu kamba ino? Kilumbo isonga kupetwa na heyo Mndewa Yesu, imala ihuguzwa kumwetu na waja waihulike.

⁴ Na heyo Mulungu kaisindila hamonga na vilolomboto na vinzonza na mhiko bwando, kawagolela wanhu Loho ingʼalile kamba viyagesile.

⁵ Kwa mzoko siwo malaika wayenghile kuutawala ulumwengu ukwiza, uja utulonga.

⁶ Komu kuna hanhu halongigwe hosindila kamba, Munhu icho choni, kileka umgese, na mwana wa munhu icho choni na heyo, kileka umulole?

⁷ Kumuhunguza kipigiti kidodo, segeyagambe kamba malaika; kumvaza mulufia wa iyenzi na nhogolwa, kumwika yavitawale vinhu vyose viusanghane.

⁸ Kabili kumwikila gose hazinyayo zake, husigaze kinhu. Komu sambi hatunavyona kamba vyose vikigwa hasi hamwake.

⁹ Bali tomona Yuja yatendigwe mdodo kubanza malaika, yuyo Yesu yaulanzile usungu wa kudanganika, giladi bazi da Mulungu diwezile wanhu wose, kavazigwa mulufia wene iyenzi na nhogolwa, kwa kilumbo viyafile na kugaduka.

¹⁰ Avo imwandama Mulungu yaviumbile vyose vilibaho, kabili Heyo iyo yoviduganya, kumtuniza yuja yondayagale wana bwando kuli iyenzi, yagangamale muna umgaduko haja hayawakombole, giladi yagalamke kilanja wawo.

¹¹ Kwa mzoko heyo yowangʼazula, na waja wongʼazulwa wose wolawa hamonga kumwake Heyo Yumwe; ikilumbo kicho na heyo honile kinyala kuwakema “ndugu zake”, kalonga,

¹² Nowapetela ndugu zangu magweka ga tagwa jako, nokulavila nyila gweye hakindibwindibwi cha didale da wasagulwe.

¹³ Kabili kalonga, Niye kwiza nomtamanila Mulungu; kuno yobasiliza, Lola niye nabaha hamonga na iwana wano wangolelwe na Mulungu.

¹⁴ Viyemela wana waja wahanganikila lukuli lwene mulopa na nyama, avo na heyo kahanganikila lwawo, giladi kalonda kwa kifo chake yambanange yuja yagambile mwene mhiko za kudanganika, iyo yuja Mwenembago.

¹⁵ Kabili kalonda kuwakombola wose wagogigwe muutumwa wa kifo kuno wodumba milongo yose kudanganika.

¹⁶ Kilumbo siwo malaika wayagesile, komu waja wa ulelwa wa Abrahamu.

¹⁷ Kileka avo vimwandama yalingane na ndugu zake muna gamagweka gose, yagambe mtambika mkulu mwene dibazi na utamanilwa, yailave muhanga kwa matozo ga wanhu wake hameso ga Mulungu.

¹⁸ Kwa vija viyagaduke na kugezigwa, mumuja kodaha na kuwataza waja wogezigwa.