Waebrania 13 - Lagano da Isambi

Vitungʼazulwa kwa nzila ya unogelo

¹ Kaleni na kwinogela kidugu!

² Sukumwisemwe kugomela wahenza, kwa mzoko kwa kutenda hivo, wayagwe wogomela malaika, hawavitangile.

³ Wagelegezeni waja wafungigwe, kamba mweye mfungigwa hamonga nawo; wagelegezeni wene kutendelwa gehile, kwa mzoko na mweye mogaduka mulukuli.

⁴ Ngʼanda idumbigwe na wanhu wose, na mkasano na sano jake waigondanye kwa kuitegeleza, muli ungʼavu; kilumbo Mulungu kowatagusa wagoni na waja wose wobananga indowa ya ngʼanda.

⁵ Sukumuwe na dongho ya mhiya, bali mwenele na vija vumpata, kwa mzoko Mulungu kalonga, Hondanikuleke hebu kukwasa.

⁶ Avo tugangamala, kuno tulonga, Magana yahanhaza, hondanidumbe kinhu; munhu konhenda choni?

Yesu kafa kunze ya inghambi; na tuwategeleze vilongozi

⁷ Waja wampeteleni Longa da Mulungu, wakalile walongozi wenu, muwagelegeze; muulole uchozi wawo na kifo chawo, muwakole vuwamtamanile Mulungu!

⁸ Yesu Kristo viyali dilelo na mayo, vivo yondayawe digunge na idigunge.

⁹ Sukumuhindulwe na malangukizo gayagwe ga isambi, gohohotola umoyo; kwa mzoko vinoga, umoyo ugangamazwe na mhiko za uholo, si kwa miko ya vyakuja, kilumbo waja wavikolile, hawatazigwe kinhu.

¹⁰ Tweye tunaho hanhu hetu ha kulavila nhosa za nhambiko, hazijagwa na waja wasanghanila ija ihema.

¹¹ Kwa mzoko mulopa wa wanyama uhamala kugaligwa Hangʼalile na mtambika mkulu giladi ja matozo, avo mitufi ya wanyama waja yosomigwa hamoto kuja kunze ya inghambi.

¹² Avo vivo Yesu kagaduswa kunze ya idiwambo, giladi yawangʼazule wanhu kwa mulopa wake mwenyecho.

¹³ Natumgendele kunze ya inghambi, tuhanganikile kinyala chake!

¹⁴ Kilumbo hano twabule wambo dikalaga digunge, komu todizahila dija wambo dikwiza.

¹⁵ Avo tumlavile Mulungu hohose nhosa za nhambiko za nhogolwa uwo mujo wa milomo itambula twaga jake!

¹⁶ Sukumwisemwe sanghana zinogile, na kuigolela na wayenu igenu, kilumbo nhosa kamba hizo zizo zimnogeza Mulungu.

¹⁷ Wategelezeni waja womulongozani na muwatendele udekedeke, kilumbo hewo wakalaga mangweda kuzipulila loho zenu; kwa mzoko hewo iwo wonda wauzwe walave mpeto wenu; giladi wazidenghelele sanghana hizo, halibule nhwanganiko, kilumbo hivo vivo vihile kumwenu.

Kwilaga na ndamusilo

¹⁸ Tutambikileni tweye, kilumbo twihuguza kamba tungʼala mmiyoyo, kuno tolonda kutenda uchozi unogile muna gamagweka gose!

¹⁹ Na niye nompembelani nghani kunipulila kwa Mulungu, giladi nibwezigwe mbwisa kumwenu.

²⁰ Na Mulungu Mwene tindiwalo, yamlavile muna ukudanganika Mndewa wetu Yesu Kristo kwa mhiko za mulopa wa Lagano ja Idigunge na digunge, na heyo yuyo Mchunga Mkulu wa zinghondolo,

²¹ yawagongomanye muna gamagweka gose, mtende goyolonda, kwa mzoko Heyo yuyo yotwingha tusanghane gomnogeza hakihanga chake, tuhamkola Yesu Kristo, yuyo yagambile kutunilwa halibule na uzigililo. Amina.

²² Mowandugu, nompembelani mgabokele goya malonga gano ga uhozi, kwa mzoko nimwandikilani malonga madodo.

²³ Mvitange kamba ndugu yetu Timoteo kafunguligwa, na heyo yaheza mbwisa, nokibona namwe hamonga na heyo.

²⁴ Ndamusileni wose waja womulongozani, na wanahina wa kumwenu wose; na wano wali hano Italia womulamusani.

²⁵ Uholo na uwakalile mweye mose.