Waebrania 12 - Lagano da Isambi

Habali Tata yotusuna; tindiwalo uwo mujo wa msuno

¹ Kilumbo tunawo wasindi bwando watubiduke kamba mabingu, natuinenule mizigo yose ituhila nayo, na tuinege na matozo gaja gatunanahile; kabili kuja ukuihuma kutuli nako, na tuikimbilile ningo ya mwazaganzo!

² Kuno tubunhula meso getu kumwake Yesu, kwa mzoko yuyo yatusongeleze kumtamanila, kabili yuyo yonda yatuduganye; heyo kagaleka ganogezaga moyo wake, kaidwika msalaba, honile kinyala, imala kakala ukulume hana ikigoda cha undewa wa Mulungu.

³ Mgelegezeni Yuno yafunyile umoyo mzahizahi uja wa wabananzi; segemugwe udonhi mmiyoyo mmwenu, hebu kulegela!

⁴ Viyemela hamnatenda nghondo mlave mulopa tanhu, kuno mlema matozo.

⁵ Kabili mwisemwa uja uhozi, Mulungu uyalongile namwe kamba wana, Gomwanangu, sukuwisemwe kamba uhazumwa na Magana, hebu kusinduka umoyo, kamba uhakomhokelwa na Heyo.

⁶ Kilumbo Magana, yuja iyamnogele, komzuma, na Heyo komulanha kila mwana yamvumile.

⁷ Muhazumwa, funyeni umoyo, kilumbo Mulungu kowatendela kamba wana, avo iyo mwana yalihi yalekagwa kuzumwa na tataake?

⁸ Kamba muhawa bule uzumilo, ijo hanganikilo da wose, ihawa vivo, mgalamka wana wa nokola, siwo wana wa mulungwana.

⁹ Hamonga na higo tukala na tata zetu watulelile watuzuma, na tweye tuwahulika; che, honda tugangamale nghani kumuhulika Tata wetu yazilelile loho zetu, tugolelwe upile?

¹⁰ Na waja watutowa mazuwa madodo, kamba vuwokala wogesa wenyego kamba ganoga; komu Yuno kotutowela ganogile, giladi tuhanganikile mngʼazuko wake.

¹¹ Msuno wose uhalawilila, hatuugesa kamba mdenghelo, bali kwiyalala; komu mazuwa ga kuchugu, waja walangulizwe nago wowona mujo, kuko kugoloka na tindiwalo.

¹² Avo makono galegele, nago mavindi gaholole, gageleni gangamalo kabili!

¹³ Gatendeleni magulu genu nzila igoloke, kwa mzoko waja wobambagula segewage, bali wahonyokwe goya.

Bamila ja Esau

¹⁴ Zahileni kukala goya na wanhu wose, kabili mngʼazulwe, kilumbo hata yumwe hondayamone Magana, kamba haupatile mngʼazulo.

¹⁵ Teganyeni, kila imonga wenu segeyaswele uholo wa Mulungu hebu kuuhungula, sikudimzukile sina da usungu, diwagadusani na kugela wanhu bwando uchapalisi.

¹⁶ Sukuyawe baho mgoni hebu yoleka kudumba Mulungu kamba Esau, yagulize uhazi wake, uwo mulelo wa kilanja, kwa kilumbo cha chakuja kimwe!

¹⁷ Kilumbo mvitanga haja hachugu, viyalondile kusola dija motelo, kasigwa; kwa mzoko hahawene kabili hanhu ha kwikonholela, viyemela kahazahila nghani kwa mahozi.

Sinai kimoso cha Sayuni; Undewa wetu hautikisika, bali moto utimbula

¹⁸ Kilumbo hamvikile hana digongo dibabasagwa, kuno ukwaka moto, hebu hana dibingu dititu, ziza na ubeho mkali;

¹⁹ hebu hali zinyangi za mhalati na mululumo wa malonga, gawapotile wene kuhulika, wapembela sukuwalongelwe mbuli ziyagwe.

²⁰ Kwa mzoko hawadidahile kudibokela dija lagizo dilongigwe, Na yagambe mnyama yondayadikwase digongo, yakomigwe kwa kutowigwa na mabwe, hebu kuhomwa na migoha.

²¹ Na gaja goneke gakala gawagelile kidumbo kikulu nghani, kileka Mose kalonga, Ningilwa na kidumbo na kingwaya bwando.

²² Komu mweye mvika hana digongo da Sayuni na Wambo da Mulungu Yali na Upile, uwo Yerusalemu wa Kuulanga, na madale ga malaika bwando mizo kwa mizo owahingila.

²³ Mtinghano mkulu wabaho wa kanisa da waleligwa wa ichanduso wandikwe kuulanga, na Mulungu kabaho yuyo mulamuzi wa wanhu wose, na loho za wanhu wagoloke waiduganye.

²⁴ Na Yesu Msenga wa Lagano da Isambi kabaho, na mulopa wake wa kunyunyiza miyoyo, ulongaga na mhiko kubanza uja wa Abeli.

²⁵ Teganyeni sukummuleme Heyo yolonga; kilumbo kamba waja wamulemile viyalongile nawo muisi, hawadahile kukimbila, tweye todahaze kukimbila, tuhainega nayo yahalonga na tweye kulawa kuulanga?

²⁶ Dizwi jake haja (hadigongo da Sinai) diitigisa iisi siku zija, komu sambi kuna kilaga kilonga, Niye noigudemeza isi kabili mwanza uyagwe; si isi iiyeka, bali hata ulanga.

²⁷ Dija dilonga, Mwanza uyagwe, dipeta kamba vija vitigisika vihinduke, kwa mzoko na hivo viumbigwa tu, giladi vija havitigisikaga vikale vivija.

²⁸ Kilumbo tugolelwa undewa hautikisikaga, natulave nhogo, ilawabaho tumtumikile Mulungu kwa kumnogeza hamonga na udekedeke na kidumbo!

²⁹ Kilumbo Mulungu wetu kagalamka moto ujaga utimbula.