Waebrania 11 - Lagano da Isambi

Migalu ya nhamanilo: Abeli, Henoki, Noa; Abrahamu na Sara vuwamtogole Mulungu

¹ Kumtogola Mulungu kuko kutamanila gaja gotubeta, na kugahuguza gaja hakonekaga mmeso.

² Kwa mzoko hiwo wahenga zetu wasindilwa vivo, kamba wakala wene kumtogola Mulungu.

³ Kwa kumtogola Mulungu tuvitanga kamba ulumwengu ugongomanywa kwa Longa jake Mulungu, na vija vikoneka kwa meso vilawilila muja muna ivinhu havyonekaga.

⁴ Kwa kumtogola Mulungu, Abeli kamulavila Mulungu nhosa ya nhambiko ikalile nghulu kubanza ya Kaini, imsindila kamba kagoloka, kilumbo Mulungu kanogelwa na nhambiko yake; na heyo viyemela kadanganika, tanhu yahalilonga.

⁵ Kwa kumtogola Mulungu, Henoki kasoligwa uchana, giladi sekeyadanganike, wala hawamuwene kabili, kwa mzoko Mulungu kakala yamsolile; na heyo viyakalile hanasoligwa tanhu, kakala yasindilwe kamba kamnogeza Mulungu.

⁶ Komu kamba haduhu nhamanilo, havidahika kumnogeza Mulungu; kilumbo mwene kumgendelela imwandama kutogola kamba Mulungu kakuko, kabili hewo wonda wamzahile, kowaliha.

⁷ Kwa kumtogola Mulungu, Noa kalagusilwa magweka gakalile haganakoneka tanhu, kamtegeleza Mulungu kukigongomanya kiya, yawahonye wakalile mngʼanda yake; vivo yautaguse ulumwengu, kagalamka muhazi wa ihoko, igalagwa kwa kumtamanila Mulungu.

⁸ Kwa kumtogola Mulungu, Abrahamu viyakemigwe ka-vumila kuhama, yachole hanhu kwiza yagolelwe kamba uhazi wake; yomana kuhama, hatangile koyochola.

⁹ Kwa kumtamanila Mulungu kakala mulilingwa muna iisi iyalaganilwe, kamba si yake, kakala mmahema hamonga na Isaka na Yakobo, wakalile wayage wene ikilaga kikija.

¹⁰ Kilumbo kakala yodilolela wambo dili na ngʼwambaza digongomanywe na kuzengwa na Mulungu.

¹¹ Kwa kumtamanila Mulungu na heyo Sara kagolelwa mhiko ya kusola inda haja hayakalile mvyele, kilumbo kamgesa Yuja yalavile ikilaga kamba mtamanilwa.

¹² Avo heyo yakalile mwene lukuli lulalile, waja waleligwe na heyo wagalamka bwando kamba nhondo za kuulanga, na kamba misenga ya mumgwazo wa bahali, haipetagwa.

¹³ Hewo wose wadanganika, kuno womtamanila Mulungu, vilema hawagapatile gaja ga ikilaga chawalongelwe; bali wagalola gahali kutali tanhu, wavumila uhenza muisi kamba wabita nzila.

¹⁴ Kwa mzoko waja olonga hivo, wokoneka kamba wene kuzahila isi ya kumwawo.

¹⁵ Na hewo kamba waigelegeze isi ija iwalawile, maza wahabwelile.

¹⁶ Komu sambi waigesa isi inogile nghani kubanza ija, ayo iyo ili kuulanga; avo Mulungu hona kinyala cha kukemigwa Mulungu wawo, kilumbo kawasanghanila wambo.

¹⁷ Kwa kumtamanila Mulungu, Abrahamu viyagezigwe kamulava Isaka yagambe ngʼombe wa nhambiko, heyo kakala mwana nyadimwe, yuyo wa idiwangala.

¹⁸ Na heyo kakala yavibokele vilaga vyose viyekilwe kamba, Wa Isaka iwo vonda wakemigwe lukolo lwako.

¹⁹ Kagelegeza kamba Mulungu komzusa hata muli iifa kuzimu; avo kampata viyagwe bahaja viyamalile kumulava.

Isaka, Yosefu, Mose, Rahabu vuwakigogile kilaga

²⁰ Kwa kumtamanila Mulungu, Isaka kammoteza Yakobo na Esau kwa giladi da magweka gondawone.

²¹ Kwa kumtamanila Mulungu, Yakobo viyakalile behi kudanganika, kawamoteza kila imonga wa waja wanage Yosefu, kawapulila kuno yokinamila, yosagamila inhonga ya mkongoja wake.

²² Kwa kumtamanila Mulungu, Yosefu viyakalile tanhu hanadanganika, kavimanya kamba wana wa Israeli kwiza woilawa isi ino, kawalagiza mizege yake.

²³ Avo vivo wavyele zake Mose vuwamtamanile Mulungu, viyaleligwe wamfisa miyezi midatu, kwa mzoko wamona imwana kanoga nghani, hawadumbile mbilambila ya mfalme.

²⁴ Kwa kumtamanila Mulungu, Mose viyakalile munhu mgima, kalema kukemigwa mwanage biti Farao;

²⁵ kanogelwa kutendelwa gehile hamonga na wanhu wa Mulungu, kalema uhondo wa ubananzi ugambile kwiza wobita.

²⁶ Kwa mzoko kagelegeza kamba, kuzelwa kwa sosombi zake Kristo ijo bikilo diselelaga kubanza igamali gose ga Misri; kilumbo kagamanya maliho ga ikimambukizo.

²⁷ Kwa kumtamanila Mulungu, kalawa Misri, hadumbile lusango lwa mfalme, kwa mzoko Yuja honekaga, kainanahiza nayo kamba vija komona.

²⁸ Kwa kumtamanila Mulungu, kaigongomanya Pasaka ya Nghombolwa, na kubaka mulopa giladi Mwene kuwangamiza waleligwe ikilongozi sikuyawakwase wawo.

²⁹ Kwa kumtamanila Mulungu, kabita muli ibahali indunghu kamba mbago inyalile, komu Wamisri vuwagezile kuloka, wadidimila.

³⁰ Avo vivo Waisraeli vuwamtamanile Mulungu, mhongono za Yeriko zigwa haja vuwazibiduke siku saba.

³¹ Kwa kumtamanila Mulungu, Rahabu viyemela kakala mtwanzi mgoni, kahona, hangamile hamonga na waja wabamile, kwa mzoko iwasepi kawabokela goya, kawagela nzamo mmoyo.

Nhamanilo viigangamaza hamigaduko

³² Nongeze kabili kwa mzoko wa ulegeho, kamba nihagasimulila magweka ga Gideoni na ga Balaka na ga Samsoni na ga Yefta na ga Daudi na ga Samweli na ga Watulandagu.

³³ Awo kwa kumtamanila Mulungu watenda nghondo, wawahuma wafalme, walamula kwa fiyuko, wavona vilagilo viviiduganye; waifumba milomo ya wanyama songo.

³⁴ Mizoto ikwaka nghani waivuwaliza, wahona mmizele ikutwa; vuwakalile wanyekile, wagolelwa miguvu iyagwe, wakala migalu kuli inghondo, wagaswata madale bwando ga wanhu yungwa.

³⁵ Kwa kuzuka, watwanzi wayagwe wabokela kabili waja wadanganikile; komu wayagwe vuwagaduswe, walema kukombolwa, giladi wagolelwe uzusi unogile kubanza uja.

³⁶ Wayage wagezigwa kwa uponela hamonga na kusunwa, wayagwe wafungigwa minyololo, wageligwa mvifungo.

³⁷ Wakomigwe kwa kutowigwa na mabwe, wahondigwa, wadegigwa, wadanganika kwa kukubugizwa mizele, wawingwa hosehose waicholela, wakavale mikwembe ya nghondolo na mikwembe ya mhene, wakala na nzala, wagaduswa na kutendelwa gehile.

³⁸ Ihoko haigambile ulumwengu uno kukala nawo; wahemela mmihulo na mmigongo na mmisimo hasi muisi.

³⁹ Awo wose vuwagaduke, baho waduganye kumtamanila Mulungu, komu hawakiwene kilagilo vikivikilizwe.

⁴⁰ Kilumbo Mulungu kakala umwaka yotwikila kinhu kinogile nghani, kwa mzoko waja sukuwaiduganye, kamba tweye tuhaswela.