Waebrania 10 - Lagano da Isambi

Nhosa ya Yesu itwingha vikilizo da kungʼazwa mwanza umwe

¹ Inzuma igalamka kamba sisila diiyeka da magweka ga ihoko gonda galawilile, sicho kihanga chawo genyego, bali ilingana nago; viyemela zija nhosa za nhambiko zilavagwa mwaka kwa mwaka na milongo kwa milongo, havidaha kuwengha uduganyo wene kuvilava.

² Kilumbo waja wene kutambika, kamba wahamalile kusunhigwa matozo mwanza umwe, wahalekile kugala nhosa za nhambiko; avo vilihi vuwotanga mmiyoyo tanhu kamba matozo gahali gako?

³ Avo zinhosa za nhambiko zizo ziwenghaga ngelegeza za matozo gawo mwaka kwa mwaka!

⁴ Kilumbo mulopa wa ngʼombe na wa mhene haudaha kusegeza matozo.

⁵ Komu Heyo vondayengile mulumwengu, kalonga, Ngʼombe za nhambiko na vyakuja vya nhosa huvilondile, bali kunisanghanila lukuli.

⁶ Ngʼombe za nhambiko zija zisomagwa ngima, na nhosa za kuliha matozo nazo hazikunogeze Gweye.

⁷ Baho nongile, Lola nokwiza; magweka gangu gandikigwa muna ikitabu cha Inzuma, nigasanghane goulonda gwegwe, Mulungu.

⁸ Ichanduso kalonga, Ngʼombe na vyakuja vya nhosa, ngʼombe zija zisomagwa ngima, na nhosa za kuliha matozo huzilondile, hazikunogeze, vilema zilavagwa kilumbo cha Inzuma viilagize.

⁹ Imala kalonga, Lola nokwiza, nigatende goulonda gweye; avo koditengula lagizo dija da ichanduso, giladi yadisimbilike dija da isambi.

¹⁰ Kwa manogelwa ago ga Mulungu tweye chose tungʼazulwa mwanza umwe aho, lukuli lwa Yesu Kristo vilulavigwe kamba nhosa ya nhambiko.

¹¹ Kila mtambika kemaga mazuwa gose, yotambika hamonga na vinhu vya nhambiko viyalavaga nhosa miyanza bwando, viyemelaga hazidaha kusegeza matozo.

¹² Komu Yuno kalava nhosa imwe iyeka ya nhambiko kwa kilumbo cha matozo ga wanhu, iyo ya digunge na digunge, imala kakala ukulume kwa Mulungu.

¹³ Vino kowabeta wandumu wake wekigwe hasi hamagulu gake.

¹⁴ Avo kwa kuilava ija nhosa yake imwe ya nhambiko, kawengha wene kungʼazulwa vikilizo digambile ja idigunge na digunge.

¹⁵ Na heyo Loho Yangʼalile kotusindila vivo, viyanduse kulonga,

¹⁶ Dijo Lagano jonda nilagane nawo, kolonga Bwana, nowengha malangukizo gangu gakale muli zingelegeza zawo, viyemela nogandika muli imiyoyo yawo.

¹⁷ Kabasiliza, na matozo gawo na ubananzi wawo honda nigagelegeze kabili.

¹⁸ Avo ago gahasegezwa, aho haduhu kabili kulava nhosa ya nhambiko kwa kilumbo cha matozo.

Samhuko da kumkwenhukila Mulungu, bule kubeta lusango

¹⁹ Mwandugu, samhuko jetu ja isambi ijo dino, twinghigwa nzila ya kutwingiza Hangʼalile, na mulopa wa Yesu.

²⁰ Nzila iyatufungulile iyo ya isambi yene upile, kubitila dija diguwo da ihema Henyecho, lulo lukuli lwake.

²¹ Na heyo kagalamka Mtambika Mkulu wetu wa ngʼanda ya Mulungu.

²² Avo natumgendele kwa miyoyo ingʼalile, iwambilile kumtamanila, kwa vija vitunyunyizilwe sikututange gehile, na zinghuli zetu vizisunhigwe na mazi gangʼazulaga.

²³ Na tubasilize kukigoga kibetelo chetu, segetudonhe kukipeta; kwa mzoko heyo yatwinghile kilaga chake yuyo mtamanilwa.

²⁴ Twiteganye twetwe kwa twetwe na kwiswagiza kuinogela na kusanghana zose zinogile!

²⁵ Imala sukutuleke mitinghano yetu, kamba wayagwe vuwazowele; komu tuizume, ibanzile kilumbo vitukona ija isiku viikwenhuka.

²⁶ Kilumbo tweye tumalile kugatanga ga ihoko, kabili tuhatoza kwa kunogela matozo, haduhu nhosa ya nhambiko isigale kabili ya kusegeza matozo.

²⁷ Bali kusigale, kuko ukudumba kwa kubeta nhaguso na lusango lwa moto wonda uwaje waja wene dibamila.

²⁸ Munhu yahaizela nzuma ya Mose, kokomwa halibule konelwa bazi, yahasindilwa na wanhu wabili hebu wadatu.

²⁹ Mokonaze, sijo lihilo dihile kubanza dino, dimgambile munhu yamuhondile Mwana wa Mulungu na kugesa mulopa wa Lagano, yangʼazulwe nawo kamba si kinhu, ako kuko kumtugiliza Loho Yamwinghile mhome?

³⁰ Kilumbo tumtanga Yalongile, Lihizo ijo jangu nene, yonda yalihe iyo Nene; kabili, Magana kowatagusa wanhu wa ulukolo lwake.

³¹ Kugwila mmakono ga Mulungu yali Mwene upile, kogela kidumbo nghani.

Wagaduke wahatogola, wojona bikilo wohona

³² Komu zigeseni siku zilongole vummulikilwe; aho mwazaganya nghondo bwando, kuno mgaduka.

³³ Mazuwa gayagwe mulavigwa chalinze, kuno muligwa hamonga na kulumizwa, na hayagwe muhanganikila wayenu wotendelwa gago.

³⁴ Waja wafungigwe, mgaduka hamonga nawo; na gaja mkalile nago, mbokigwa kuno mseka, kwa mzoko mvitanga kamba mnajo bikilo dinogile kubanza gaja, najo hadilalaga.

³⁵ Avo segemchase kibetelo chenu, kilumbo kwiza chomwinghani maliho makulu!

³⁶ Komu mwandamwa na kufunya umoyo, msanghane Mulungu goyolonda, mgabokele gaja gamulagizwe.

³⁷ Kwa mzoko hasigala hadododo henyecho, kolawilila Mwene kwiza, honda yakawe.

³⁸ Na hewo wa lukolo lwangu wene ihoko woupata upile kwa kunhamanila; bali yondayabwele kuchugu, hondayainogeze Loho yangu.

³⁹ Komu tweye si wa kubwela kuchugu tupotele, bali iyo tweye tumtamanila, tuzihonye loho zetu.