Tito 3 - Lagano da Isambi

Tuleligwa chusa na Iloho; msongamagida tumuleme

¹ Bwelela kuwazuma wanahina zetu, wawategeleze watawala na wene mhiko kwa kuikonakona, kabili wetunduwile goya muli zisanghano zose zinogile.

² Sukuwamlige munhu, sukuwawe na ndwagi, bali wene unhu wawacholele wanhu wose mholemhole nghani!

³ Kilumbo na tweye umwaka tukala wabozi, tulemile kuhulika; tukala nokola za dongho bwando zitunogele, twagile; tugendelela kuwa wabananzi, wene migongo na wihilo twetwe kwa twetwe.

⁴ Komu uja unhu wa Mkombola wetu Mulungu, yawanogele wanhu wose, utulawilila;

⁵ Katuhonya tweye, si kwa kilumbo cha sanghana zigoloke zitusanghane tweye, komu kwa bazi jake Heyo yatuhonyile, katusunha mmazi ga kutulela chusa, tugaluke wanhu wa sambi kwa kugolelwa Loho Yangʼalile;

⁶ hiyo iyo iyatwitile bwando haja hayamgalile Mkombola wetu Yesu Kristo,

⁷ giladi kwa uholo wake tupetigwe mwihoko, tugalamke wene kuhala uhazi wetu wa upile wa idigunge, kamba vituubeta.

⁸ Longa dino ijo da ihoko. Na niye nolonda magweka higo ugalangulize nghani na kuwahuguza, giladi waja wamtamanile Mulungu, waziteganye sanghano zawo zinoge kubanza za wayagwe; gano ganoga, nago gago gondagawataze wanhu.

⁹ Komu bamila da ubozi, na mbuli za umwaka na ndwagi na kugombela vinhu vya mwiko winege navyo, kilumbo gabule lutondo hebu mzoko!

¹⁰ Munhu msonga magida mzume mbwisa, na igambe miyanza mibili; kamba havumile, muleke!

¹¹ Uvimanye kamba hiyo kahohotoka, viyemela kaigolela nhaguso mwenyego kwa matozo gake.

Ndamusilo

¹² Vondanimgale kumwako Artema hebu Tikiko, wize chambwisa kuno kumwangu Nikopoli, kilumbo kuno nolonda kukala siku za kihuhwe.

¹³ Zena, yuja mwananzuma, na Apolo wagale mbwisa, uwateganye segewahungukilwe na kinhu mnzila!

¹⁴ Avo na wanahina zetu waifunze kutendela waja waswelile ganogile, na wabanze wayagwe, giladi sukuwaswele mujo.

¹⁵ Wanahina wose wali hamonga na niye, wokulamsa. Tulamusilege waja watunogele muna inhamanilo! Uholo naukale hamonga namwe mose.