Tito 2 - Lagano da Isambi

Uchozi wa kikristo kwa watwanzi, wamhale, nyakadala

¹ Komu gweye longa magweka gagambile na malangukizo ga ugima!

² Wanhu wavyele wagambe wene miyoyo ya kulinganya, wasumbwe, wakalagavu, wene ugima muna inhamanilo, unogelo na mwazaganyo.

³ Avo vivo watwanzi wavyele na hewo nawasanghane uchozi uwagambile wangʼalile, sukuwawe wafyalala hebu nokola wa ngholwa, bali walangulize mbuli zinogile;

⁴ wadahe kuwengha nzewele wamhale wa kitwanzi ya kunogela wakasano na iwana zawo;

⁵ kabili sukuwabanze kiwango, bali wangʼazuke, watunduwile goya ngʼanda zawo, wene lunogenoge na wene kuwahulika wakasano zawo, giladi Longa da Mulungu sekedizeligwe.

⁶ Avo vivo na iwamhale wa ikimbigalo uwazume wakalagale muna gamagweka gose.

⁷ Ukilagusila gomwenyecho kamba iyo ndagusilo ya sanghano zinogile, na muli gamalangukizo muhuguzo na nhogolwa.

⁸ Udipete Longa da Upile hadibamilagwa; yuja yobamila kwiza yagwe kinyala, sekeyadahe kutanga mbuli ihile yoyose ya kutugela kinyala!

⁹ Na nyakadala nawo nawalongelwe, wawahulike mabwana gawo, wawanogeze muna zimbuli zose, segewawabamile.

¹⁰ Sukuwebe, komu wailagusile kamba wene kukalamka na unogi wose, sanghana zawo zose zigalamke vihambo vya langukizo da Mulungu Mkombola wetu.

Unozi wa Mndewa ulawilila otuzumaga

¹¹ Kilumbo unozi wake Mulungu uyogolela wanhu wose wa kuwahonya, ulawilila chalinze;

¹² nawo otuzuma tuuleke uchozi wa kimhazi, segetuzikole dongho za muno mulumwengu, bali siku zino za sambi za kukala muisi, tugalamke wakalagavu wa ihoko na wene mgoloko na wene kumdumba Mulungu.

¹³ Imala tuwalange kibetelo chetu cha kutuhingila vonda kiiduganye, iyenzi ya Mulungu wetu Mkulu na wa Mkombola wetu Kristo Yesu vonda ilawilile!

¹⁴ Heyo yuyo yailavile mwenyecho kwa sosombi jetu, yagambe muhanga wa kuuliha ubananzi wose, giladi yaisolele wanhu wagalamke wanhu wake, iwo waja wayangʼazule, wagangamale na kumsanghanila kazi zinogile.

¹⁵ Ago galonge na kuwazuma, na kuwahuma waja wotoza kwa mhiko zose; munhu sekeyakuzele.