Tito 1 - Lagano da Isambi

Tito yasagule wavyele vilongozi muna gamadale

¹ Niye Paulo, mtumwa wa Mulungu na mtumigwa wa Yesu Kristo kwa mzoko wa inhamanilo iwenghigwe waja wasagulwe, wagatange ga ihoko, wamdumbe Mulungu;

² na waubete upile wa idigunge, uwalaganilwe na Mulungu lulawile mazuwa ga uhenga Heyo Mulungu, na halongaga utungulu,

³ komu mazuwa gake vigaiduganye, kadigubula Longa jake haja hadibwililiswe; na niye ngolelwa kudipeta kamba vindagizwe na Mkombola wetu Mulungu.

⁴ Nokwandikila gweye Tito mwanangu wa ihoko, kwa vija vituli na nhamanilo imwe; uholo ukukalile na tindiwalo dilawile kwa Mulungu Tata na kwa Muhonya wetu Yesu Kristo!

⁵ Kwa kilumbo kino nikuleka kuja Krete, giladi ugongomanye gasigale, wike wavyele muli iviwambo vyose kamba vinikulagize.

⁶ Ihawa munhu yali bule mbuli ihile, mbigalo wa sano dimwe, kana wana watogole inhamanilo, hawanataguswa kamba wachapalisi hebu wene bamila.

⁷ Kilumbo imwandama kilongozi yawe munhu yalibule kinghwaso, kamba mwimilizi wa mbuli za Mulungu; sekeyainogeze mwenyecho mmoyo, sekeyagwe lusango mbwisa, sekeyakoligwe hebu mdwanzi, sekeyawe na dongho ya mhiya;

⁸ bali yawe mgomela wanhu, msanghana ganogile, mwene ugaluga, yagoloke, yangʼalile, mwene moyo wa kulinganya;

⁹ yodigoga Longa dija ditamanilwa, vivija kamba viyaifunzile, giladi yadahe kuwazuma wanhu kwa malangulizo gene ugima, na kuwahuma wene bamila.

Wene kuhindula nhamanilo wagwadabulwe milomo

¹⁰ Kwa mzoko wabaho bwando walemaga kuhulika, wehu wokwagiza kamba wawabala kubanza wayawo; na kumwawo wabanzile iwo Wayuda.

¹¹ Iwagamba hiwo kugwadabulwa milomo, kilumbo wahindulaga wanhu ngʼanda ngima kwa kulanguliza galibule mzoko, kuno woisolela mhiya, ajo ijo pato jawo dihile.

¹² Munhu imonga wa kumwawo kalonga kamba mtulandagu wawo, Wakrete wavwizi nghani, wagalamka mingʼonyo itendaga gehile, wajaga chaka, waboba nghani.

¹³ Usindi uno uwo wa ihoko; avo uwakomhokele nghani, waubwelele ugima kwa kumtamanila Mulungu;

¹⁴ sukuwazikole simo zija za Kiyuda hebu malagizo ga wanhu wahinduke na kugalema ga ihoko.

¹⁵ Wene kungʼala mmoyo, vyose vowangʼalila; komu wene miyoyo michapalisi hawamtamanila Mulungu, kuduhu chonda kiwangʼalile, komu ngelegeza zawo zinyolodoke, miyoyo haitangile kabili gangʼalaga.

¹⁶ Woidundula kamba wamtanga Mulungu, komu muli zisanghano zawo womulema, wombela; iwo wene kwihilwa, wobamila, wabule lutondo lwa kusanghana yoyose inogile.