Sanghano 3 - Lagano da Isambi

Mbetembete hamulango wa dihekalu viyahonele

¹ Siku dimonga Petro na Yohana wachola Kungʼanda ya Mulungu saa kenda, wanhu vuwacholaga kupula.

² Kukala na munhu yaleligwe mbetembete, na heyo kasolagwa na wanhu, yokwikwa mazuwa gose hamulango wa dihekalu ukemagwa unoga, giladi yapule nhosa kwa waja wokwingila mdihekalu.

³ Viyawawene Petro na Yohana wokwingila mngʼanda ya Mulungu, kalonda wamgwelele nhosa na hewo.

⁴ Komu Petro kambunhulila meso hamonga na Yohana, kalonga, “Tulole tweye!”

⁵ Kawabunhulila meso, na heyo yobeta chonda wamwinghe.

⁶ Petro kalonga, “Mhiya na zahabu nabule, komu kinili nacho kicho chonda nikwinghe; kwa tagwa ja Yesu Kristo wa Nazareti ima wima ugende!”

⁷ Kamgoga mkono wa ukulume, kamnyagamula; mhunde migulu yake na ngozongo zake zingilwa mhiko.

⁸ Kenuka mbwisa, kema wima, kandusa kuchola; kengila mngʼanda ya Mulungu hamonga na hewo, yozunguluka kuno yozumhazumha na kumtogola Mulungu.

⁹ Wanhu wose vuwamuwene yozunguluka na kumtunila Mulungu,

¹⁰ wavimanya kamba yuja yuyo yakalile yopula nhosa behi ha mulango unogile wa dihekalu. Wakanganya nghani na kugasinhuka gaja gampatile.

Petro kawapetela wanhu kilaga cha Kristo

¹¹ Avo viyakalile yowandama Petro na Yohana, mhunde wanhu wose wawalundila muna Umsana ukemigwa wa Salomo, wakangawala.

¹² Petro viyawawene kawalongela, “Mweye Waisraeli, vilihi mumkanganya, na tweye motubunhulila meso, kamba kwali mhiko zetu wenyego na nhamanilo zetu zizo zimtendile yuno yachole?

¹³ Mulungu wa Abrahamu, wa Isaka na wa Yakobo, Mulungu wa tata zetu kamtunila msongolo wake Yesu; amweye mumlava na kumbela hakihanga cha Pilato viyalamule yadoholigwe.

¹⁴ Komu mweye mumulema yuja mwene uholo na mwene ihoko, mulonda mgwelelwe mkoma wanhu.

¹⁵ Ayuja mwene kulongoza kuugima mumkoma, komu Mulungu kamzusa kulawa kwa wafile, na tweye twa wasindi wake.

¹⁶ Kabili munhu yuno viyaditamanile twaga jake, ajo twaga jake dimgwelela mhiko ino yumona na kumtanga; na nhamamanilo iyo ya kumgoga Yesu imgelile upile mgima hakihanga chenu.

¹⁷ Avo ndugu zangu, nivitanga kamba mgatenda gano hamvitangile, hamonga na wakulu wenu wose.

¹⁸ Komu avo vivo Mulungu viyagaduganye gayapwililise mwaka mmilomo ya Watulandagu wose, kamba Kristo wake kogaduswa.

¹⁹ Avo yalaleni na kugaluka, giladi nhozo zenu zisegezwe ziwalawe.

²⁰ Avo vonda zimvikileni zija siku za kihozelo, vonda yabwele Mndewa, baho honda yadahe kumtuma Kristo Yesu yuja mgolelwe haikilongozi.

²¹ Ayuja imwandame kuusola Undewa wa Kuulanga kuvikila isiku, vinhu vyose vonda vigalamke sambi, kamba Mulungu viyalongile umwaka mmilomo ya Walaguzi wake wangʼalile.

²² Kwa mzoko Mose kalonga, Magana Mulungu wenu komwinulilani Mlaguzi muna mlelo wenu, yagambile kamba niye; mtegelezeni yuyo muna gamalonga gose gonda yawalangukize!

²³ Avo kamba munhu hamtegeleze Mlaguzi hiyo, kobaguligwa mulukolo lwa Mulungu na kubanangwa. –

²⁴ Avo walaguzi kulawa kwa Samweli na waja wezile hachugu, wose walongile, wabwililisa kivugulo cha siku zino zimkona.

²⁵ Mweye mwa wana wa Watulandagu, kabili mwa wana wa ikilaga, Mulungu kiyalagane na tata zenu; viyamulongele Abrahamu, Mulukolo lwako mumo ngholo zose za ulumwengu zomotezwa.

²⁶ Mulungu viyamalile kumzusa mtumigwa wake Yesu, kalongola kumgala kumwenu, giladi yawamoteze mweye kwa kumbenhula kila imonga wenu na matozo gake.”