Mateo 8 - Lagano da Isambi

Mwene dikulu; Akida wa Kapernaum

¹ Na heyo viyahumuluke hakigongo, matinghanilo bwando wamkoleleza.

² Baho keza munhu mwene dikulu, kamgwila mavindi yolonga, “Mndewa, uhalonda, kodaha ku-mhonya.”

³ Yesu kagolosa umkono, kamkwasa yolonga, “Novilonda, hona!” Mhunde dikulu jake dihona.

⁴ Yesu kamulongela, “Lola, sikuumulongele munhu, bali genda na zako, ukamulagusile Mkulu wa Nhambiko, ulave vinhu vya nhosa kamba viyalagize Mose, viwe utango kumwawo!”

⁵ Viyengile Kapernaumu, akida imonga kamwizila, kamuhembekeza yolonga,

⁶ “Mndewa, nyakadala wangu katambalala mngʼanda, mtamu wa kuholola, kolumwa nghani.”

⁷ Yesu kamulongela, “Nokwiza nimuhonye.”

⁸ Aija akida kamwidika yolonga, “Mndewa, niye sivigesa gweye wingile muna ingʼanda yangu, bali longa mbuli yeka, na heyo nyakadala yangu kohona.

⁹ Kilumbo na niye vino namunhu nikigwe muna ukulu, mwene minyalinyali hamigulu yangu. Nihamulongela ino, Chola, kochola; bule, Gweye izo, kokwiza; bule nyakadala wangu, Tenda vino, kotenda.”

¹⁰ Yesu viyahulike hivo kakanganya, kawalongela waja wamkoleleze, “Amini nomulongelani, sinakona kugoga hakulu kamba kuno kwa munhu yoyose muwali Waisraeli.

¹¹ Na hiyo nomulongelani, kwiza bwando wokwiza, wolawa kulawilo wa zuwa na kuswelo wa zuwa, na hewo wokala hamonga na Abrahamu, Isaka na Yakobo muundewa wa Mulungu.

¹² Bali iwana wa undewa wokwasigwa mdiziza da kunze, kuko kondakuwe ndilo na kugegeda gameno.”

¹³ Na heyo Yesu kamulongela ija akida, “Genda, na gawe kumwako kamba vugogile!” Na nyakadala wake kahona kipigiti kikija.

Mkwe wa Petro

¹⁴ Avija Yesu viyavikile mngʼanda ya Petro, kamona mkwe yake Petro, mamo wa sano jake, katambalala mulusazi, mtamu wa lubahila.

¹⁵ Kamkwasa mkono, lubahila luhona; kenuka kawasanghanila.

¹⁶ Viivikile uchungulo, wamgalila bwando wene mizuka, kailava mizuka kwa longa jake, kawahonya wose wakalile wolumwa.

¹⁷ Giladi divikizwe dija dilonga dilongigwe na Mlaguzi Yesaya yolonga: “Mwenyecho kedikwa udodwa wetu, kabili kaisola mitamu yetu.”

Wakolelezi womuwinza Yesu

¹⁸ Na heyo Yesu viyawene matinghanilo bwando womzunguluka, kalagiza kuloka umwambu.

¹⁹ Baho mwanafunzi imonga kamgendela kamulongela, “Mkulufunzi, nokukoleleza hosehose houchola.”

²⁰ Yesu kamulongela, “Vizongo wana mhango, na ndege wa uchana wana mvulu zawo, bali Mwana wa Munhu kabule hakusagamiza ditwi jake.”

²¹ Iyagwe mumuja mwa wanahina zake kamulongela, “Mndewa, ndekesa tanhu ngende hazike tata wangu!”

²² Komu Yesu kamulongela, “Ngholeleza; waleke wafile wazike wafile wayawo!”

Nyukwanyukwa mbahali

²³ Kengila mngalawa, wanahina zake wamkoleleza.

²⁴ Kulawila nyukwanyukwa kulu muna ibahali, kikomo ngalawa igubikwa na mtibuko wa gamazi; aheyo kakala yawasile muutulo.

²⁵ Wanahina wake wamgendela, wamulamsa wolonga, “Mndewa, tuhonye, todidimila!”

²⁶ Kawalongela, “Habali mkona woga, mweye wene nhamanilo ndodo?” Bahaja kenuka, kadikomhokela dibeho na ibahali, kukala tuulu.

²⁷ Waja iwanhu wakanganya walonga, “Yuno yali munhu wa vilihi, beho na bahali vyomwidika?”

Wene mizuka kwa Wagerasi

²⁸ Na heyo viyavikile umwambu mwisi ya Wagerasi, baho wanhu wabili wene mizuka wetinghanila nayo, wolawa kuna gamapanga, wagaga nghani; haduhu munhu yodaha kubita nzila hiyo.

²⁹ Avo watowa mizangi wolonga, “Tuna mbuli gani na gweye, Mwanage Mulungu? Chei kwiza kutugaza, hakinavika kikomo chetu?”

³⁰ Basi kutali na hewo kukala dale ja nguluwe bwando wodila.

³¹ Ija imizuka wamuhembekeza wolonga, “Uhatulava, tuleke tugende tukengile muja mdidale ja nguluwe!”

³² Kawalongela, “Gendeni”. Wamana kulawa, wawengila waja iwanguluwe; mhunde dale jose dihulumuka na mhiko kudigema mbahali, wafa mmazi.

³³ Wachunga nguluwe wakimbila, wagenda kudiwambo, wazibwililisa ziwawene zose, na zija za waja wene mizuka.

³⁴ Avo wambo jose walawa wagenda kumtinghanila Yesu; vuwamuwene, wamuhembekeza yasegele mwisi yawo.