Mateo 7 - Lagano da Isambi

Sikumtaguse

¹ “Sikumtaguse, hebu motaguswa mwemwe!

² Kilumbo kitala hicho chumuwatagusila wanhu, kicho chondamtaguswe, na iningo ija yumuwalingila, iyo yondamulingilwe.

³ Habali ukilola kibale kili mgati mdisiso ja ndugu yako, bali banhi dili mgati msiso jako mwenyego hudjona?

⁴ Bule komulongelaze ndugu yako ‘Ndeka nikilave ikibale kili msiso jako,ʼ na gweye kumbe kuna banhi msiso jako mwenyecho?

⁵ Kwa mzenzeleganye gweye! Dilave tanhu ajo dibanhi dili msiso jako mwenyecho, kileka ulole goya ulave acho ikibale kili himo msiso ja ndugu yako!

⁶ Sikumuwagwelele umbwa kinhu kingʼalile, kabili sikumwase lulu zenu hawali nguluwe, sikuweze wakanyage hasi na migulu yawo, wagaluke na kumdegani!”

Lulu za nhambiko

⁷ “Puleni, na mweye mogwelelwa; zahileni, na mweye movona; tendeni hodi, na mweye movugulilwa.

⁸ Kilumbo munhu yopula kogwelelwa, na heyo yozahila kovona, na yuja yotenda hodi kovugulilwa.

⁹ Kuna munhu gani kumwenu, kamba mwanage yahampula mgate, yamgwelele dibwe?

¹⁰ Bule yahampula somba, yamwinghe zoka?

¹¹ Loleni amweye mna imizoyo ihile, mvitanga kuwengha wanenu vinogile, chei ahivo havibanza nghani Tata wenu yali kuulanga kuwagwelela ganogile awo wompula?

¹² Basi gogose gomulonda mtendelwe na wanhu, na mweye muwatendele kamba vivo; ayo iyo Inzuma na Walaguzi.”

Umulango, inzila, walaguzi wa uvwizi

¹³ “Ingileni mbite umulango msisili, kilumbo dilango hijo gazi, na zila gazi digendile mkwaga, na hewo bwando wokwingila muna dilango hijo.

¹⁴ Bali umulango msisili, na nzila yakibabani, igendile kuugima, na hewo woiyona wadodo.

¹⁵ Wateganyeni walaguzi wa uvwizi, womwizilani wavalile mikwembe ya nghondolo, kumbe mgati mna mbwizi wa mmuhulo wagaga!

¹⁶ Mowatangila kwa umujo wawo. Loleni avo wanhu wobawaga mitongoni mmizomola, bule nghuyu mmilengeja?

¹⁷ Vivo avo biki dinogile dilelaga mujo unogile, na biki ja migiligiza dilelaga migiligiza.

¹⁸ Biki dinogile hadidaha kulela migiligiza, na biki ja migiligiza kulela mujo unogile.

¹⁹ Biki hadilela mujo unogile, dokanhigwa dokwaswa hamoto.

²⁰ Avo vivo vondamuwatange muna umujo wawo.

²¹ Si kamba munhu yondayanonge, Mndewa, Mndewa, yondayengile muundewa wa kuulanga, bali ija yosanghana gamnogele Tata wangu yali kuulanga.

²² Bwando wondawanongele siku ya ikitala, ‘Mndewa, Mndewa, hatulavile ndagu kwa twaga jako, kulava mizuka mtwaga jako, kutenda malolomboto bwando mtwaga jako?ʼ

²³ Baho hondaniwalongele kimeso kindola, Simtangileni mweye mbe; gobokeni hamwangu mweye msanghane gehile!”

Ngʼanda uchana mkisugulu

²⁴ “Avo kila munhu yondayagahulike malonga gangu gano na kugasanghana, nomgamba na munhu mwene zifiyuko, yazengile ngʼanda yake uchana mkisugulu.

²⁵ Mvula katowa, mazi gamema, beho dikunghusa, diitigisa ngʼanda ija, maza haigwile, kilumbo mizengo yake ihimbilwa hasi muna ikisugulu.

²⁶ Bali munhu yohulika ago malonga gangu, imala hagasanghana, nomgamba na munhu yali bule nzewele, yazengile ngʼanda mdisangasanga.

²⁷ Mvula katowa, mazi gamema, kukuzumbi diza, diitigisa ngʼanda ija, igwa; kigwilo hicho kikala kikulu!”

²⁸ Avija Yesu viyagamambukize malonga gaja, matinghanilo wakanganya nghani gaja malangulizo gake.

²⁹ Kilumbo kakala yowalanguliza kamba munhu mwene magweka, si kamba waja Wana-Nzuma wawo.”