Mateo 6 - Lagano da Isambi

Kulava nhosa

¹ “Teganyeni, sikumtende unovu wenu hameso ga iwanhu, giladi mloligwe na hewo; kilumbo muhasanghana kamba higo, hondampate kitumetume kwa Tata wenu yali Kuulanga.

² Bali gweye mana ulava nhosa yako, sikuulave bwato behi na wanhu, kamba waja kina kizenzeleganye vuwotenda muna zingʼanda za nhambiko Mulungu na muna zinzila, giladi watunizwe na wanhu! Ihoko nomulongelani: Wamala kwibokela miyawi yawo.

³ Bali gweye uhalava vya nhosa vyako, hata mkono wako wa ukumoso sikuuvitange vija viutenda mkono wako wa ukulume!

⁴ Komu nhosa yako iwe ya ubadagi, na heyo Tata wako yolola zili muubadagi, kokumemezela.”

Kumpula Mulungu

⁵ “Kabili mana mpula Mulungu, sikumuwe kamba walonda nhogolwa, kilumbo hewo wonogelwa mana wopula, kuno wemile wima mzingʼanda za nhambiko Mulungu hebu mnzila mhanda, giladi wonekege na wanhu. Ihoko nomulongelani: wamala kwibokela miyawi yawo.

⁶ Bali gweye mana upula, ingila mngʼanda kugati jako, uhamala kuhinda lwivi lwako, upule hayali Tata wako yali haimbandamo, na heyo Tata wako yali haimbandamo kokumemezela.

⁷ “Na mweye muhawa muna ukupula, sikumuwegesewegese kokwagiza waja hawamtangile Mulungu vuwotenda, wogesa kamba wohulikwa na Mulungu, malonga gawo vigali bwando!

⁸ Avo sikumwigambe na hewo, kilumbo Tata wenu kagamanya gomulonda mweye, hamnagesa kumpula.

⁹ Bali mweye puleni vino: Tata wetu uli Kuulanga, tagwa jako ditunizwe,

¹⁰ undewa wako wize! Manogelwa gako gavikizwe mwiisi kamba kuulanga!

¹¹ Utugwelele lelo mandiya getu!

¹² Utusegezele matozo getu kamba na tweye vutuwasegezele watutozele!

¹³ Kabili sikuutugele mkugezwa bali utuhonye na ija Mndumu. Kilumbo undewa uwo wako, na mhiko na iyenzi milongo na milongo.

¹⁴ Kilumbo muhawasegezela wanhu matozo gawo, na Tata wenu wa Kuulanga komsegelezani na mweye.

¹⁵ Bali kamba hamuwasegezele wanhu matozo gawo, vivo na Tata wenu hamsegezelani na mweye matozo genu.”

Kuleka ukuja

¹⁶ “Kabili mana muleka ukuja, sikumwigambe na wazenzeleganye wene vihanga vya kusinalika, kuno wokigalula vihanga vyawo giladi woneke na wanhu, kamba waleka ukuja. Ihoko nomulongelani: wamala kwibokela miyawi yawo.

¹⁷ Bali gweye uhaleka kuja, ibakaze mavuta mditwi, unawe ikihanga!

¹⁸ Giladi sikuwoneke na wanhu kamba kuleka kuja, bali na Tata wako yali haimbandamo; na heyo Tata wako yolola haimbandamo, kokumemezela.”

Bikilo ja moyo

¹⁹ “Sikumwike mabikilo mulumwengu, vimungwi na nghangaga zobananga, na wabavi wotula na kubokonya!

²⁰ Bali ikeni mabikilo kuulanga, kuli bule ubananzi wa kinhu, kuduhu vimungwi hebu nghangaga, kuduhu wabavi watulaga hebu kubokonya!

²¹ Kilumbo bikilo jako hadili, baho hondaukale na moyo wako.”

²² “Kimuli cha lukuli dijo disiso. Kamba siso jako dihanoga, lukuli lwako lose lokuwa na mlangaza.

²³ Bali siso jako dihatulika, lukuli lwako lose lokuwa na ziza. Uja umulangaza uli mumo mgati mmwako, uhawa ziza, kaa! baye si ziza hijo!”

Mabwana wabili; kwigaza

²⁴ “Haduhu munhu yodaha kuwasanghanila mabwana wabili. Kumbe komwihila ino, yamnogele yuno, bule koigoga na ino, yamuleme yuno. Hamdaha kumsanghanila Mulungu na Mhiya.

²⁵ Vilemelaga nomulongela, sukumgaiye upile wenu, mje choni bule mungʼwe choni bule nghuli zenu mvale choni. Ugima hambwe haubanzile mandiya, na lukuli halubanzile zinguwo?

²⁶ Waloleni iwandege wali uchana vuwali: hawadahile kuhanda hawahunaga, hawalundizaga kukano, bali Tata wenu wa Kuulanga kowengha na hewo ndigwa. Chei, amweye si wakulu kubanza hewo?

²⁷ Yuyo yalihi kumwenu yadahile kwigaza yadahe kwinyusula mwenyego, yabanze mkono umonga?

²⁸ Na nguwo habali mzigaiya. Loleni maluwa gali mmigunda avija vigokula: hagasanghana unghulima bule kufyogosa nguwo.

²⁹ Nomulongelani, kumbe hata Salomo muna iyenzi yake yose havazigwe vinogile, igambile dimonga ja higo.

³⁰ Ihawa Mulungu koivaza hiyo imilolo ili mmigunda yokala lelo, na mayo yokwasigwa hamoto, chei habanza nghani kumvazani mweye wene nhamanilo ndodo?

³¹ Sikumwigaze avo molonga, ‘Tuje choni? Tungʼwe choni? Tuvale choni?ʼ

³² Kwa mzoko ago gose wamizimu wogazahila; kilumbo Tata wenu wa Kuulanga kavimanya kamba mogazahila ago gose.

³³ Bali uzahileni tanhu undewa wake na ihoko yake, na ago gose momemezelwa.

³⁴ Avo sukumwigazile ga mayo, kilumbo ga mayo gokigaiya genyego. Kilumbo kila siku na wiho wake.”