Mateo 5 - Lagano da Isambi

Wamotile iwo walihi

¹ Na heyo viyagawene matighanilo, kakwena hakigongo; avija viyamalile kukala hasi, wanahina zake wamwizila.

² Katongola mulomo wake, kuwalanguliza yolonga:

³ “Wamotile awo iwakiwa wa iloho, kilumbo Undewa wa Kuulanga uwo wawo.

⁴ Wamotile wekumbule, kilumbo hiwo wonyamazwa.

⁵ Wamotile wene uholo, kilumbo hiwo woikala iisi.

⁶ Wamotile wene nzala na nghilu ya ihoko, kilumbo hiwo wokwigusa.

⁷ Wamotile wene ihuba, kilumbo hiwo woinghigwa huba.

⁸ Wamotile wene moyo ungʼalile, kilumbo hiwo womona Mulungu.

⁹ Wamotile wagombelezi, kilumbo hiwo wokemigwa wana wa Mulungu.

¹⁰ Wamotile wogazigwa kwa mzoko wa ihoko, kilumbo Undewa wa Mulungu uwo wawo.

¹¹ Mmotile mweye vonda wamdumilizeni na kuwadununza na kumulongani mbuli zihile za uvwizi, kilumbo cha tagwa jangu.

¹² Dengheleleni na kutowa nghenze, kilumbo kitumetume chenu kikulu kuulanga; avo vivo wokala owasunghiza watula-ndagu walongole kubita mweye.”

Mkele na mulangaza wa ulumwengu

¹³ “Mweye mwa mkele wa ulumwengu, bali mkele kamba uhabanangika, wogeligwa choni, kileka ukolele? Uhoza hiwo nghani, isigale kwasigwa kumgwazo, ubojagwe na iwanhu.

¹⁴ Mweye mwemwe mulangaza wa ulumwengu. Wambo hadidaha kwifisa, uhazengwa hachana hakigongo.

¹⁵ Kabili wanhu hawabwinha kiwenge, wakike hasi mkigelo, bali uchana haikizingiti, na hicho chowamulikila wose wali mumo mngʼanda.

¹⁶ Vivo hivo mulangaza wenu na ulangaze haulongozi wa wanhu; walole masanghano genu ganogile, wamtunize Tata wenu yali Kuulanga.”

Kuivikiza inzuma

¹⁷ “Sikumgelegeze kamba niza kubeza mbila hebu walaguzi, aka; sizile kubeza komu kuvikiliza.

¹⁸ Ihoko ihoko nomulongelani: mpaka ulanga na isi vonda zisegezwe, kibanzi kimonga bule utango umonga wa Inzuma hondausegezwe mpaka gose gavikizwe.

¹⁹ Avo munhu yoyose yondayabeze ndagizo imonga muna yazino zindodo, na kuwalanguliza wanhu hivo, kokemigwa mdodo nghani muundewa wa Mulungu; bali yonda yazisanghane na kuzilanguliza hizo, kokemigwa mkulu muundewa wa Mulungu.

²⁰ Baho nomulongelani, kugoloka kwenu kamba hakubanzile kugoloka kwawo Wana Nzuma na Mafariseo, hondamwingile ngʼo muundewa wa Kuulanga.

Sikuukome iyo choni

²¹ “Muhulika, wanhu wa umwaka vuwalongelwe: ‘Sikuukome; kamba munhu yahakoma, kandakanwa na ikitala.ʼ

²² Bali niye nomulongelani: munhu yondayamonele ndugu yake lusango, kandakanwa na ikitala; na yahamuliga ndugu yake, kandakanwa na nhaguso nghulu; na yahamkema ndugu yake mbozi, kandakanwa na simo da moto.

²³ Uhagala vinhu vyako hanhambiko, kuno ukumbukila kamba ndugu yako kana mbuli na gweye,

²⁴ mhunde kileke kinhu chako bahaja hainhambiko, ugende tanhu kumwake, mkaigoge mikono na ndugu yako; umala ubwele ulave kinhu chako cha nhambiko!

²⁵ Igoge mikono na mdenyi wako chambwisa, kimilo muli hamonga mnzila; bule mdenyi wako sikuyeze kukugala kwa mtawala, na mtawala yakugale kwa minyalinyali, wasigwe mngʼanda ja ziza.

²⁶ Ihoko nokulongela, hulawa himo bule, kikomo uzige kwiliha hela ya ikimambukizo.”

Sikuutende ugoni iyo choni

²⁷ “Muhulika kamba ilongigwe: ‘Sikuutende ugoni.ʼ

²⁸ Bali niye nomulongelani: Aija munhu yomulola mtwanzi kuno yomgelegeza, kamala kutenda nayo ugoni mmoyo mmwake.

²⁹ Siso jako ja ukulume dihakuhonza, disomole ujase kutali na gweye; kilumbo vokunogela, kinofu chako kimonga chage, bali lukuli lwako lose sikulwasigwe mdisimo da moto.

³⁰ Kamba mkono wako wa ukulume uhakuhonza, ukanhe uwase kutali na gweye; kilumbo vokunogela, kinofu chako kimonga chage, bali lukuli lwako lose sikulwasigwe mmoto.”

³¹ “Ilongigwa kabili: ‘Munhu yahamuleka sano jake, yamwinghe utango wa kumuleka.ʼ

³² Bali niye nomulongelani: Munhu yondayamuleke sano jake, kamba haili mbuli ya ugoni, komgela usongo kwiza yawe mgoni; imala munhu yahamsola yuja yasigwe, heyo kotenda ugoni.”

Sikwiduwile uvwizi iyo choni

³³ “Kabili muhulika, wanhu wa umwaka vuwalongelwe: Sikwiduwile uvwizi kwa Mulungu, bali umvikizile Bwana kiduwilo chako.

³⁴ Bali niye nomulongelani: Hata sikuwiduwile: wala kuna ulanga, kilumbo kicho kigoda cha iyenzi ya Mulungu;

³⁵ wala muna iisi, kilumbo baho hayekaga migulu yake; wala Yerusalemu, kilumbo dijo wambo ja Mndewa Mkulu.

³⁶ Kabili sikuwiduwile muna iditwi jako, kilumbo hudaha kugalula luvili lumonga luwe luzelu bule lutitu!

³⁷ Bali malonga genu gawe, Vivo vivo, Sivivo sivivo; gabanzile higo galawa kwa yuja Mndumu.”

Wanogeleni wandumu wenu

³⁸ “Muhulika kamba ilongigwe: ‘Siso kulihila siso, na zino kulihila zino.ʼ

³⁹ Bali niye nomulongelani: Sikumwibamlile na munhu yehile umoyo. Munhu yahakutowile kanza da ukulume, muhindusile na da ukumoso!

⁴⁰ Kabili munhu yolonda kukugala hakitaguso, giladi yasole nghanzu yako, mulekele na mfuliya wose!

⁴¹ Bule munhu yokudoheleza mwanza mguhi, chola nayo mwanza mtali!

⁴² Yokupula mwinghe; yolonda kukukopa gweye, sikumuhindukile!”

⁴³ “Muhulika kamba ilongigwe: Umnogele yukala nagwe habehi, na umwihile mndumu wako!

⁴⁴ Bali niye nomulongelani: Wanogeleni wandumu wenu, watambikileni womdwanzani!

⁴⁵ Avo muwe wanage Tata wenu yali kuulanga, kilumbo heyo kowalavila zuwa jake wehile na wanogile, kowagaiila mvula wene ihoko na hewo wali bule ihoko.

⁴⁶ Kilumbo muhawanogela wamnogeleni mweye, mopata kitumetume chaki. Vilema wawilakodi na hewo watendaga kamba higo.

⁴⁷ Kabili muhawalamusa wandugu zenu wali yeka, mosanghana mbuli ilihi ibanzile. Vilema wanhu waja hawamjuwile Mulungu, na hewo watendaga kamba higo.

⁴⁸ Bali mweye muwe wakungulufu, kamba Tata wenu wa Kuulanga viyali mkungulufu!”