Mateo 4 - Lagano da Isambi

Yesu kagezwa kuluwala

¹ Imala Yesu kagaligwa na Loho kuluwala, giladi yagezigwe na Chaumbeya Mgeza-wanhu.

² Kaleka kuja siku milongo mine imisi na ikilo, kimambukizo kona nzala.

³ Mwenembago kamwizila kamulongela, “Uhawa gwegwe mwanage Mulungu, galongele gano gamabwe gagalamuke mandiya.”

⁴ Aheyo kamwidika yolonga, “Yandikigwa, Munhu hawa mgima kwa mandiya yeka, bali muna zimbuli zose zilawa mmulomo wa Mulungu.”

⁵ Yomala Mgeza-wanhu kamsola kamgala kudiwambo dingʼalile, kamwika uchana hainhomboti ya dihekalu.

⁶ Kamulongela, “Uhawa gwegwe mwanage Mulungu, patukila hasi, kilumbo yandikigwa: Kokulagizila malaika zake wakudanghe mmikono mmwawo, sukuwize kwikwangwala mgulu wako mwidibwe.”

⁷ Yesu kamulongela, “Kabili yandikigwa, Sikuumgeze Mndewa Mulungu wako!”

⁸ Yomala Mwenembago kamsola kamgala kugongo tali nghani, kamulagila ukulu wose wa ulumwengu na unovu wake.

⁹ Kamulongela, “Gano gose nokwingha uhagwa mavindi unhambikile.”

¹⁰ Baho Yesu hayamulongele, “Goboka chaumbeya gwe, kilumbo yandikigwa, Mgwile mavindi Mndewa Mulungu wako, mtambikile heyo yali yeka!”

¹¹ Yomala Mwenembago kamuleka, na lola malaika weza wamsanghanila.

Yesu kavikila Zabuloni na Naftali

¹² Basi Yesu viyahulike kamba Yohana kafungigwa, kenuka kachola Galilea.

¹³ Kalawa Nazareti, keza kakala Kapernaumu, diwambo dili hiko mhwani mzimbaka zawo Zabuloni na Naftali.

¹⁴ Giladi divikizwe Longa dilongigwe na mtula-ndagu Yesaya yolonga:

¹⁵ “Isi ya Zabuloni na isi ya Naftali, nzila ya mmazi, umwambu wa Yordani, Galilea ya wamhazi!

¹⁶ Wanhu waja wakalile mdiziza, wawona mlangaza mkulu, na hewo wakalile muiisi ya kimvuli cha wafile, mulenge uwalawila.”

¹⁷ Kulawa mazuwa higo Yesu kandusa kupeta na kulonga, “Galukeni, lekeni gehile, kilumbo Undewa wa Kuulanga ukwenhuka!”

Wanahina wasongile

¹⁸ Na heyo viyakalile yobita mmambwegambwega ga ibahali ya Galilea, kawona ndugu wabili, Simoni yokemigwa Petro, na Andrea ndugu yake, wogela nyavu mbahali, kilumbo wakala wavuvi.

¹⁹ Kawalongela, “Ngholelezeni, na niye nomtendani muwe wavuwawanhu!”

²⁰ Mhunde wazileka zinyavu zawo, wamkoleleza.

²¹ Kagendelela hamwande, kawona wandugu wayagwe wabili, Yakobo mwanage Zebedeo, na Yohana ndugu yake; hiwo wakala mngalawa hamonga na Zebedeo tata wawo, wotenda goya nyavu zawo. Kawakema.

²² Mhunde waileka ingalawa na tata wawo, wamkoleleza.

²³ Na heyo kakala yozunguluka mumo Galilea mose, yowalanguliza mzingʼanda zawo za nhambiko Mulungu, na kupeta usenga unogile wa Undewa, na kuhonya utamu wowose, ne wene udodwa wali bule zimhiko.

²⁴ Azo simulizi zake zenela mwisi ya Siria yose; wamgalila watamu wose wagogigwe na utamu wa kiyekakiyeka na kugazwa, wene mizuka na wene vivambo na wene kuholola; kawahonya.

²⁵ Na matinghanilo bwando wamkoleleza, wolawa Galilea na Dekapoli na Yerusalemu na Uyuda na umwambu wa Yordani.