Mateo 3 - Lagano da Isambi

Yohana msingula wanhu kalawilila

¹ Milongo hiyo kenukila Yohana Msingula wanhu, yolonga mbuli ya Mulungu muluwala lwa Uyuda,

² yolonga, “Galukeni, lekeni gehile, kilumbo Undewa wa Mulungu ukwenhuka!”

³ Yohana iyo yuyo yalongigwe na Mtula-Ndagu Yesaya yolonga: “Dizwi ja munhu yotowa nyangi kuluwala, Isanghaneni goya nzila ya Bwana, ugoloseni ubito wake!”

⁴ Aheyo Yohana kakala na guwo jake ja usinga wa ngamiya, na lukumbulu lwa kwembe mkigudi chake; mandiya gake gakala mbalangulu na uki wa muhulo.

⁵ Baho wamgendela wanhu wa Yerusalemu na Uyuda wose na ziisi zose zili mmambwegambwega mwa Yordani.

⁶ Na heyo kawagela mazi muiti muna ulwanda lwa Yordani, kuno wopeta matozo gawo.

⁷ Avija viyawawene bwando wolawa mwa Mafariseo na Masadukeo womwizila yawasingule, kawalongela, “Mweye mlelo wa nyoka! Yuyo yalihi yamulongeleni mweye kwinega Lusango londalwize?

⁸ Leleni mujo wa mgaluko unogile goya!

⁹ Kabili sikumgelegeze mmiyoyo mmwenu kamba tunayo Tata yuyo Abrahamu, bali heyo nomulongelani kamba Mulungu kodaha mumo muna gamabwe gano kumulavila Abrahamu vinghele.

¹⁰ Kabili nhemo imala kwikigwa hana imisina ya imibiki; vivo kamba biki hadilelile mujo unogile, wokanhwa umala wokwasigwa hamoto.

¹¹ Niye nomgelani mazi giladi mgaluke, bali Heyo ayo yokwiza kukisogo changu, kana mhiko kumbanza niye, kabili niye sidaha kumbokela vilatu vyake; heyo komogezani na Loho Yangʼalile hamonga na moto.

¹² Lungo lwake lwa mumkono wake; kolufagila goya lubuga lwake na kulundiza muhunga wake kukano, aija mikupi koigela hamoto haufaga.”

Yesu viyabatizwe

¹³ Mazuwa higo Yesu keza yolawa Galilea, kavika Yordani kuyali Yohana, giladi na heyo yasingulwe.

¹⁴ Komu Yohana kalonda kumgomesa yolonga, “Niye nolonda kugeligwa mazi na gweye, agweye kokwiza kumwangu?”

¹⁵ Yesu kedika kamulongela, “Vumila vino sambi, kilumbo vivo vitwandakana kuivikiza Inzuma yose.” Baho kamvumila.

¹⁶ Na heyo Yesu viyamalile kubatizwa, mhunde kenuka yolawa mmazi; lola ulanga ugubuka, kamona Loho wa Mulungu yohumuluka yagambile huwa, keza mditwi jake.

¹⁷ Dizwi dilawa kuulanga dilonga, “Yuno Nyadimwe mzuwanda wangu inogelwe nayo.”