Mateo 28 - Lagano da Isambi

Yesu viyazukile; uzulunzi wa watambika

¹ Sabato vimalile, imitondo vuuchele siku ya ikilongozi ya Juma, Maria Magdalena na Maria iyagwe wachola kuilola kabuli.

² Mhunde hakala na kingudemo kikulu cha isi, kilumbo malaika wa Bwana kahulumuka kulawa kuulanga, keza kadibimbilisa didibwe dija, kadikalila.

³ Lukuli lwake lukala kamba lumwemwe, na nguwo zake nzelu kamba seluji.

⁴ Waja iwasepi wagudema kwa kudumba, wagalamka kamba wafile.

⁵ Malaika kedika kawalongela waja iwatwanzi, “Sukumdumbe. Nivimanya momzahila Yesu yawambigwe.

⁶ Kahaduhu hano; kazuka kamba viyalongile. Izoni mulole ihanhu hayatambalikwe!

⁷ Choleni mbwisa mkawalongele wanahina zake, Kazuka kulawa kwa wafile, kowalongolela kuchola Galilea; kuko kondammone. Loleni nimulongelani.”

⁸ Wasegela mbwisa hana ikabuli, kuno wodumba na kusamhuka nghani, wokimbila kuwapetela wanahina.

⁹ Mhunde Yesu ketinghana nawo kalonga, “Mwawapile.” Wakwenhuka womfugamila, wamgoga migulu.

¹⁰ Baho Yesu kawalongela, “Sukumdumbe, gendeni mkawalongele ndugu zangu wachole Galilea, kuko kondawambone.”

¹¹ Vuwakalile wachola, wayagwe wa asikali wengila mdiwambo, wawalongela watambika wakulu mbuli zose zitendeke.

¹² Wehanganya hamonga na iwalala, wasagula msagu; wawagwelela askali mhiya bwando, wawalagiza,

¹³ “Longeni, tweye vitukalile tuwasile, wanahina zake weza ikilo, wawiba mtufi.

¹⁴ Na mbuli ihahulikwa na luwali, tweye tolonga nayo, tomsegezelani honzolomo.”

¹⁵ Waja askali wazisola zimhiya, walonga kamba vuwalangukizwe; ulonzi hiwo ubwililika kwa Wayuda na dilelo.

Ndagizi za usenga na ubatizo

¹⁶ Waja wanahina longo dimwe na imwe wachola Galilea kudigongo kwiyawalagize Yesu.

¹⁷ Na hewo vuwamuwene wamfugamila, bali wayagwe wakala na kinghwaso.

¹⁸ Yesu keza kumwawo, kalonga nawo, kawalongela, “Ngolelwa magweka gose kuulanga na muisi.

¹⁹ Avo gendeni, mkawatende ngholo zose wawe wanahina wangu; mowasingula kwa tagwa ja Tata na ja Mwana na ja Loho Yangʼalile.

²⁰ Kuno mowalanguliza kugagoga gose ganimulagizeni mwemwe. Loleni niye nabaha hamonga namwe siku zose hata kuziga kwa isi.”