Mateo 27 - Lagano da Isambi

¹ Vivikile imitondo, watambika wakulu hamonga na walala wa ulukolo wasagula msagu, wamkome Yesu giladi.

² Wamdaza na nzabi, wamsola wamgalila luwali Pilato.

Kwibota kwa Yuda Iskariota

³ Mhunde Yuda yuja yamuhimbile, viyaviwene kamba Yesu kamala kutaguswa, kaiyalala mmoyo, kawabwezela watambika wakulu na iwalala zija mhiya milongo midatu.

⁴ Kalonga, “Mbananga niye, ndavile mulopa ulibule na iditozo.” Walonga, “Avo ago gatulumbaze tweye. Galole higo gweye mwenyecho!”

⁵ Kazasa zija zimhiya muna dihekalu, kasegela kachola kwibota.

⁶ Watambika wakulu wazisola zija zimhiya walonga, “Hazilumbile kuhanganya hamonga na mhiya za nhambiko, kilumbo zino mhiya za mulopa.”

⁷ Wazahila msagu wa kuzija kwa kugula mgunda wa muumvi, hawe hanhu ha kuzikila iwahenza.

⁸ Avo mgunda uja na dilelo wokemigwa Mgunda wa Mulopa.

⁹ Baho ivikizwe mbuli ilongigwe na mlaguzi Yeremiya yolonga: “Wavisola mhiya milongo midatu, ningo ya munhu yagulizwe, iwamgulile kulawa kwa Waisraeli,

¹⁰ Wazija kugula mgunda wa muumvi, kamba Bwana Mulungu viyandagize.”

Yesu hakitala cha Pilato; Watambika wamsagula Baraba; Pilato kanawa makono

¹¹ Na heyo Yesu kema behi ya luwali; luwali kamuuza yolonga, “Gweye gwegwe mtawala wa Wayuda?” Yesu kamulongela, “Ona, gweye kulonga.”

¹² Bali vuwamtaguse watambika wakulu na uwalala, hatongoze mbuli.

¹³ Baho Pilato kamulongela, “Huhulika mengahi gowokusindila?”

¹⁴ Hamtongoze hata mbuli imonga, na heyo luwali kakanganya nghani.

¹⁵ Na luwali kakala na luto lwa kuwafungulila Wayuda mfungigwa imonga iwalondile, kilagwa cha isiku nghulu.

¹⁶ Na siku zija hakala na mfungigwa yatangike, yokemigwa Baraba.

¹⁷ Vuwetinghanile, Pilato kawalongela, “Molonda niwafungulile yalihi? Baraba yuja, bule Yesu yokemigwa Kristo?”

¹⁸ Kilumbo kavimanya kumbe wamulava kwa wihilo.

¹⁹ Na viyakalile hachana ha kigoda cha ulamuzi, sano jake kamgalila msenga kumulongela, “Sikuuwe na mbuli na yuno mwene ihoko, chanduso ngazwa nghani lelo muna zinzozi kwa kilumbo chake.”

²⁰ Komu watambika na iwalala wawagela wanhu kiswalu, wamulonde Baraba na kumkoma Yesu.

²¹ Luwali kedika kawalongela, “Molonda niwafungulile yalihi wa wano iwabili?” Walonga, “Baraba!”

²² Pilato kawauza, “Avo nimtendeze Yesu yokemigwa Kristo?” Walonga wose, “Yawambigwe mbiki!”

²³ Pilato kalonga, “Habali? Wiho gani uyatendile?” Wabanza nghani kulava kibwato na kulonga, “Yawambwe mbi-ki!”

²⁴ Basi Pilato viyaviwene havidahika vosevose, bali kiyahiyahi chobanza tu, kasola mazi, kanawa makono behi na mtinghano, kalonga, “Niye mduhu kwa mulopa wa munhu yuno mwene ihoko; galoleni higo mwemwe wenyego!”

²⁵ Wanhu wose wedika walonga, “Mulopa wake na uwe kumwetu na wanetu!”

²⁶ Avo kuwafungulila Baraba, na Yesu yasunigwe mbongho, kileka yawambigwe mbiki.

Sanzagala da misonga

²⁷ Baho asikali wa luwali wamsola Yesu mngʼanda ya ikitala, najo dale gima da minyalinyali wammemela.

²⁸ Wamvula nguwo zake, wamvaza guwo dunghu kamba ja undewa.

²⁹ Wabota sanzagala da misonga, wamvaza mditwi jake, na mlanzi wamwingha mmkono wake wa ukulume. Wafugama mavindi behi yake, wamtendela uponela, wolonga, “Kwa mpile, Mndewa wa Wayuda!”

³⁰ Kuno womtemela mate, wausola uja mlanzi, wamtowatowa mditwi.

³¹ Vuwamalile kumdawalila, wamvula dija diguwo, wambwezela nguwo zake, na kumsola giladi wamkome.

Simoni wa Kirene kadipapa biki da Yesu; kwigola nguwo za Yesu; Yesu viyamgogile Tata na kudanganika

³² Vuwakalile wochola mnzila, wamona munhu Mkirene, tagwa jake Simoni; yuno wamnanahiza yadigale biki jake ja kudanganikila.

³³ Wavika hanhu hokemigwa Golgota, kihindukizo chake Zege da Pala.

³⁴ Wamwingha divai ihanganizwe na sungu yangʼwe; na heyo viyalanzile, halondile kuingʼwa.

³⁵ Vuwamalile kumwamba mdibiki, watenda kibafuti giladi wazigole nguwo zake, kilumbo divikizwe Longa dilongigwe na mtula-Ndagu: “Wazigola nguwo zangu mmwanza wawo, na mfuliya wangu wautendela kibafuti”.

³⁶ Hivo wakala hasi, womwimiliza hiko.

³⁷ Uchana hana iditwi jake wamana kwandika kilumbo chake: Yuno yuyo Yesu, Mndewa wa Wayuda.”

³⁸ Bahaja mibazazi mibili iwambigwe mmibiki hamonga na heyo, imonga mkono wake wa ukulume, iyagwe mkono wake wa ukumoso.

³⁹ Na hewo wakalile wobita nzila, wamuliga wotigisatigisa matwi gawo.

⁴⁰ Wolonga, “Gweye mwene kuditula dingʼanda ja Mulungu na kudizenga kwa siku ndatu, ihonye mwenyecho! Uhawa gweye mwana wa Mulungu, hulumuka mdibiki!”

⁴¹ Vivo na watambika wakulu wamponeza hamonga na wana-Nzuma na iwalala, walonga,

⁴² “Kawahonya wayagwe, mwenyecho hadaha kwihonya. Kumbe heyo mtawala mndewa wa Israeli? Kamba yahahulumuka sambisambi mdibiki, na tweye tomtogola!

⁴³ Kamgoga Mulungu, avino na yamuhonye, kamba yahamulonda – kilumbo kalonga, Niye na Mwana wa Mulungu.”

⁴⁴ Mpaka ija mibazazi iwambigwe hamonga na heyo, wamdudumiza vivija.

⁴⁵ Vivikile saa sita imisi, kukala na ziza isi yose hata saa kenda.

⁴⁶ Na behi ya saa kenda Yesu kalava nyangi kwa mhiko yolonga, “Eli, Eli, lama sabaktani”, kihindukizo chake, “Mulungu wangu, Mulungu wangu, vilihi vuunyasa?”

⁴⁷ Wayagwe vuwagahulike mmwawo wemile hiko, walonga, “Yuno komkema Eliya.”

⁴⁸ Mhunde imonga wawo kachola yokimbila, kasola sifongo, kaimemeza siki, kainanika hasota ya mlanzi, kamwinghiza.

⁴⁹ Waja wayagwe walonga, “Leka tuvone kamba Eliya kokwiza kumuhonya.”

⁵⁰ Bali Yesu kalava nyangi lwekabili, baho kailava loho yake.

⁵¹ Na lola guwo kulu ja mdihekalu didegeka nyenza mbili, kulawa uchana kuvika hasi.

⁵² Isi igudema, mibwe itulika, kabuli zigubuka, na nghuli bwando za wangʼazi wawasile zizuka.

⁵³ Walawa mzikabuli zawo, wengila mdiwambo dingʼalile kimilo cha kuzuka kwa Yesu, wonekelwa na wanhu bwando.

⁵⁴ Baho yuja akida na hiwo wakalile hamonga na heyo womwimiliza Yesu, vuwawene nyukwanyukwa ja isi na mazingaombwe gatendeke, wadumba nghani walonga, “Kweli yuno kakala Mwana wa Mulungu.”

⁵⁵ Hakala na watwanzi bwando, wema kutali wolola; hiwo wawaja wamkoleleze Yesu kulawa Galilea na kumsanghanila.

⁵⁶ Mmwanza wawo kakala Maria Magdalena, na Maria mama wa Yakobo na Yosefu, na mama wa wanage Zebedeo.

Yesu viyazikigwe; kabuli jake disepwa

⁵⁷ Hata vivikile ichungulo, kavika munhu mwene mhiya, yolawa Arimatia, tagwa jake Yosefu, na heyo kakala mwanahina wa Yesu.

⁵⁸ Kamgendela Pilato, kampula mtufi wa Yesu; baho Pilato kalagiza wamwinghe.

⁵⁹ Yosefu kausola mtufi, kaugubikagubika sanda za bafuta ya isambi.

⁶⁰ Kawika mkabuli jake ja isambi, diyasongole mdibwe, kabimbilisa dibwe kulu hana umlango wa dikabuli, kachola.

⁶¹ Na Maria Magdalena na Maria yuja iyagwe wakala wolola dikabuli.

⁶² Imitondo iyagwe viibitile siku ya kwisasala, watambika wakulu na Mafariseo wammemela Pilato.

⁶³ Walonga, “Mndewa, tukumbukila gaja galongigwe na mbala yuja viyakalile mpile, Zihabita siku ndatu nozuka.

⁶⁴ Avo lagiza kuja kuna dikabuli kusepwe goya kuvikila siku ya ikadatu; wanahina wake sukuweze wamwibe, wakawapetele iwanhu kamba kafufuka kulawa kwa wafile; na uvwizi wa ikimambukizo wobanza ulongole.”

⁶⁵ Pilato kawalongela, “Soleni dale da asikali, gendeni mkadisepe goya vondamdahe!”

⁶⁶ Wachola wadigela dija dibwe utango, waweka wasepi.