Mateo 26 - Lagano da Isambi

Msagu wa iwandumu

¹ Avija Yesu viyamambukize malonga higo gose, kawalongela wanahina zake,

² “Mvitanga kamba kikomo cha sikumbili yokuwa Pasaka, Nghumbulilo, na Mwana wa Munhu kolavigwa yakomigwe.”

³ Kikomo kija watambika wakulu na iwalala welundiza mngʼanda ya Mtambika mkulu Kayafa.

⁴ Wasagula msagu hamonga, giladi wamgoge Yesu muubala, avija wamkome.

⁵ Bali walonga, “Si kamba ikikomo cha isiku nghulu, sikudilawilile zomvu muna iwanhu!”

Kwitilwa mavuta hiko Betania

⁶ Na heyo Yesu viyezile Betania, kakala mngʼanda ya Simoni mwene dikulu.

⁷ Na mtwanzi mwene kichupa cha mavuta, gagulike mhiya bwando, kamkwenhukila, kamwitila mditwi jake viyakalile hana gamandiya.

⁸ Wanahina zake vuwaviwene, wehilwa walonga, “Wachoni ubananzi uno?

⁹ Kilumbo mavuta gano vihanogile kuguligwa na mhiya bwando, wagolelwe wakiwa.”

¹⁰ Yesu kavitanga, kawalongela, “Habali mumgaza mtwanzi. Sanghano ino inoga iyanhendele niye.

¹¹ Kilumbo wakiwa mokala nawo hamonga siku zose, bali niye sikala namwe milongo yose.

¹² Kuja kunitila mavuta lukuli lwangu, kasanghana ago giladi yanike goya kwa uzisi wangu.

¹³ Ihoko nomulongelani, ihanhu hondaupetigwe Usenga Unogile uno mulumwengu wose, na hijo diyasanghane dopetwa, giladi yatambulwe mtwanzi ino.”

Yuda Iskariota yomuhimbila Yesu

¹⁴ Imala baho imonga miyawo waja longo dimwe na wabili, tagwa jake Yuda Iskariota, kawagendela Watambika wakulu.

¹⁵ Kalonga, “Avo choni chondamninghe, na niye nimulave kumwenu?” Wamwingha milongo midatu ya mhiya.

¹⁶ Kulawa siku hiyo kakala yozahila ulegeho giladi yamulave.

Gamandiya ga ikilo

¹⁷ Siku ya ichanduso ya Migate ilekigwe kugeligwa mhumba, wanahina zake wamgendela Yesu, wamuuza, “Kolonda tutandike kwahi mandiya ga ikilo, uje Pasaka?”

¹⁸ Kalonga, “Gendeni mdiwambo kwa munhu fulani mkamulongele, Mkulufunzi kalonga, kipigiti changu chabehi; kumwako noija Pasaka hamonga na wanahina zangu.”

¹⁹ Wanahina wasanghana kamba Yesu viyawalagize, wamana kuitandika nghondolo ya Pasaka.

²⁰ Vivikile ichungulo, kakala hana gamandiya hamonga na waja longo dimwe na wabili.

²¹ Na vuwakalile woja, kalonga, “Ihoko nomulongelani, miyenu imonga konihimbila.”

²² Wagwa kizumbo nghani, wandusa kumuuza yumwe yumwe, “Avo nene, Mndewa?”

²³ Kedika kalonga, “Yuyo yengize mkono wake hamonga na niye muna umkungu, yuyo yonihimbila.

²⁴ Mwanage Munhu kochola na zake kamba viyandikilwe; bali kojona munhu yuja yomuhimbila Mwana wa Munhu! Vihanogile kumwake munhu yuja kamba haleligwe.”

²⁵ Yuda yuja mwene kumuhimbila kedika kauza, “Avo nene, Mkulufunzi?” Kamulongela, “Ona gweye kulonga.”

²⁶ Na hewo vuwokalile woja, Yesu kasola mgate, kaulombokezela Mulungu, kaumega kawagwelela wanahina zake kalonga, “Soleni, muje; luno lulo lukuli lwangu.”

²⁷ Kakisola kikonha, kakilombokezela, kawengha yolonga, “Ingʼwileni mose kikino.

²⁸ Uno uwo mulopa wangu wa kilagano cha isambi, ukwitika giladi bwando wasegezelwe matozo.

²⁹ Avo nomulongelani, lulawile sambi hondaningʼwe umujo uno wa mtongoni, komu sikuhiyo vondaningʼwe uja wa isambi hamonga na mweye mundewa wa Tata wangu.”

Petro kalema kwihilwa

³⁰ Na hewo vuwamalile ukwimba, walawa kunze, wagenda kigongo cha mizeituni.

³¹ Baho Yesu hayawalongele, “Mweye mose kwiza mokwihilwa kumwangu ikilo iino, kilumbo yandikigwa: Nomtowa mchunga, na iwanghondolo wa didale wopwililika.

³² Bali kikomo cha kuzuka niye, nolongola kuchola Galilea.”

³³ Petro kedika kamulongela, “Ihawa wokwihilwa wose kumwako gweye, niye hondanihilwe bule.”

³⁴ Yesu kamulongela, “Kingongongo nokulongela, ikilo iino nzogolo hanakwika, gweye kombela miyanza midatu.”

³⁵ Petro kamulongela, “Hata vihanyandama kudanganika nagwe, hondanikubele ngʼo. Na wanahina wose walonga kamba vivo.”

Nghondo ya kumpula Tata mu Getsemane

³⁶ Yomala Yesu kachola hamonga na hewo kukigunda kikemigwa Getsemane, kawalongela wanahina zake, “Kaleni hano, na niye ngende kuja, hampule Tata!”

³⁷ Kawasola Petro na waja wana wabili wa Zebedeo, kasonga kugwa kizumbo na msusuwalo.

³⁸ Baho yawalongele, “Loho yangu ina kizumbo bwando, isigale kudanganika; kaleni hano mkale meso hamonga na niye!”

³⁹ Kakwenhuka hamwande, mhunde kagwa kingubanguba, kapula yolonga, “Tata wangu, vihadahika, kikonha kino kimbitile kutali, sikunikingʼwe. Bali si kamba vinilonda niye, komu vulonda gweye.”

⁴⁰ Kawabwelela waja iwanahina, kawavika wawasile, kamulongela Petro, “Vilihi hamdaha kukala meso hamonga na niye kimilo cha saa imonga tu?

⁴¹ Kaleni meso mpule, sikumwize kwingila mkugezwa. Loho yolonda, bali lukuli lukweyuka.”

⁴² Kachola vivija mwanza wekabili, kapula yolonga: “Tata, vihawa havidahika kikonha kino kimbite sikunikingʼwe, goulonda gweye gavikizwe!”

⁴³ Kabwela kabili, kawavika wawasile, kilumbo meso gawo gamema utulo.

⁴⁴ Kawaleka baho, kagenda kapula mwanza wekadatu, yolonga malonga gagaja.

⁴⁵ Yomala kawabwelela wanahina zake kawalongela, “He, muhaliwasa na kuhumula. Loleni ikikomo cha habehi; Mwana wa Munhu kogeligwa mmikono ya wene matozo.

⁴⁶ Halaweni hano, tuchole; lola yuja yondava, ka behibehi.”

Yesu viyagogigwe

⁴⁷ Baho viyakalile yolonga, lola Yuda imonga miyawo waja mulongo umwe na wabili, keza hamonga na dale kulu wene misime na mikota, walawa kumwawo watambika wakulu na Iwalala.

⁴⁸ Ayuja Muhimbila kakala yawenghile utango yolonga, “Ayo yondanimnonele mulomo, hiyo yuyo, mgogeni!”

⁴⁹ Mhunde kamgendela Yesu, yolonga, “Kwa mpile, Rabbi,” kamnonela.

⁵⁰ Yesu kamulongela, “Mbwiga, sanghana diuwinzile!” Weza waja, wagolosa makono gawo, wamgoga.

⁵¹ Na imonga wawo wakalile hamonga na Yesu, kagolosa mkono wake, kasomola sime, kamtowa mtumwa wa mtambika mkulu, kamkanha digutwi.

⁵² Yesu kamulongela, “Bweza sime jako ihanhu hamwake, kilumbo wose wene kugoga sime wokwangamila kwa sime.

⁵³ Hebu kokwagiza, niye sidaha kumpembela Tata wangu, na heyo kongalila madale kubanza longo dimwe na mabili ga malaika sambi baha?

⁵⁴ Kumbe gaja gandikigwe kamba vyandakane viwe hivo, govikizwa vilihi?”

⁵⁵ Saa ija Yesu kawalongela gamadale, “He, mwiza na misime na mikota kungoga kamba mbazazi; mazuwa gose nghalaga mdingʼanda ja Mulungu nilangukiza, hamngogile bule.

⁵⁶ Gano gose gagalamka, giladi gavikizwe malonga gaja gandikigwe na Watula-Ndagu.” Baho wanahina wose wamuleka, wakimbila.

Yesu kema haluhengo lwa Kayafa

⁵⁷ Na hewo wamgogile Yesu wamgala kwa Kayafa mtambika mkulu, kuwakalile wetinghanile wana-Nzuma na Iwalala.

⁵⁸ Na Petro kamkoleleza kutalitali kukisogo, kavika halubuga lwa mtambika mkulu, kakala hamonga na wanyakadala, yalole ikikomo.

⁵⁹ Basi watambika wakulu na wana-Nhaguso wose wazahila usindi wa uvwizi kumwake Yesu, giladi wamkome.

⁶⁰ Hawauwene; womana kulawa wasindi bwando wa uvwizi, vivo kumwande wabili welaviliza.

⁶¹ Walonga, “Yuno kalongaga, nodaha kuditula dihekalu ja Mulungu na kudizenga kwa siku ndatu.”

⁶² Mhunde mtambika mkulu kenuka kamulongela, “Hulonga mbuli? wano wokusindila choni?”

⁶³ Bali Yesu kavudala. Baho mtambika mkulu kamulongela, “Nokudumiliza kwa Mulungu mwene Upile, utulongele kamba gweye gwegwe Kristo Mwana wa Mulungu?”

⁶⁴ Yesu kamulongela, “Ona gweye kulonga. Avo nomulongelani, sambi baha momona Mwana wa Munhu voyokala ukulume kwa Mhiko, kabili vondayeze uchana mmawingu ga kuulanga.”

⁶⁵ Baho mtambika mkulu kadega nghanzu yake yolonga, “Kifukuzi. Wasindi towalonda choni kabili? Tegelezeni muhulika kifukuzi chake!

⁶⁶ Mokonaze mweye?” Wedika walonga, “Imwandama ifa!”

⁶⁷ Baho wamtemela mate ga mkihanga, wamsuna mikonde; wayagwe wamtowa makofi,

⁶⁸ kuno wolonga, “Gweye Kristo, tutambulile yakutowile yuyo yalihi?”

Petro viyambelile Yesu

⁶⁹ Na Petro viyakalile kunze halubuga, nyakadala imonga kamgendela yolonga, “Gwegwe na gweye kukala hamonga na Yesu wa Galilea!”

⁷⁰ Kabela chalinze yolonga, “Aka, hidijuwa diulonga.”

⁷¹ Na heyo viyalawile kunze kuvikila mlango, mtwanzi iyagwe kamona, kawalongela wanhu wakalile hiko, “Yuno kakala hamonga na Yesu Mnazareti!”

⁷² Kabela lwekabili na kwiduwila, “Simmanyile munhu yuno.”

⁷³ Mhunde bule waja wakalile baho wamwizila, wamulongela Petro, “Ona na gweye kwa imonga wawo, kilumbo ulonzi wako witambula.”

⁷⁴ Baho yomana kwidumiliza na kwiduwila yolonga, “Simmanyile munhu yuno.” Mhunde nzogolo keka.

⁷⁵ Baho Petro kadikumbuka dija Yesu diyalongile, “Nzogolo hanakwika, kombela miyanza midatu.” Kalawa hanze, kalila mahozi.