Mateo 25 - Lagano da Isambi

Wana imhambe longo dimwe

¹ “Baho undewa wa Mulungu wogalamka kamba wana-Imhambe longo dimwe, wasolile taa zawo, walawa wagenda kumbokela Mlawila-mhambe.

² Watano wakala wabozi, bali watano wakala na fiyuko.

³ Waja wabozi wasola taa zawo, bali hawasolile mavuta gayagwe mvibuyu vyawo.

⁴ Waja wene zifiyuko wasola na mavuta mvibuyu hamonga na taa zawo.

⁵ Avija Mlawila-mhambe viyakawile, wose wakala wokukila, wawasa utulo.

⁶ Bali ikilo kikulu kukala zumozumo: Mlawila-mhambe kavika; laweni mgende mkambokele!

⁷ Mhunde wanamhambe waja wose wenuka, watenda goya taa zawo.

⁸ Waja iwabozi wawalongela wene zifiyuko, Twingheni mavuta genu vidodo, kilumbo taa zetu zozimika.

⁹ Bali waja wene zifiyuko wawedika walonga, Si vivo, hondagatwenele tweye na mweye; avo gogeni nzila, mgende hiko kuwoguliza, mkagule!

¹⁰ Ahewo vuwakalile wochola kugula, Mlawila-mhambe kavika. Awaja wakalile wombeta wengila hamonga na heyo muna imhambe, mhunde mlango uhindwa.

¹¹ Mmabaho weza na waja wanamhambe wayagwe, walonga, Mndewa, Mndewa, tuvugulile!

¹² Kedika kalonga, Ihoko nomulongelani, simtangileni mweye.

¹³ Avo kaleni meso, kilumbo hamwitanga siku bule ikipi-giti.”

Lugano lwa nhalanta

¹⁴ “Vivo vogalamka kamba munhu yolonda kuchola mwanza, kawakema nyakadala zake, keka kumwawo mhiya zake.

¹⁵ Kamwingha imonga nhalanta nhano (zizo silingi elfu nhano), imonga nhalanta mbili, na imonga nhalanta imonga, kamba vija munhu vondayadahe mwenyecho; yomala kachola.

¹⁶ Mhunde yuja yabokele zija zinhano, kachola kazisanghanila uchuluzi, zongezeka nhano.

¹⁷ Vivo na ija mwene zimbili na heyo kasuma, zongezeka mbili.

¹⁸ Bali yuja yapatile ija imonga, kachola kasikula hasi, kazifisa zimhiya za mndewa wake.

¹⁹ Siku bwando vizibitile, mndewa wa nyakadala waja kabwela, kandusa mpeto hamonga na hewo.

²⁰ Keza yuja yabokele zija zinhano, kagala nhalanta nhano ziyagwe, kalonga, Mndewa, kwika kumwangu nhalanta nhano; lola nhano ziyagwe zongezeka.

²¹ Mndewa wake kamulongela, Vinoga, nyakadala gweye unogile na mtamanilwa! Kukala mtamanilwa mvidodo, kumwako nokwika bwando. Kala mdenghelelo ya mndewa wako!

²² Keza na yuja yabokele nhalanta zimbili kalonga, Mndewa, kwika kumwangu nhalanta mbili; lola ziyagwe mbili zongezeka.

²³ Mndewa wake kamulongela, Vinoga, mnyakadala gweye unogile na mtamanilwa! Kukala mtamanilwa mvidodo, kumwako nokwika bwando. Kala mdenghelelo ya mndewa wako!

²⁴ Keza na yuja yabokele inhalanta imonga, kalonga, Mndewa, nikutanga gweye kwa munhu mgaga; kohuna haja haulekile kuhanda, kolundiza haja haulekile kugola.

²⁵ Avo ndumba, ngenda niifisa nhalanta yako hasi mmisenga. Niigala hano, sola ili yako!

²⁶ Mnnewa wake kedika kamulongela, Gweye nyakadala wihile na udodile! Kunhanga kamba mhunaga gaja sigahandile, nolundiza gaja gandekile kugola?

²⁷ Avo vikwandama kuzigala mhiya zangu kwa waja walavaga nyongeza, aniye nikwiza nihapatile ichangu na nyongeza yake.

²⁸ Avo mbokeni nhalanta hiyo, mwingheni yuja yali na nhalanta longo dimwe!

²⁹ Kilumbo yuja mwene kinhu kogwelelwa na kongezelwa kimeme; komu yali bule ikinhu, hata kija kiyali nacho, kobokigwa.

³⁰ Na hiyo nyakadala yali bule mzoko, mwaseni kunze mdiziza, kuko kondakuwe ndilo na kugegeda meno.”

Kitala cha wanhu wose

³¹ “Mwanage Munhu vondayeze na iyenzi yake, na malaika wangʼazi wose hamonga na heyo, aho kokala mkigoda cha iyenzi yake.

³² Na ngholo zose zokilundiza haulongozi wake, na heyo kowabagula kamba vija mchunga viyobagula nghondolo na mhene.

³³ Koweka nghondolo mkono wake wa ukulume, na iwamhene mkono wake wa ukumoso.

³⁴ Mabaho Mndewa kowalongela waja wali mkono wake wa ukulume: Izoni, mmemezwe mhome na Tata wangu, ubokeleni undewa umwikilwe goya lulawile kuumbigwe ulumwengu!

³⁵ Kilumbo nghala na nzala, mningha mandiya; nghala na nghilu, mningʼweza; nghala mbita nzila, mngomela.

³⁶ Nghala ukulunge, mnivaza; nghala mtamu, mwiza kundola; nghala fungigwe, mnghakula.

³⁷ Baho wene ihoko hondawamwidike wolonga, Mndewa, zuwaki vutukuwene uli na nzala, tukwinghize, bule uli na mghilu, tukungʼweze?

³⁸ Kabili zuwaki vutukuwene mbita nzila tukugomele, bule uli ukulunge, tukuvazile?

³⁹ Zuwaki vutukuwene uli mtamu bule ufungigwe, tukukagule?

⁴⁰ Na heyo Mndewa kokwidika yowalongela, Kingongongo nomulongelani, vivija vumumsanghanile imonga wa iwandugu zangu wano wasusuwale, msanghanila nene.

⁴¹ Yomala kowalongela na waja wali mkono wake wa ukumoso, Segeleni kumwangu mdumuke, mgende muna umoto wa digunge, uwamwikile goya Mwenembago hamonga na wasongolo zake!

⁴² Kilumbo nghala na nzala, hamngwelele mandiya; nghala na nghilu, hamningʼweze.

⁴³ Nghala mbita nzila, hamngomele; nghala ukulunge, hamvazile; nghala mtamu na mkifungo, hamnghagule.

⁴⁴ Baho na hewo vondawamwidike wolonga, ‘Mndewa, halihi vutukuwene uli na nzala bule nghilu, uli mbita nzila bule ukulunge, uli mtamu bule mkifungo, tulekile kumsanghanila?ʼ

⁴⁵ Na heyo kowedika yolonga, ‘Ihoko nomulongelani, vivija vumulekile kumsanghanila imonga miyawo wasusuwale, hamnisanghanile niye.ʼ

⁴⁶ Na hiwo wogenda kwingila muna ukugaya milongo yose, bali wene ihoko wochola muna upile wa digunge.”