Mateo 24 - Lagano da Isambi

Ubwelo wa Kristo wotangikaze

¹ Yesu kachola na zake, kalawa mdihekalu; wanahina zake wamgendela, giladi wamulagile zinzengelo za hekalu.

² Na heyo kedika kawalongela, “Hamgona gano gose? Kingongongo nomulongelani, hondadisigale hano dibwe hachana ya dibwe, dileke kubomolwa.”

³ Avija viyakalile hadigongo ja mizeituni, wanahina zake wamgendela hamtimbeho walonga, “Tulongele manzonza higo gokwiza zuwaki; avo utango wake choni wa kubwela gweye, na wa ikimambukizo cha ulumwengu?”

⁴ Yesu kedika kawalongela, “Teganyeni munhu sikuyamvwizileni!

⁵ Kilumbo bwando wondaweze na tagwa jangu wolonga, Niye nene Kristo; hiwo wowazulunza wanhu bwando,

⁶ Na mweye mohulika simulizi za nghondo, na nyongʼonyo za nghondo; teganyeni sikumgudemezwe, kilumbo higo hondagaleke kulawilila, bali acho ikimambukizo hakinavika.

⁷ Ngholo zokwinukila ngholo ziigomba, na undewa wogomba na undewa; kokuwa nzala na mgudemo wa isi hanhu na hanhu.

⁸ Ago gose kicho chandusilo cha usungu.”

⁹ “Milongo hiyo mogogigwa mweye, mogazwa, na hewo womkomani; ilawa baho mokuwa wanhu wa kwihilwa na ngholo zose kihumbo cha tagwa jangu.

¹⁰ Baho bwando vondawekwale, na hewo wokilava na kwiihila.

¹¹ Na walungu bwando wa ivwizi wolawilila na kuwavwizila bwando.

¹² Kilumbo cha zubwanduka matozo vivo kwinogela kohunguka.

¹³ Komu mwene kwazaganya kuvikila ikimambukizo ayo yuyo yondayahone.

¹⁴ Bali Usenga Unogile wa Undewa wopetigwa mulumwengu wose, uwe kihumo cha ngholo zose; aho baho kimambukizo chokwiza.”

Ubananzi wihile na usungu

¹⁵ “Aho vondamuwone ubananzi wihile uja ulongigwe na mtula-Ndagu Danieli, wimile mwihekalu (na heyo yondayasome yavimanye!):

¹⁶ Baho waja wali muisi ya Uyuda wakimbilile mvigongo!

¹⁷ Na heyo yali uchana kukano, sikuyahumuluke kuvisola vinhu vili himo mngʼanda yake!

¹⁸ Yali kumgunda sikuyabwele kuchugu kusola nguwo yake.

¹⁹ Leka wojona wene zinda na hewo wokongheza zisiku hizo.

²⁰ Puleni Mulungu giladi nghimbililo zenu sikuziwe za milongo ya beho, bule siku ya Sabato!

²¹ Kilumbo milongo hiyo yogalamka ya usungu bwando; haunalawilila usungu kamba hiwo kulawila haja haumbigwe ulumwengu mpaka sambi, kabili hondaulawilile ngʼo.

²² Kamba siku hizo hazihunguzwe, munhu hata imonga hisambiyahone; bali kilumbo cha wasaguligwa siku za usungu zohunguzwa.

²³ Milongo hiyo munhu yahamulongelani, Lola Kristo kabahano bule kakuja, sikumumtogole!

²⁴ Kilumbo wolawilila wene kwitenda Kristo kivwizi, na walaguzi wa uvwizi, wotenda vilolomboto vikulu na mazingaombwe, giladi wawagize hata wasaguligwa, kamba vihadahika.

²⁵ Loleni nyandusa kulonga na kumzumani.

²⁶ Wahamulongelani, Ka hiko kuluwala, sukumulawe; Ka muno mgati, sukumtogole!

²⁷ Kilumbo kamba vija lumwemwe vululawaga ulawilo wa zuwa, lungʼala kuvika uswelo wa zuwa, vivo hivo vondayeze Mwana wa Munhu.

²⁸ Kilumbo hauli mtufi, baho mhungu wondawememeze.”

Kuziga kwa isi; mzungu wa mkuyu

²⁹ “Mhunde mgazo wa siku zija uhabita, zuwa dogeligwa ziza, mwezi hondaulave mulenge, nhondo zolagala kuulanga, na mhiko za kuulanga zogudema.

³⁰ Baho vondawoneke Utango wa Mwanage Munhu kuulanga; baho ngholo zose za mulumwengu vondaweyalale, womana kumona Mwana wa Munhu yokwiza uchana mmawingu ga kuulanga hamonga na mhiko na ungʼazi bwando.

³¹ Na heyo kowagala malaika zake hamwenga na dizi kulu ja mhalati na hewo wowalundiza wasaguligwa wake wolawa mngwazo ne, kulawa umwambu uno wa ulanga kuvikila kimambukizo cha kuja.

³² Ifunzeni mzungu muna dibiki ja nghuyu: tambi jake dihamala kuzuka na kukunguluka mijani, movitanga kamba kikomo cha ukuhuna chabehi.

³³ Na mweye vivo, mana mgona higo gose, mvimanye kamba kammabehi, mzinyivi.

³⁴ Ihoko nomulongelani, mlelo uno hondaumale, mpaka higo gose vondagavikizwe.

³⁵ Ulanga na isi zobita, bali ulonzi wangu haubita ngʼo.”

Mlelo siku za Noa ulekigwe

³⁶ “Komu haduhu munhu yovitanga siku hebu kipigiti hicho; wala malaika kuulanga wala Imwana, komu Tata yali yeka.

³⁷ Kilumbo kamba vija vizikalile siku za Noa, avo vondayeze Mwana wa Munhu.

³⁸ Kamba vija aiho hadinavika Disika dikulu, wanhu vuwakalile woja na kungʼwa, wosola na kusoligwa kuvikila siku ija Noa iyengile muna isafina.

³⁹ Wala hawasinhuke mpaka Sika dikulu diza, diwasola wose, vivo vondaviwe umbwelo wa Mwanage Munhu.

⁴⁰ Milongo hiyo wanhu wabili wahawa kumgunda, imonga kobokelwa, imonga kolekigwa.

⁴¹ Watwanzi wabili wahawa wotwanga, imonga kobokelwa, imonga kolekigwa.”

Kaleni meso hosehose

⁴² “Avo kaleni meso, kilumbo hamvitanga siku ilihi yondayeza Mndewa wenu!

⁴³ Ditangeni longa dino, kamba mwene ngʼanda yaimanyile inyizilo, mbavi yondayezile, yahakalile meso, na isambi yaileke ngʼanda yake ituligwe.

⁴⁴ Kileka hivo na mweye imeni goya, kilumbo Mwanage Munhu kokwiza ikikomo chumuleka ukugesa.

⁴⁵ Avo nyakadala yanogile mwene zifiyuko yuyo yalihi? Yuyo ija, mndewa wake yamwikile kwimiliza ngʼanda yake na kuwengha wanhu mandiya kikomo chawo.

⁴⁶ Kamota nyakadala hiyo, mndewa wake yaheza yamvike yosanghana hivo.

⁴⁷ Ihoko nomulongelani, komwika muukulu wa vinhu vyake vyose.

⁴⁸ Bali nyakadala yuja yehile, mana yolonga mmoyo mmwake, Mndewa wangu kokawa.

⁴⁹ Yanduse kuwatowa nyakadala wayage nakuja na kungʼwa hamonga na wakoligwa.

⁵⁰ Mndewa wa nyakadala hiyo kokwiza siku iyoleka kugelegeza, na ikikomo hakitangile.

⁵¹ Komkanha nyenza mbili na kumwingha kibendu chake hamonga na wazenzeleganye, baho hondaiwe ndilo na kugegeda meno.”